نظرية الأرض المسطحة! .. هل نحن نعيش في مؤامرة عمرها مئات السنين؟!
في العصر اللي إحنا عايشين فيه دا، معظم الناس عارفين المعلومة البسيطة اللي بتقول إن الأرض عبارة عن كوكب صغير أزرق موجود في قلب الفضاء الواسع، وبتدور حوالين شمس متوسطة الحجم في قلب مجرة كاملة اسمها درب التبانة، بس لو رجعنا للماضي شوية، هنلاقي إن المعلومة دي مكانتش حاجة معروفة ولا حتى مقبولة من مجتمع العلماء!
زمان، العالم كله كان فاكر إن الأرض دي عبارة عن أرض مسطحة وممتدة في جميع الاتجاهات، وإن ليها حافة بعد حدود المحيط، واللي بيوصلها ممكن يسقط من على الأرض نفسها وينتهي للأبد! والمذهل إن الناس كلها كانت بتتعامل على إن دي الحقيقة المطلقة، وكمان كانوا فاكرين إن الأرض دي هي نفسها مركز الكون، وإنها كبيرة وضخمة، والشمس هي اللي بتدور حواليها مش العكس!
الاعتقاد دا فضل سائد عند الناس لفترة طويلة جدًا في العصور الوسطى، لحد ما أخيرًا تطور العلم بما فيه الكفاية لإنه يثبت إن الأرض في الواقع كوكب كروي ومش مسطحة، وإنها مش م8ركز الكون ولا حاجة، بل كوكب عادي جدًا بيلف حوالين الشمس زيه زي باقي الكواكب.
بس تخيل بقى لو قلتلك إن في فئة كبيرة من الناس، عددهم بيزيد كل يوم، في العصر الحديث ولحد دلوقتي، ما زالوا مصرين على إنكار كل الحقايق والاكتشافات والإثباتات العلمية دي، وبيقولوا إن كل دا عبارة عن مؤامرة واحدة كبيرة معمولة على المجتمع البشري عشان يخبوا عننا الحقيقة!
وإن الحقيقة الأرض فعلًا مسطحة وممتدة في جميع الاتجاهات، وإنها أكبر مما إحنا نتخيل، وإحنا لسه لحد دلوقتي موصلناش لآخرها! ومش بس كدا، دول بيقولوا كمان إن مفيش حاجة اسمها فضاء، وإن كل الرحلات اللي خرجت للفضاء من أول الستينيات ولحد يومنا هذا عبارة عن جرافيك وفوتوشوب، ومفيش حد عدى من سماء الأرض أصلًا!
هات كوباية الشاي والنعناع في إيدك، وتعالى بقى معايا النهاردا أحكيلك عن واحدة من أغرب وأشهر نظريات المؤامرة في العصر الحديث، ونشوف مع بعض مدى صحتها وواقعيتها وقابليتها للتصديق، وحضر نفسك عشان اللي أنت هتقراه في الدقايق الجاية دي هيبقى غريب فعلًا.
يلا بينا!
سامويل شينتون
سنة 1956، كان في عالِم إنجليزي اسمه “سامويل شينتون” (Samuel Shenton)، طرح نظرية راديكالية ومخالفة لكل العلم والتطور اللي وصله الجنس البشري لحد وقتها، النظرية دي كان بيقول فيها إن الأرض مش كورة ومش كوكب، بل حاجة مختلفة عن كدا تمامًا، وإن شكلها الحقيقي مسطح وممتد على مرمى البصر، وحدودها منقدرش نشوفها ولا نوصلها بعيوننا!
وعارف أنت بقى إيه اللي حصل بعد كلامه دا بسنة واحدة بس؟! الاتحاد السوفييتي أطلق القمر الصناعي الأول في تاريخ البشر “سبوتنيك 1” سنة 1957! والقمر دا بعدها لف حوالين مدار كوكب الأرض كله وصوره من الفضاء لأول مرة، والصور دي شافها العالم كله بعدها، واتأكدت أكتر بعدها لما أمريكا بدأت في إطلاق الأقمار الصناعية بتاعتها هي كمان، بقى عندنا لأول مرة في تاريخ البشر كمية كبيرة من الصور اللي ظاهر فيها كوكب الأرض كله من بره، من قلب الفضاء المظلم!
