أين ذهب الفضائيون؟
عمرك سألت نفسك قبل كده وأنت بتتفرج على السما وبتعد النجوم، هو إحنا لوحدنا في الكون الواسع ده فعلًا؟! ولو إحنا مش لوحدنا، طب أومال فين كل الكائنات التانية الموجودة في الكون دول، وليه مبيظهروش؟!
النهارده تعالى نتكلم مع بعض عن الموضوع ده بتوسع، ونعرض نظريات بتفسر عدم ظهور أي كائنات ذكية لينا لحد دلوقتي، بطرق أقل ما يقال عنها إنها مذهلة، كوباية شايك الحلوة بالنعناع في إيدك، وركز معايا أوي بقى في اللي جاي، عشان هو مذهل وممكن يغير لك النظرة اللي بتبص بيها للكون تمامًا.
بص يا سيدي..
سعة الكون
الكون بتاعنا ده واسع أوي، واسع لدرجة محدش فعلًا يقدر يتخيلها، كفاية إني أقولك إن عرض الكون المرئي اللي إحنا بنقدر نشوفه ونتخيله هو حوالي 93 مليار سنة ضوئية!
طبعًا أنا مقدرش أوصفلك حجم الرقم ده قد إيه، بس يكفي إني أقولك إنك لو هتكتبه على آلة حاسبة فإنت هتكتبه بصعوبة، تخيل إن الضوء عشان يسافر لك من طرف الكون، هيحتاج ياخد تقريبا 93 مليار سنة عشان يوصلك، هياخد فترة أكبر وأطول من عمر الكون نفسه اللي هو كله متكون من 13.7 مليار سنة!
حد هيسألني ويقولي طب إزاي الكون عرضه 93 مليار سنة، وهو متكون من 13.7 مليار سنة بس؟!
هقولك عشان معدل التمدد أو الـ Expansion Rate بتاع الكون أسرع من سرعة الضوء نفسها، وده بيحصل بسبب نوع غريب من الطاقة الغامضة غير المعروفة لينا اللي بتخلي سرعة تمدد الكون تزيد مع الوقت، وده اللغز اللي محير علماء الفيزياء من أواخر القرن اللي فات، ومسميينه الطاقة المظلمة Dark Energy، بس كل ده مش مهم دلوقتي.
خلينا نرجع لموضوعنا..
كم تبعد مجرة أندروميدا من الأرض؟
إحنا لو هنحاول نتكلم بشكل واقعي شوية، هنقول إن لو كان في كائنات فضائية غيرنا، موجودة في مجرات تانية وأماكن تانية من الكون، فإحنا مستحيل علينا إننا نوصل للأبعاد السحيقة دي من الكون،
مهما كانت التكنولوجيا اللي ابتكرناها هنا على الأرض في أي مرحلة قريبة، يا عم ده أقرب مجرة لينا اللي هي مجرة أندروميدا Andromeda، المسافة بيننا وبينها تقريبا 2 مليون و537 ألف سنة ضوئية!
يعني لو عايزين نسافر لها بسرعة الضوء، فإحنا هنحتاج 2 ونص مليون سنة تقريبًا، ده غير إن أصلًا الكون بيتمدد أسرع من الضوء، يعني وإنت مسافر ممكن تلاقي المسافة نفسها بتزيد أسرع من ما أنت مسافر، يعني من الآخر إنسى أساسًا إنك توصل حتى لطرف المجرة بتاعتنا عشان تخرج للفضاء العميق Deep Space وتسافر للمجرة التانية.
مجرة درب التبانة
طيب خلاص.. خلينا نتكلم عن مجرتنا إحنا بقى ونقلل طموحنا شوية، المجرة بتاعتنا يا سيدي فيها حوالي 400 مليار نجم! الرقم ده كبير لدرجة إنك لو حاولت تقارنه بعدد حبات الرمل اللي على كوكب الأرض كله، هيبقى قصاد كل حباية رمل واحدة على الأرض، موجود حوالي 10 آلاف نجم في المجرة!
ومن وسط كل النجوم دي، في تقريبا 20 مليار نجم شبيه بالشمس بتاعتنا ومماثل لها في الحجم، وتقريبا خُمس العدد ده، في حواليهم كواكب بتدور حواليهم في المنطقة الصالحة للحياة أو ال Habitable Zone، اللي هو مش بعيد أوي عن الشمس فيتجمد، ولا قريب أوي فيتحرق.
