أسطورة وحش لوخ نيس! .. هل هي حقيقة أم خيال؟!
تخيل لو قلتلك إن في وحش أسطوري من أيام الديناصورات، طوله يصل لعشرات الأمتار وحجمه يبلغ مئات الأطنان، لسه عايش لغاية دلوقتي؟!
في بحيرة نيس أو لوخ نيس زي ما بيسموها في اسكتلندا، موجود واحد من أغرب الظواهر اللي لحد النهاردا محدش عارف يفسرها ولا يتأكد منها، وحش غامض ومخيف وحجمه شديد الضخامة لدرجة أسطورية، ناس كتير شافته ورصدته على مدار عشرات السنين وبيقولوا إنه موجود هناك في قاع البحيرة، غير عشرات الصور والتقارير اللي أبرزت وجوده، بس لحد النهاردا محدش قادر يلاقيه ولا يعرف شكله عامل إزاي ولا حقيقته إيه!
هات بقى كوباية شايك الحلوة ونعناعك في إيدك، وتعالى معايا النهاردا أحكيلك عن القصة الغامضة لوحش لوخ نيس الأسطوري، وإزاي ممكن يكون واحد من أقدم الكائنات على وجه الأرض، واللي لسه عايشة من ملايين السنين ومحدش يعرف عنها أي حاجة، وفي الوقت نفسه هنحاول نعرف مع بعض فين الحقيقة وفين الخيال.
يلا بينا!
ما هي قصة الوحش لوخ نيس؟
في القصص والأفلام دايمًا كانت الوحوش بتظهر نتاج طفرات جينية أو تجارب مختبرية مجنونة، بالضبط زي ما شفنا في فيلم “جودزيلا” اللي كان الوحش فيه ناتج انفجارات نووية حولت سحلية عادية إنها يحصلها طفرة جينية وحولتها لوحش ضخم بيدمر الجيوش والمباني.
بس لو كنت متخيل بقى إن وحش لوخ نيس اللي إحنا على وشك إننا نتكلم عليه دلوقتي، ينطبق عليه الكلام دا نفسه، فيؤسفني إني أقولك إنك غلطان، لإن الحكاية في الواقع بتبدأ من قبل كدا بكتير، وتحديدًا في القرن الـ16، قبل وجود التكنولوجيا الحديثة!
بص يا سيدي، القصة بدأت لما كتب القديس “كولومبا” عن رؤيته لوحش بيهاجم راجل في بحيرة في اسكتلندا اسمها بحيرة “نيس” أو “لوخ نيس”، والحكاية دي كانت في القرن الـ16، ومن ساعتها، ناس كتير قالوا إنهم شافوا الوحش دا أو آثاره في المياه، ووصفه الشهود بإنه كبير وضخم برقبة طويلة وعنده حدبة أو أكثر زي بتوع الجمل كدا بيظهروا دايمًا من وسط المياه!
على مر السنين والعصور، المشاهدات دي كانت بتحصل كتير جدًا وفي أوقات مختلفة ومن ناس مختلفة، بس عشان نقدر نشوف المشاهدات دي ونختبر مدى صحتها مع بعض، لازم الأول نتكلم عن بحيرة نيس، ونعرف هل ممكن وحش ضخم زي دا يستخبى في وسط بحيرة زي دي فعلًا ولا لأ.
أين تقع بحيرة لوخ نيس؟
بحيرة لوخ نيس يا صديقي بحيرة كبيرة للماء العذب موقعها في منطقة الجبال الاسكتلندية، وهي موجودة على بعد 37 كيلومتر تقريبًا جنوب غرب مدينة انفرنيس (inverness) في اسكتلندا، مساحة سطحها تقريبًا 56.4 كيلومتر مربع، وهي تاني أكبر بحيرة في اسكتلندا بالمناسبة، بعد بحيرة تانية اسمها “لوخ لوموند”.
طب عمق البحيرة دي قد إيه؟ وهل هو صالح لاحتواء وحش زي دا؟!
أقصى عمق للبحيرة يا سيدي تقريبًا 230 متر، ودا معناه إنها تاني أعمق بحيرة في اسكتلدندا بعد بحيرة مورار، وعمقها صالح جدًا بالفعل لاحتواء وحش ضخم زي دا، يعني القصة مش بعيدة.
طب إيه مدى صحة الحكايات اللي بتتحكى عن الوحش دا؟!