بس رغم كل دا، “شينتون” مكانش مقتنع بأي حاجة بتقولها الحكومات أو وكالات الفضاء، وكان شايف إن كل الصور دي مش حقيقية ومزيفة، وعشان كدا قرر إنه يأسس منظمة كاملة سماها “مجتمع الأرض المسطحة” (Flat Earth Society)، عشان تبدأ المنظمة دي في السنين اللي بعدها تتبنى وتنشر كل النظريات اللي ليها علاقة بإثبات خطأ وزيف فكرة كروية الأرض!
اقرأ أيضاً: رسميًا.. كوكب الأرض له 3 أقمار!
مجتمع الأرض المسطحة
في العصر الحالي اللي إحنا عايشين فيه، وعلى عكس ما أنت ممكن تكون معتقد، فالنظرية دي بتزيد شعبيتها وانتشارها في كل يوم، وعدد المؤمنين بصحتها حاليًا بيوصل إلى ملايين دون مبالغة، والمفاجأة إن المؤمنين بالنظرية دي مش بس موجودين عندنا هنا في الشرق الأوسط، بل منتشرين في الدول الغربية أكتر بكتير، وحسب إحصائية عملتها منظمة (YouGov) للإحصائيات، فتقريبًا 33% من الأمريكان، مؤمنين دلوقتي بفكرة إن الأرض مسطحة مش كروية، والـ33% دول في منهم فنانين ومشاهير كتير!
طبعًا أنت دلوقتي بيدور جوة دماغك سؤال: إيه المقنع أوي كدا في النظرية دي، لدرجة إن الناس تصدقها وتؤمن بيها، على الرغم من معارضتها لكل قواعد وأساسيات العلم الحديث اللي توصلنا إليه لحد عصرنا الحالي، وعلى الرغم من مئات الآلاف من الصور اللي التقطناها للكوكب من بره، واللي بتثبت إنه كوكب وكروي؟!
عشان تقدر تفهم الموضوع بأوضح شكل ممكن، خليني أشرحلك الأول النظرية بتقول إيه، وإيه المفهوم اللي بتطرحه لشكل الأرض الحقيقي المخالف للمعتقدات العلمية الحالية.
نظرية الأرض المسطحة
شوف يا صديقي، النظرية دي بتقولك إن الأرض دي مش كوكب أصلًا، بل شكلها الحقيقي عبارة عن قرص صخري مسطح ومدور، والشمس والقمر اللي بنشوفهم في السما دول، في الواقع عبارة عن أجسام كروية حجمها صغير جدًا، وأصغر من الأرض بكتير، وهما اللي بيلفوا فوق الأرض في شكل حلقي مدور، على ارتفاع بيوصل تقريبًا 4800 كيلومتر فوق سطح البحر.
طب والنجوم اللي في السما دي كلها؟!
النجوم دي يا سيدي بردو مش نجوم، بل عبارة عن أجسام صغيرة جدًا أقرب في حجمها إلى الصخور، بس الفرق إنها مضيئة، وبتلف مع الشمس والقمر بحركة دائرية فوق القرص الأرضي، بس على ارتفاع أقرب شوية من الشمس للقمر، بيوصل تقريبًا 4000 كيلومتر بس، والمنطقة اللي بتلف كل الأجسام دي جواها بقى بيسموها القبة السماوية، وبيعتبروها الحدود اللي قدر الإنسان يوصلها، وإن مفيش حد قدر يخرج منها لحد دلوقتي، وكل رحلات الفضاء دي عبارة عن تزوير.
مش بس كدا، دول بيقولوا كمان إن القطب الشمالي دا مش قطب موجود في شمال الأرض زي ما بيظهر على كل الخرايط اللي عندنا، بل في الواقع عبارة عن منطقة مدورة موجودة في مركز القرص الأرضي، والقطب الجنوبي عبارة عن جدار جليدي ضخم بيحاوط قرص الأرض كله من جميع الجوانب، وهو اللي بيمنع أي حد إنه يخرج بره الحدود بتاعتها!