طيب.. لو إحنا جينا وافترضنا مجرد افتراض إن 0.1% بس من الكواكب دي عليهم حياة زينا. هنلاقي إن بقى عندنا حوالي مليون كوكب عليهم حياة فضائية غريبة عننا، في المجرة بتاعتنا بس، اللي هي درب التبانة أو الـMilky Way! متخيل؟! المفروض يكون في مليون كوكب عليهم أشكال حياة مختلفة عن الحياة بتاعتنا هنا على الأرض، وده أقل تقدير كمان.
طب ثانية واحدة.. لسه في أكتر..
عمر مجرة درب التبانة
مجرتنا دي عمرها كبير جدًا، يمكن عمرها من عمر الكون نفسه، لأنها تكونت من ما يقرب من 13 مليار سنة، بس في البداية بتاعتها كانت غير صالحة للحياة بسبب إنها كانت مليانة نجوم بتنفجر وكواكب بتتصادم وإلخ.
فبسبب ده، أول كواكب ممكن تكون صالحة للحياة تكونت بعد تكون المجرة بحوالي 2 مليار سنة، يعني من 11 مليار سنة تقريبًا.
والمذهل بقى، هو إن كوكب الأرض بكل التطور الحضاري ووجود البشر عليه، وكل الأجناس الحية اللي جت قبل البشر سواء الديناصورات أو غيرها، عمره كله أول عن آخر هو تقريبا 4 مليار سنة بس!
فرص وجود حضارات ذكية في مجرة درب التبانة
يعني إحنا لو افترضنا إن في كواكب تانية من اللي موجودة من قبلنا بكتير دي، تطورت عليها حياة بردو بطريقة مشابهة للحياة اللي عندنا على الأرض، وظهر فيها جنس فضائي غريب عننا، فَهُمَّه هيكونوا عندهم مدة طويلة أوي وأكتر مننا بكتير إنهم يتطوروا تكنولوجيًا،
ومعنى كده إنهم المفروض يكونوا وصلوا بالفعل لمستوى تقدم حضاري أعلى مننا بمراحل لا يمكن استيعابها، ويكونوا قدروا إنهم يوصلوا لتطور تكنولوجي وتقني كافي لإنهم يقدروا يستوطنوا المجرة كلها بكل الكواكب اللي فيها،
والزمن اللي هيحتاجوه عشان يسافروا لكل كوكب صالح للحياة في المجرة، ويعملوا عليه مستعمرة كاملة زي كوكب الأرض بتاعنا كده، هو 2 مليون سنة بالكتير أوي.
أنت ممكن تتخيل إن الزمن ده كبير، بس على مستوى كوني، وعلى مقياس تطور الحضارات، هو زمن أقل من غمضة عين حرفيًا، وخلي بالك إحنا كل ده بنفترض إن من وسط كل المليون كوكب اللي افترضناهم دول، إن في حضارة واحدة بس هي اللي تطورت وبقت ذكية وقدرت إنها توصل لتكنولوجيا عالية ومتقدمة عننا!
إذًا معنى كده إن المفروض إن الحضارة الواحدة بس دي (على أقل تقدير) تكون استوطنت كواكب المجرة كلها تقريبًا، بما فيهم الأرض نفسها! يعني المفروض إحنا نكون شفناهم بالفعل، أو على الأقل شفنا أثر للحضارة بتاعتهم دي، في أي حتة من المجرة بتاعتنا دي من خلال التليسكوبات المتطورة بتاعتنا.
طب أومال همه فين؟!
اقرأ أيضاً:
اكتشاف ممكن يغير الشكل اللي إحنا بنشوف بيه العالم والكون بتاعنا
هل هناك مخلوقات فضائية؟
فين همه الفضائيين اللي إحنا بنتمنى نشوفهم من زمان دول؟ مظهروش ليه؟ وليه إحنا لحد دلوقتي مشفناش ليهم أثر واحد في المجرة كلها، بيدلل على إن في جنس فضائي عاقل وذكي غيرنا إحنا بس، في المجرة بأكملها؟ هل فعلًا البشر متميزين لدرجة إنهم يكونوا الجنس الحي الوحيد الموجود في الكون كله؟!
هل إحنا بس اللي قدرنا إننا نتطور على مدى آلاف السنين، لحد ما وصلنا للشكل بتاعنا الحالي، بكل تقدمنا التكنولوجي ده؟! ومفيش أي جنس تاني في أي مكان تاني في المجرة بتاعتنا دي، قدر إنه يتطور حضاريًا ويوصل لتكنولوجيا متقدمة زينا؟!