تاريخ المشاهدات المزعومة
زي ما قلتلك يا صديقي، مشاهدات وحش لوخ نيس ابتدت من القرن الـ16، بس بداية انفجار القصة ومعرفة العالم كله بيها حصلت في التلاتينيات من القرن العشرين، وتحديدًا سنة 1933، لما نشرت صحيفة “إنفرنيس كورير” (Inverness Courier) خبر عن زوجين قالوا إنهم شافوا الوحش وهو بيعبر البحيرة!
مشاهدات عام 1933
القصة حصلت يوم 22 يوليو سنة 1933، لما كان السيد جورج سبايسر (George Spicer) وزوجته سايقين عربيتهم على طول الجانب الشرقي من بحيرة لوخ نيس، الساعة كانت تقريبًا ما بين 3:30 و4 العصر، وكان الزوجين وقتها في مكانٍ ما على الطريق ما بين منطقة (Dores) ومنطقة (Foyers)، وكانوا طالعين بعربيتهم على مطلع فوق تلة صغيرة.
بس فجأة، وفي وسط ما هما ماشيين، ظهر قدامهم مخلوق ضخم كان بيعبر الطريق قدام عربيتهم، من الشمال لجهة اليمين!
المخلوق دا ظهر فجأة على مرمى بصرهم لمدة كام ثانية، لكنه كان سادد الطريق بالفعل قدامهم بسبب ضخامته اللي خلتهم يشوفوه وهمه طالعين التل من على مسافة بعيدة، وحسب كلامهم، فهو لون جلده كان رمادي، بنفس لون جلد الفيل تقريبًا، وجسمه ضخم جدًا وسميك، وبيتحرك عن طريق الزحف زي حركة الفقمة أو كلب البحر كدا!
رقبة الوحش كانت طويلة جدًا وظاهر فيها حلقات بتتحرك كأنها موجات بتنتقل من فوق لتحت، وشكلها غريب وغير مألوف، ومع حركة الكائن، اختفت رقبته ما بين الشجر اللي على جنب الطريق، واختفى باقي جسمه كمان بعدها مباشرة!
جورج ومراته قالوا لما حكوا قصتهم إن الكائن دا مكانش ليه أي أرجل مرئية من أي نوع، ولا ذيل، لكنهم شافوا في نهايته حاجة شبيهة بالذيل، شايل عليها كائن تاني باين عليه حيوان، ومقدروش يحددوا هل الحيوان دا له علاقة ودية مع الوحش الضخم دا، ولا هيكون وجبة العشاء بتاعته.
بعد ما شافوا المخلوق رأي العين، كمل السيد جورج سبايسر وزوجته طريقهم وهما مصدومين ومش مستوعبين، وطبعًا زي ما أنت متخيل، الفضول البشري شجعهم إنهم يرجعوا تاني ويدوروا على الكائن الضخم اللي شافوه، لكن لسوء حظهم أو حسنه، لما رجعوا المكان نفسه تاني كان المخلوق دا اختفى تمامًا من دون أدنى أثر!
ماكانش في أي شيء يدل على إن الكائن دا مر من هنا، غير العشب اللي كان باين عليه إنه مرت عليه أقدام ضخمة وتقيلة سحقته تحتها، وعلى الجنب البعيد من البحيرة، لقوا آثار حاجة كبيرة زحفت ناحية البحيرة!
المهم بقى إن في الوقت اللي كان فيه جورج وزوجته في رحلتهم جوار بحيرة لوخ نيس، كان عمرهم ما سمعوا عن قصة وحش البحيرة دا نهائيًا، ومعرفوش أي حاجة عن الوحش غير بعد ما وقفوا واحد كان راكب موتوسيكل ومعدي في الطريق، وحكوا له عن الكائن الغريب اللي شافوه، وهنا الشخص دا حكى لهم عن قصة وحش بحيرة لوخ نيس الأسطورية، وإن ناس كتير حكت عنه زمان على مر العصور، وقالوا إنهم شافوه في أماكن متفرقة حوالين البحيرة.
وبعد تردد من السيد جورج وزوجته، قرروا إنهم يشاركوا قصتهم دي، وبعتوا حكايتهم في رسالة لجريدة “إنفرنيس كورير”، اللي بدورها نشرت قصتهم دي يوم 4 أغسطس سنة 1933، ومن هنا انفجرت شعبية القصة، وناس كتير سمعت عنها للمرة الأولى، وخطفت خيال العالم كله!
