الظلمة أسرع ولا النور؟
زمان وإحنا صغيرين، كلنا أكيد جربنا إحساس إننا نعطش في نص الليل، ونخرج من أوضتنا في عز الضلمة عشان نروح نفتح باب التلاجة ونشرب، وطبعًا عشان الأطفال دايمًا خيالهم واسع، دايمًا كنا بنخاف من الضلمة، وبنتخيل إن في عفريت مستخبي جواها، مستني بس إننا نقرب عشان ياكلنا، ويمكن عشان كده الواحد فينا دايمًا كان يحاول يقفل النور ويعدي من الصالة المضلمة دي بسرعة، قبل ما الضلمة تلحق توصله.
طب يعني معنى كده، إن ممكن يكون الضلمة دي ليها سرعة أصلًا؟! ولو ليها سرعة، فأنهون أسرع، الضلمة ولا النور؟
ما هو تعريف الظلام
أول حاجة لازم نفهمها في الموضوع، هي يعني إيه ضلمة، الضلمة هي ممكن نتخيلها على إنها عدم وجود ضوء، بمعنى إن المكان اللي مفيهوش ضوء بيكون فيه ضلمة، بس عشان نقدر نقيس سرعة الضلمة دي، لازم الأول نعرف سرعة الضوء.
ما هي سرعة الضوء
سرعة الضوء بناءً على الحسابات الفيزيائية، هي تقريبا 300 مليون كيلومتر في الثانية، إلا شوية كسور كده، والسرعة دي تعتبر هي السرعة القصوى اللي بتسمح بيها قوانين الفيزياء في الكون كله، وسبب ده هو إن الضوء ده نفسه بيبقى متكون من جسيمات ذرية، اسمها الفوتونات Photons، والجسيمات الذرية دي مالهاش أي كتلة أو وزن،
وحسب نظرية النسبية، كل ما كتلة أي جسم أو جسيم ذري بتقل فهو سرعته بتزيد، والعكس صحيح، وعشان كده بنلاقي الفوتونات دي بتمشي وبتسافر بالسرعة القصوى اللي بتسمح بيها قوانين الكون، اللي هي سرعة الضوء.
هل هناك وجود للظلام؟
إنما الضلمة زي ما قلنا هي عدم وجود الفوتونات دي من الأصل، أو عدم وجود مصدر ضوئي، يعني معنى كده إن الضلمة هي شيء أزلي وغير مادي، وموجود من قبل وجود الضوء، يعني الضلمة هي أساس مش نتيجة.
الضلمة ممكن تتأثر بالنور، لكن هي مبتأثرش في النور، يعني مش هينفع مثلًا يكون في نور شغال، وإنت تيجي تجيب كشاف وتضلم عليه، مفيش حاجة اسمها كده أصلًا! لكن إنت ممكن تجيب كشاف عادي وتنور الضلمة.
أنواع وسرعة الظلام
النوع الأول: الظلام العادي
كمان الضلمة ليها أنواع، والأنواع دي ليها سرعات، يعني مثلًا في الضلمة العادية اللي بتيجي لما إنت تقفل النور في الأوضة، ودي بتكون سرعتها هي نفس سرعة الضوء بالظبط، اللي هو إنت لو قمت وقفلت النور، هتلاقي الدنيا رجعت ضلمة في نفس اللحظة اللي النور اختفى فيها، وده لإنها هي الأساس، يعني هي موجودة في الطبيعي أصلًا، بس النور لما بييجي بيغطي عليها، ولما يروح بترجع تضلم تاني.
النوع الثاني: الظل
بس في نوع تاني من الضلمة، كلنا نعرفه باسم الضل أو الـ Shadow، والضل ده بيتكون لما بييجي أي جسم معتم، ويحجز مسار الضوء اللي مسافر في الجو عادي، فبيسيب مكان الضوء ده في الحيطة حتة مضلمة في وسط النور، زي بالظبط اللي بيحصل لما تحط إيدك قدام كشاف مثلا، بتلاقي إيدك بتحجز جزء من النور اللي جاي منه، وبتسيب مكانه حتة مضلمة على الحيطة.