الأزمة الوجودية اللي أنا عرضتها عليك في الدقايق اللي فاتت دي هي أزمة مشهورة جدًا في أوساط علم الفيزياء النظرية وعلوم الفضاء والأستروفيزيكس، اسمها (مُعضِلَة فيرمي Fermi Paradox)، ولحد دلوقتي مفيش عالم واحد في العالم كله عارف يجاوب عليها أو يحلها بيقين وتأكيد كامل!
معادلة دريك التي تصف وجود حضارات ذكية في الكون
بس في محاولات كتير بتحط افتراضات أغرب من الخيال، وهتذهلك حرفيًا، بس قبل ما نتكلم عنها ونفهمها، تعالى الأول أحكيلك عن حاجة اسمها معادلة دريك Drake’s Equation. المعادلة دي حطها عالم فلك وأستروفيزيكس أمريكي اسمه د. فرانك دريك Dr. Frank Drake سنة 1961،
وهي باختصار بنستعملها في إننا نحاول بأكبر قدر ممكن من الدقة، نحسب احتمالات وجود حياة ذكية في الكون غير الحضارة البشرية، بتحاول تتواصل معانا أو مع حضارات تانية غيرنا، دي صيغة المعادلة أهي قدامك:
N = R* × fp × ne × fl × fi × fc × L
والقيم بتاعتها بتحدد عمومًا كل المتغيرات اللي ممكن نحتاجها عشان نعرف عدد الحضارات الذكية دي ممكن يبقى قد إيه، بس المعادلة دي كان فيها مشكلة بسيطة خالص، المشكلة إننا منعرفش أي قيمة من القيم اللي في المعادلة دي لحد دلوقتي!، وعشان كده التوقعات صعبة على علماء الأحياء الفضائية أو الـ Astrobiologists، أصل هنتوقع حاجة إحنا مش عارفينها إزاي؟!
أسباب عدم اكتشاف حضارات ذكية في الكون
بس ده ميمنعش إن في كذا احتمال خيالي بيحاول يفسر سبب عدم اكتشافنا لأي حضارة في الكون غيرنا لحد دلوقتي، خلينا نمر عليهم سريعًا كده.
الاحتمال الأول: الأرض هي الكوكب الوحيد الصالح للحياة
الاحتمال الأول معروف: مفيش حياة أصلًا في الكون غيرنا، مش محتاجة ذكاء يعني، والاحتمال ده بيقول إن الكوكب بتاعنا، والحضارة الأرضية عمومًا ممكن تكون نادرة جدًا لدرجة إنها متكررتش غير مرة واحدة بس، والموضوع خد حوالي 3.5 مليار سنة عشان الحضارة الذكية دي تتطور، وحصلت مرة واحدة بس.
يعني إحنا يا عزيزي القاريء طلعنا مميزين، والحقيقة مش عارف لما كل اللي إحنا فيه ده ومميزين، أومال لو كنا مش مميزين كنا هنبقى عاملين إزاي؟! ما علينا، بلاش نفكر في الموضوع ده كتير عشان الخيال ميسرحش بينا لبعيد ونتعب.
الاحتمال الثاني: ضعف قدرة البشر على رصد الكائنات الفضائية
المهم.. الاحتمالات التانية بقى: بتفترض إنهم موجودين فعلًا، بس إحنا مش عارفين نرصد وجودهم لأسباب معينة.
السبب الأول مثلًا، هو إنهم ممكن يبقوا موجودين بس مش بيتواصلوا معانا، هتسألني ليه؟ هقولك معرفش، ممكن يبقوا مغرورين وشايفين نفسهم علينا شويتين.
لو هنتكلم بجد، هنقول إنهم ممكن يكونوا متطورين جدًا لدرجة إنهم أصلًا مش فارق معاهم إنهم يتواصلوا معانا، يعني تخيل مثلًا إنك رايح تقابل واحد صاحبك وطالع على السلم للبيت بتاعه، وشفت شوية نمل بيجروا على جنب،
هيفرق معاك تقف تتعرف على النمل ده؟! هو المثال بالضبط بيتكلم في نفس الفكرة، مع فرق إن النملة بالنسبة لنا تعتبر متطورة جدًا لو قارناها بشكلنا إحنا بالنسبة لهم!