تعرف على: نظرية الميازما أو الهواء الفاسد
صورة الجراح
وفي الشهور والسنين اللي بعدها، ناس كتير راحوا بحيرة نيس عشان يشوفوا الوحش دا همه كمان، لكن محدش عرف يقدم أي دليل مادي ملموس على وجوده، لحد ما ظهر دليل قلب الدينا كلها رأسًا على عقب!
الدليل دا كان أول صورة للوحش يصوروها للوحش، واللي اتعرفت بعد كدا باسم صورة الجراح!
سنة 1934، كان الدكتور “روبرت كينيث ويلسون”، جراح أسنان من لندن، بيقضي عطلته في اسكتلندا، و كان مهتم بالبحث عن وحش البحيرة الغامض، بعد ما سمع عنه زي كتير من الناس غيره.
وفي يوم كان بيسوق عربيته على ضفة البحيرة، وفجأة شاف حاجة غريبة بتخرج من المياه، حاجة لونها أسود برقبة طويلة، ورأس مدورة، أقرب لشكل الديناصورات المعروفة.
مباشرة أول ما شاف المشهد دا، وقف الدكتور روبرت عربيته وطلع كاميرته اللي كان واخدها معاه مخصوص، وصور المخلوق الغريب دا أربع صور، وبعد لحظات اختفى الوحش في قاع البحيرة!
لكن بعد ما الدكتور روح وفرغ الصور بتاعته دي عشان يتفرج عليها، لقى واحدة من الصور واضحة جدًا، وأظهرت تفاصيل مذهلة للوحش!
ولإن الدكتور ويلسون ماكانش عايز يكشف عن نفسه، وكان خايف لسمعته تتأثر كونه عالم وجراح، بعت الصورة الواضحة لصحيفة ديلي ميل، وادعى إنه فقط مصور هاوٍ.
في يوم 21 أبريل سنة 1934، الصحيفة نشرت الصورة وأطلقت عليها اسم “صورة الجراح”، وأثارت ضجة عالمية بعدها، لما أصبحت أشهر صورة للوحش، واللي بيظهر فيها رأسه ورقبته وهو بيخرج من المياه، وناس كتير اتكلمت عنها وحكوا عنها قصص وحكايات استمرت لسنين طويلة جدًا.
اقرأ أيضاً: التنين بين الظن واليقين
انكشاف خدعة صورة الجراح المزيفة
لكن في سنة 1994 ظهرت صدمة كبيرة للمقتنعين بوجود وحش لوخ نيس، لما أعلنوا إن الصورة الشهيرة دي لوحش البحيرة كانت في الحقيقة خدعة! وإن اللي نفذها كانوا 3 رجالة، وهما الدكتور ويلسون، وصديقه “موريس تشامبرز”، وابن عمه “كريستيان سبريلنج”!
اللي عملوه بالظبط عشان ينفذوا الصورة، إنهم جابوا قناع مطاطي شبيه للوحش، وثبتوه على مقدمة غواصة صغير لعبة، وأبحروا بيه في البحيرة. وبعدين التقطوا الصور اللي كانت بزاوية معينة مبينة إنها وحش فعلًا، وأرسلوها لصحيفة الديلي ميل، واستمتعوا بمشاهدة العالم وهو بينخدع منهم!
محدش فيهم كشف عن الخدعة دي إلا بعد سنين طويلة، بعد وفاة تشامبرز وويلسون. وكان سبريلنج الوحيد اللي لسه عايش ساعتها، وحكى القصة قبل ما يموت هو كمان، وكشف عن شكل القناع والغواصة، اللي كانوا مخبيينها في حظيرة لسنوات طويلة!
بس تفتكر أنت الناس بعد الكشف عن الخدعة دي تأثروا ولا بطلوا بحث عن الوحش؟!
لا خالص، والدليل إن مشاهدات وحش لوخ نيس تكررت بعدها عشرات ويمكن مئات المرات، وكل واحدة فيهم بتحكي تفاصيل مذهلة!
تعرف على: أخطر مكان على وجه الأرض!
أفلام وصور لوحش لوخ نيس
في سنة 1960، المهندس البحري “تيم دينسلو” قدر يصور فيلم للوحش، ظهر فيه جسم مظلم ومتموج بيسبح في البحيرة، وبعدها سنة 1975، المغامر والباحث في الخوارق “أنتوني شييلز”، قدر يلقط صورة للوحش، ظهر فيها رأس ورقبة طويلة وجسم مغطى بالحراشف، وقال شييلز عنها إنه شاف الوحش وهو بيخرج من الماية وهو بيطلق صوت مرعب!