سرعة الظل
ولو أنت جيت وحركت صباعك قدام كشاف، هتلاقي إن الضل بتاع إيدك على الحيطة بيتحرك بنفس سرعة الضوء بالظبط، بس لو افترضنا إن الكشاف بتاعك ده ضخم جدًا، وإنك موجهه ناحية القمر، وجيت حركت صباعك قدامه،
هتلاقي إن ضل صباعك اللي على القمر اتحرك مسافة كبيرة جدًا في أقل من الثانية!.. وده بالرغم من إن الضوء المفروض بياخد ثانية وتلت، عشان يوصل أصلًا للقمر!
يعني معنى كده إن الضل في الحالة دي، هيكون اتحرك أسرع من الضوء نفسه، اللي هو المفروض أسرع حاجة في الكون كله، ودي حاجة المفروض مينفعش تحصل، عشان أينشتاين قال زمان في نظرية النسبية العامة: “لا شيء ممكن يتحرك أسرع من الضوء”.
اقرأ أيضاً:
اكتشاف ممكن يغير الشكل اللي إحنا بنشوف بيه العالم والكون بتاعنا
هل الظلام مادة؟
بس الفكرة بقى هي إن الضلمة دي نفسها هي لا شيء، حاجة غير مادية ومالهاش أي معلومات أو وجود فيزيائي، يعني بالتالي أصلا مالهاش سرعة، وعادي إنها تكسر سرعة الضوء، لإنها ولا حاجة! وبالتالي في الحالة دي هنكون مكسرناش قواعد الفيزياء!
ظاهرة الطاقة المظلمة
وده هو نفس سبب توسع الكون اللي اكتشفه علماء الفيزياء النظرية والرصد الفلكي، اللي قالوا إنه حاليًا بيتمدد بسرعة أكبر من الضوء، بسبب ظاهرة اسمها الطاقة المظلمة أو ال Dark Energy، وكان قصدهم بتمدد الكون ده هو إن الفضاء نفسه هو اللي بيتمدد وبيكبر، وبما إن الفضاء هو فراغ أو عدم أو لا شيء، يبقى عادي يتمدد أسرع من الضوء.
ظاهرة التمدد الكوني
ونفس الكلام ده حصل في بداية خلق الكون حسب نظرية الانفجار الكبير أو الـ Big Bang، لما حصلت ظاهرة اسمها الـ Cosmic Inflation أو التمدد الكوني، والظاهرة دي بتقول إن في وقت خلق الكون بتاعنا، فالمساحة بتاعته كبرت من حجم الذرة، لحجم أكبر من المجموعة الشمسية بتاعتنا كلها، في وحدة زمنية أصغر بمليارات المرات من الثانية!
والوحدة الزمنية اللي كبر فيها الكون ساعتها حسب النظرية دي، اسمها زمن بلانك Planck Time، وهي تعتبر أصغر وحدة زمنية معروفة في الفيزياء، لو عايز تعرف هي صغيرة قد إيه،
يكفي إن أقولك إن الثانية اللي بتعدي عليك وإنت قاعد بتشوف الفيديو ده، فيها عدد وحدات زمن بلانك أكبر من كل عدد الثواني اللي عدت على الكون من ساعة ما بدأ من 13 مليار سنة ولحد دلوقتي!
وده بردو حصل بسبب إن اللي بيتوسع ده هو الفضاء أو الفراغ نفسه، اللي هو ولا حاجة زيه زي الضلمة بالظبط، وبالتالي سرعته ممكن تبقى أكبر من سرعة الضوء عادي بدون ما تكسر أي قوانين أو قواعد فيزيائية!
يعني في الآخر، الضلمة ممكن تبقى أسرع من الضوء، وكلنا كنا غلطانين وإحنا صغيرين، عشان الضلمة كده كده هتوصلنا حتى لو جرينا، والعفريت سايبك بمزاجه مش أنت اللي سبقته!
مصادر:
https://science.howstuffworks.com/dictionary/astronomy-terms/speed-of-darkness.htm
https://www.discovery.com/science/darkness-is-faster-than-the-speed-of-light
https://wtamu.edu/~cbaird/sq/mobile/2013/06/20/what-is-the-speed-of-dark/
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