حضارات زي دي هتبقى متطورة لدرجة إنها هتبقى بالنسبة لنا حاجة أشبه بالآلهة، مستحيل نفهمهم مهما حاولنا، ولا نفهم نواياهم ولا حياتهم ولا همه عايزين إيه، حتى لو فكروا يتواصلوا معانا،
يعني عايز تقنعني إنك تقدر تشرح للنملة يعني إيه إنترنت وموبايل وسينما ومدينة ملاهي؟ مهما حاولت، النملة مخها الصغير مش هيكون مؤهل لاستيعاب أو فهم اللي أنت بتقوله أصلًا!
فرضية حديقة الحيوان
في احتمال كمان اسمه فرضية حديقة الحيوان أو The Zoo Hypothesis، الاحتمال ده بيفترض إن ممكن تكون الكائنات الفضائية دي موجودة بالفعل حوالينا وبتراقبنا، بس مبتتدخلش في حياتنا خالص ولا بتخلينا نعرف إنها موجودة أصلًا،
عشان متأثرش على التطور بتاعنا خالص، ويفضل ماشي طبيعي، وفي فرضية متفرعة منها اسمها فرضية المعمل أو The Laboratory Hypothesis بتقول إنهم موجودين، وبيعملوا علينا تجارب من غير ما إحنا نحس أصلًا!
يعني مثلًا ممكن يكونوا بيعملوا تجارب على الأرض والبشر، ومثلًا بيعملوا ما بيننا حروب، وبعدين يسجلوا النتايج دي عشان تفيدهم كدراسة بيولوجية مثيرة، أو مثلًا يخطفولهم واحد ولا اتنين مننا عشان يشرحوهم ويعملوا عليهم تجارب، أو يشوحوهم في شوية زيت.
الاحتمال الثالث: محاولة الكائنات الفضائية للتواصل معنا
ولو كل ده مكانش مذهل بما فيه الكفاية، فخليني أقولك إن الاحتمالات التانية بقى بتقولك إنهم موجودين وبيحاولوا يتواصلوا معانا فعلًا، بس إحنا مش قادرين نفهمهم ولا نحس بإنهم بيتواصلوا معانا، يعني مثلًا ممكن تكون التكنولوجيا بتاعتهم مختلفة عننا بشكل جذري، مستحيل معاه إننا نقدر نحس أصلًا إنهم بيحاولوا يوصلوا لنا.
هبسطها لك، تخيل مثلًا إنك بتحاول بتفكيرك المحدود القديم تدور على شعب بيبعتوا حمام زاجل لبعضهم عشان يتواصلوا مع بعض، بس اللي إنت متعرفوش هو إن الشعب ده متطور جدًا لدرجة إنه بيستعمل الإنترنت في التواصل،
فيسبوك، ميسنجر، وواتساب بقى وهكذا، هل أنت عمرك هتعرف تشوفهم؟! لأ طبعًا.. أنت هتبقى عمال تدور على حمام زاجل، وهما عايشين عادى على الواتساب بيحاولوا يندهوا عليك، وأنت لا تمتلك أصلًا موبايل!
الاحتمال الرابع: وجود الكائنات الفضائية واختفائهم قبل وجود البشر
في احتمال كمان بقى بيقولك إنهم كانوا موجودين في فترة إحنا ما كناش موجودين فيها على الأرض أصلًا، ولا كنا اتولدنا حتى، وده عشان عمر البشر بالنسبة لعمر الكون هو أقصر من لمح البصر،
إحنا حرفيًا لسه ولاد امبارح بالنسبة لعمر الكوكب بتاعنا حتى، مش هقولك الكون، والتكنولوجيا الحديثة بتاعتنا بقالها 100 سنة مثلًا ولا حاجة، قارن ده بعمر الكون اللي هو 13.7 مليار سنة، وهتفهم إننا أصلًا لسه أطفال رُضَّع.
ممكن الكائنات دي تكون كانت عايشة ومرت فعلًا على كوكب الأرض، قبل ما الإنسان نفسه ييجي ويتولد، وممكن تكون اتدمرت مثلًا بكارثة كونية ولا حاجة، أو ممكن تكون لسه موجودة، بس هي عدت علينا ومشيت خلاص، وفاكرة لحد دلوقتي إنه مفيش حياة على الأرض.
احتمال نظرية المؤامرة
الاحتمال اللي جاي ده بقى هيعجب الناس اللي بيحبوا نظرية المؤامرة أوي، بيقولك إنهم موجودين حوالينا ومعانا على الكوكب، بس إحنا منعرفش إنهم موجودين، جو بقى الماسونية
والـIlluminati ومجلس إدارة العالم اللي بيتعامل مع الكائنات الفضائية، وهي اللي بتحكمنا في السر، وهيطلعوا في آخر الفيلم إنهم زواحف أو رماديين والحاجات دي، وعايشين حوالينا متخفيين في صورة بشر أو متخفيين عمومًا في أي صورة، حاجة تنفع حبكة رواية ولا فيلم خيال علمي في هوليوود.