في سنة 2019، المدرس الإنجليزي “إيوان ماكجريجور”، لقط صورة تانية للوحش، ظهر فيها ضل ضخم بيسبح تحت سطح الماء، وقال ماكجريجور ساعتها إنه شاف الوحش بيسبح بجانب القارب بتاعه، وإنه كان أكبر من القارب نفسه! والصورة دي خدت اهتمام واسع جدًا، وقال بعض الخبراء عنها إنها ممكن تبقى أفضل دليل على وجود الوحش لغاية دلوقتي!
ورغم إنه بعدها كشفوا عن كتير جدًا من الصور والفيديوهات المفبركة للوحش، إلا إن قصته كانت مثيرة جدًا، وتحولت بحيرة نيس أو لوخ نيس لواحدة من أكبر المزارات السياحية في العالم، ومئات الآلاف من الناس بييجوا يزوروها كل سنة، لحد ما في سنة 2023، قرر بعض العلماء إنهم يعملوا أكبر عملية مسح وبحث عن الوحش في البحيرة في آخر 50 سنة، باستعمال التكنولوجيا الحديثة.
أكبر عملية بحث عن وحش لوخ نيس
البحث دا بدأ في 27 أغسطس 2023، وشارك فيه مجموعة من الباحثين والهواة من مختلف الدول، بالتعاون مع مركز بحيرة لوخ نيس، واستخدموا فيه مجموعة من التقنيات المتطورة، منها مثلًا طيارات درون من دون طيار، مجهزة بأجهزة مسح حراري، عشان تلقط صور للمياه وترصد أي أجسام غريبة، ومعاها كمان قوارب مزودة بكاميرات بتعمل بالأشعة تحت الحمراء، لتصوير أعماق المياه.
دا غير الميكروفونات الحديثة الحساسة اللي بيسموها الهيدروفونات، اللي بتقدر تسمع الأصوات الخافتة اللي بتحصل تحت سطح المياه، وغير كمان أجهزة السونار اللي بتقدر تكشف أي أجسام غريبة تحت السطح.
طب وإيه النتايج؟! طلع مزيف؟!
الحقيقة إن على عكس ما أنت متوقع يا صديقي، البحث أظهر نتايج مثيرة للاهتمام وغريبة! زي مثلًا إن سجلوا لقطات فيديو ظاهر فيها ما يشبه ظهر حيوان له “حراشف غامضة” ويتحرك في البحيرة قبل ما يختفي، وبعدها قدموا لقطات لمركز بحيرة لوخ نيس ظاهر فيها “خطوط في الماء” ممكن تكون ظلال للوحش، وكمان رصدوا “ظل عملاق” بيتحرك تحت سطح المياه مباشرة، ويغطس بعيدًا عن الأنظار، وبعدين يرجع يسبح تاني!
اقرأ أيضاً: نفس الكلام حصل مع حضارات تانية
هل هو أسطورة أم حقيقة؟
ولحد النهاردا محدش عارف ينفي أسطورة الوحش أو يأكدها تأكيد قاطع!
فأنت شايف إيه؟!
هل الوحش دا محض خيال تحول مع السنين لأسطورة بيدور عليها الجميع، وبيخترعوا تفاصيل أو يتخيلوا مشاهد مرعبة في وسط الضلمة عشان يلاقوها؟ ولا فعلًا ممكن يكون حقيقة ويطلع في كائن غير معروف للعلم البشري، ما زال لحد النهاردا موجود تحت مياه البحيرة؟!
المثل القديم بيقولك مفيش دخان من غير نار، ومستحيل الحكايات دي كلها تظهر بالكثافة دي، من غير ما يكون في مشاهدات حصلت لحاجة غريبة في البحيرة بالفعل، فيا ترى إيه السر ورا اللغز الغامض دا؟!
هو دا السؤال اللي الزمن لوحده قادر يجاوب عليه.
مصادر:
https://www.visitinvernesslochness.com/the-lochness-monster
https://www.nbcnews.com/news/world/loch-ness-monster-hunt-largest-decades-rcna102002
https://www.highland.gov.uk/highlandar/TheLochNessMonster
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
