مريض وملازم الفراش .. قصة قصيرة حزينة
المكان: إحدى مديريات وزارة الصحة في صعيد مصر.
الأبطال: أطباء حاصلون على درجة الماجستير في التخصصات المختلفة.
يتوجه عدد من الأطباء الحاصلين على درجة الماجستير في التخصصات المختلفة إلى مكتب وكيل وزارة الصحة لمقابلته، وتسلم العمل في مستشفيات تتناسب مع تخصصاتهم.
مقابلة الأطباء
يتهرب وكيل الوزارة من مقابلتهم، قائلًا لمدير المستشفيات في حنق وعصبية: “هو كل واحد هياخد لي ماجستير ولا دكتوراة هيجي يتنطط علينا؟! العيال دول لازم يتحجموا من البداية، وإلا بكره وبعده هيجي إللي يقولك أنا أحسن منك ويعمل راسه براسك!”.
–مدير المستشفيات: ما تقلقش يا ريس، سيب لي أنا الموضوع ده.
يتوجه مدير المستشفيات لمقابلة الأطباء، وفي أثناء ذلك يدق جرس الهاتف.
–مدير المستشفيات: ألو، أهلًا أهلًا يا باشا، أيوه أنا الدكتور إبراهيم، حاضر حاضر، ما تشيلش هم خالص، شوف ابن حضرتك عايز يستلم فين وأنا خدامك!
يغلق سماعة الهاتف يطلق دخان سيجارته في الهواء، ثم ينظر للأطباء أمامه، قائلًا: نعم يادكاتره إيه طلباتكم؟
منطق عجيب
–أحد الأطباء: حضرتك إحنا أخدنا الماجستير، وعايزين نستلم، بس يا ريت حضرتك تراعي ظروفنا في التوزيع على المستشفيات.
–مدير المستشفيات: هو إنت تخصصك إيه يا دكتور؟
–الطبيب: أنا جراحة مخ وأعصاب.
–مدير المستشفيات: جميل جميل (وهو ينظر في ورقة أمامه)، بص يا دكتور هتستلم جراحة عامة في أول مركز في المحافظة.
–الطبيب: بس حضرتك أنا جراحة مخ وأعصاب، مش جراحة عامة!
–مدير المستشفيات وهو يشيح بيده: يا دكتور! يعني هي جراحة المخ والأعصاب إيه غير جراحة عامة ومعاها شوية حاجات تاني؟!
لا يجد الطبيب أمام هذا المنطق العجيب سوى الصمت.
قواعد ظالمة
–ينظر مدير المستشفيات إلى طبيب آخر: وإنت تخصصك إيه؟
–الطبيب الثاني: أنا أمراض قلب.
–مدير المستشفيات: جميل خالص، هتشتغل باطنة عامة، في المستشفى العام اللي في آخر مركز في المحافظة.
–الطبيب: إزاي يا دكتور؟ أنا عمري ما اشتغلت باطنة عامة، أنا نيابتي كلها كانت في معهد القلب، وبعدين أنا عايش هنا وعيالي معايا.
–مدير المستشفيات: يا دكتور! يعني هو تخصص القلب ده إيه غير باطنة عامة ومعاه شوية حاجات تاني؟ وبعدين الشغل ما فهوش حاجة اسمها عايش وعيالي!
عجز في المستشفيات
–ينظر إلى الطبيب الثالث، الذي يجيبه قبل أن يسأل: حضرتك أنا تخصصي عظام بس ممكن أشتغل رمد.
–مدير المستشفيات: إزاي يا دكتور؟!
–الطبيب ساخرًا: هو حضرتك يعني تخصص العظام ده إيه غير شوية رمد ومعاه حاجات تاني!
–مدير المستشفيات كاظمًا غيظه: بصوا يا دكاتره، بصراحة كده إحنا عندنا عجز الفترة دي في المستشفيات ولازم نغطيه.
–أحد الأطباء غاضبًا: حضرتك إحنا مش جثث علشان تعبي بينا أي مكان وخلاص.
–مدير المستشفيات: ده آخر كلام عندي، كل واحد يستلم ورقه ومن بكره يكون في المستشفى.
طريح الفراش
يخرج الأطباء من المديرية، يتوجهون إلى أقرب مركز تلغراف، يبعث كل منهم ببرقية إلى مقر عمله نصها: “مريض وملازم الفراش”.
يتوجه عدد منهم بعد ذلك إلى مقر الجوازات لاستخراج جوازات السفر، بينما يسعى البعض الآخر للحصول على إجازة مرافقة زوجة أو رعاية والدين.
ولا تزال مستشفيات وزارة الصحة بالمحافظة تعاني من عجز في الأطباء.
اقرأ أيضاً:
الحيل البسطاويسية في التعاملات الطبية
* تنويه: الأفكار المذكورة في المقال لا تعبر بالضرورة عن رأي الموقع.
**************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