وفي احتمال تاني أغرب من ده كمان، ومذهل لدرجة الرعب..
احتمال تدمير الكائنات الفضائية لنفسها
الاحتمال ده بيقولك إن في حضارات فضائية كتير بتبدأ وبتتطور، بس بتوصل لمرحلة معينة وبتتدمر بسبب كارثة كونية معينة، ومفيش أي حاجة بتقدر تعدي من الفناء ده. الكارثة الغامضة اللي بتدمر الحضارات دي بيسموها (المُرَشِّح العظيم أو The Great Filter)، ومحدش يعرف ماهيتها إيه بالظبط، ولا هي بتيجي إمتى، ومرت علينا أصلًا ولا لسه لم تمر،
ممكن مثلًا تبقى الكائنات الفضائية المتطورة لما بتوصل لمرحلة معينة من التطور التكنولوجي الرهيب، فهي بتدمر نفسها بنفسها، بالضبط زي ما إحنا كنا في فترات مختلفة من التاريخ على وشك إننا ندمر بعض بالقنابل النووية فعلًا.
ممكن بردو يكونوا مبيقدروش يعيشوا لفترة طويلة توصلهم لإنهم يسافروا برة الكواكب بتاعتهم، وبيتدمروا دايمًا قبلها بسبب نيازك أو انفجارات شمسية أو أي كارثة من الكوارث الكونية الشنيعة دي، زي اللي حصل مع الديناصورات مثلًا من ملايين السنين.
احتمال تدمير الحضارات القوية
وفي افتراض كمان مرعب جدًا، وبيرعبني بشكل شخصي، بيقولك إن في حضارة قديمة قوية جدًا، ومتطورة بشكل مرعب وغير قابل للاستيعاب، الحضارة دي وصلت لمرحلة من التطور خلاهم أشبه بالآلهة كده، محدش قادر يستوعب وجودهم أصلًا.
وخد عندك الرعب بقى..
الحضارة دي عشان تحافظ على تطورها وقوتها دايمًا للأبد، وتضمن إن مفيش أي حضارة غيرها تقدر تتطور لدرجة تقدر معاها إنها تنافسها أو تهددها، فهي كل فترة كده لما بتشوف في حضارة قوية ابتدت تظهر في الكون، بتروح للحضارة دي وتدمرها تمامًا!!
بالضبط زي مثلًا سلسلة روايات وألعاب Mass Effect اللي كان فيها جنس من الكائنات سحيقة القدم اسمه الـReapers، وكانوا كل فترة أو دورة متكونة من كام ألف سنة، بيرجعوا مرة تانية للحضارات اللي في المجرة ويدمروها كلها عشان متتطورش أكتر من كده وتهدد وجودهم!
ربما يراقبنا الفضائيون بالفعل!
هو الموضوع هنا بيتكلم في نفس الفكرة، فتخيل بقى أنت!
تخيل إن ممكن تكون في حضارة متطورة في الكون بتراقبنا كده وبتشوف إحنا هنوصل لتطور إيه، لو دمرنا نفسنا بنفسنا يبقى خير وبركة، كفينا ووفرنا، بس لو فضلنا نتطور لدرجة نشكل فيها خطر على وجودهم، فهمه هيجولنا ويمسحونا من على الخريطة بأستيكة حرفيًا.
عايز تتخيل معايا وتحاول تستوعب إن ممكن تكون في حضارة زي دي موجودة في الكون، بتدور على الحضارات الذكية عشان تيجي وتدمرها، وإحنا بمنتهى السذاجة عمالين نبعت إشارات راديو للكون، ونحاول نتواصل مع أي حد، ونبعت أي إشارة لأي حتة، كإننا بنرشدهم على مكاننا!
الاحتمال مرعب فعلًا، والمرعب أكتر هو إنه مش الوحيد.
في احتمالات كتير جدًا، أكتر من قدرتنا على الحصر، وكلها أغرب من بعضها، ومدى قابليتها للتصديق بيعتمد عليك أنت يا صديقي القاريء.
هل إنت مصدق أو مقتنع بأي نظرية من النظريات دي؟!
هو ده السؤال، وإجابته هسيبها لخيالك أنت، تسرح فيها وأنت بتتفرج بالليل على السما، وبتعد النجوم.
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