عشان محدش يعرف بوجود السور دا، فالقطب الجنوبي لحد النهاردا مش مسموح للأشخاص الطبيعيين بزيارته، واللي بيزوره المؤسسات البحثية والحكومية بس، اللي زي ناسا ووكالة الفضاء الأوروبية وغيرهم، وفيه عليه حراسة مشددة عشان تمنع أي حد من اكتشاف السر!
طب ليه دا كله أصلًا؟! ليه يكدبوا علينا ويخبوا كل الموضوع دا؟ وهيستفيدوا إيه؟!
اقرأ أيضاً: كيف نبحث عن الحقيقة ونتأكد من صحة الأمر؟
سر الإدعاء بكروية الأرض
حسب السائد في كلام المؤمنين بالنظرية دي يا صديقي، فهما شايفين إن وجه الاستفادة من كل دا الفلوس الكتير جدًا اللي بتتدفع في رحلات الفضاء الوهمية، وإن في أسباب تانية مجهولة، لكنها بتتعلق بطبيعة الأراضي الموجودة بعد السور الجليدي دا، واللي موجود فيها أماكن ومخلوقات تانية إحنا منعرفش عنها أي حاجة!
الأغرب بقى من كل دا إنهم بيقولوا إن في بعض من أكبر القوى العظمى في العالم، زي بريطانيا وأمريكا والاتحاد السوفيتي، والأرجنتين وأستراليا وبلجيكا، وشيلي وفرنسا واليابان، ونيوزيلندا والنرويج وجنوب إفريقيا وغيرهم، وقعوا اتفاقية بالكلام دا سنة 1959، وإن كل البلاد دي بتشارك في مؤامرة واحدة كبيرة بتتعمل على العالم كله، عشان تقنعه بإن الأرض كوكب، لأغراض مجهولة!
طب هنا بقى خلينا نطرح سؤال، هل المؤامرة دي ممكن تكون حقيقية فعلًا؟! ويا ترى لو الأرض مسطحة فعلًا، هل قوانين الفيزياء والطبيعة هتفضل شغالة بنفس الطريقة اللي إحنا متعودين عليها؟!
الحقيقة يا صديقي إن الإجابة لأ، ولأ كبيرة كمان، وخليني أشرحلك ليه.
أدلة تدحض خرافة الأرض المسطحة
بص، مبدئيًا كدا، الأساس اللي بينفي تمامًا فكرة تسطح الأرض، هي الجاذبية نفسها! ودا عشان قوانين الجاذبية اللي أثبتناها رياضيًا من زمان، وممكن أي حد يقدر يتأكد منها بنفسه وبآلة حاسبة، دايمًا بتفرض على الأجسام الضخمة إنها تاخد شكل كروي، والسبب في دا إن الجاذبية قوة مركزية، بتشتغل من جميع الجوانب وبتشد جميع أطراف الجسم لجوة، عشان كدا هي بتفرض عليه إنه ياخد شكل مدور في الفضاء ثلاثي الأبعاد، يعني شكل كروي ببساطة.
ومستحيل على أي كوكب أو جسم ضخم إنه يبقى شكله مسطح، والحالة الوحيدة اللي ممكن فيها يوصل لكدا إنه يدور حوالين نفسه أو ينطلق في الفضاء بسرعة عالية جدًا أقرب لسرعة الضوء! ودا طبعًا مستحيل علميًا، والدليل على دا إن زمان الناس كانوا فاكرين إن الحلقات اللي حوالين كوكب زحل هي جسم واحد مسطح ومبطط، لحد ما العالم الفيزيائي العظيم (ماكسويل) أثبت في القرن الـ19 إنها عبارة عن ملايين من النيازك والكويكبات وذرات الغبار والثلج الصغيرة اللي بتدور حوالين الكوكب!
يعني معنى كدا إن عشان نقول إن في قطعة صخرية ضخمة زي القرص الأرضي مسطحة، فدا هيكون معناه إن الجاذبية دي مش موجودة أصلًا، وإن قوانين الجاذبية اللي بنستعملها من أيام نيوتن دي غلط ومش حقيقية، ودا طبعًا مستحيل، عشان هي بيعتمد عليها فهمنا لكل حاجة بتدور حوالينا في الطبيعة تقريبًا!
يعني مثلًا لو الجاذبية دي مش حقيقية أو قوانينها مزيفة ومش صحيحة، فمعنى كدا إن الغلاف الجوي المحيط بالأرض هو كمان مش حقيقي، ودا طبعًا مستحيل عشان الغلاف الجوي مثبت وأنت بنفسك عايش جواه وبتتنفس غاز الأكسجين اللي جواه، وهو اللي بيحميك وبيحمي جسمك من الأشعة الكونية والشمسية الضارة، اللي ممكن تسببلك حروق وسرطانات لو مكانش موجود!
دا غير إن الجاذبية هي العامل الأساسي اللي بيعتمد على وجوده حركة المد والجذر في البحار والمحيطات، وهي العامل اللي بيعتمد عليه وجود القمر وتكوينه حسب كل النظريات المعروفة لينا حاليًا، وهي الشيء اللي بيتسبب في وجود وتكوين القشرة الأرضية، وسبب إن العناصر التقيلة فيها بتنزل للمركز، والعناصر الأخف بتطلع فوقها وهكذا، لحد ما نوصل لأخف عناصر خالص اللي هي القشرة الأرضية اللي عايشين عليها.
لو الجاذبية دي مش موجودة أصلًا، فأثر دا على كوكبنا هيكون مرعب فعلًا! يعني مثلًا الطبقة السائلة من المعادن الثقيلة اللي بتحاوط المركز الصلب للكوكب، هي اللي بتكون المجال المغناطيسي للأرض، والمجال دا هو اللي بيحمي الكوكب من الرياح الشمسية اللي ممكن تدمر الغلاف الجوي بتاع الكوكب كله لو المجال المغناطيسي دا مش موجود! ودا اللي حصل زمان مع كوكب المريخ بالمناسبة، اللي فقد غلافه الجوي بسبب انهيار المجال المغناطيسي بتاعه، من أكتر من 4 مليار سنة فاتوا.
دا غير إن الصفائح التكتونية للأرض اللي هي سبب استقرار الكوكب، وبردو سبب الزلازل والبراكين الضخمة اللي بتفيد الطبيعة بأشكال كتير، مستحيل تكون موجودة بالشكل دا إلا لو كانت الأرض كروية الشكل! يعني لو جيت تحسب حركتها حسب المشاهدات الحقيقية اللي بتحصل حواليك، هتلاقي إن الحسابات الرياضية بتاعتها هتطلع كلها غلط لو تخيلت إن الأرض مسطحة.
الحاجة بقى اللي هتحسم كل دا، إن مستحيل الأرض تكون مسطحة، عشان في مئات ويمكن آلاف من العلماء والفيزيائيين على مر العصور اكتشافاتهم كلهم تراكمت على بعضها ووصلتنا للي إحنا نعرفه دلوقتي عن كروية الأرض، وهي اللي مكنتنا نطلع للفضاء.
فإزاي بقى ممكن تكون الأرض مسطحة ويطلع دا كله مؤامرة، رغم إنه مبنى على علوم وصلها واكتشفها العلماء دول كلهم في عصور مختلفة بعيدة عن بعض بمئات السنين، وكلهم ميعرفوش بعض ولا شافوا بعض حتى؟!
هو دا السؤال اللي أنا محتاجك تسأله لنفسك، وأنت هتوصل للحقيقة لوحدك.
اقرأ أيضاً: وكالة ناسا تعين علماء دين!
مصادر:
https://spaceplace.nasa.gov/planets-round/en/
https://www.livescience.com/flat-earth-weird-effects.html
https://www2.jpl.nasa.gov/saturn/back.html
https://www.astronomy.com/science/ask-astro-why-do-saturns-rings-look-solid-when-theyre-not/
https://science.howstuffworks.com/environmental/earth/geophysics/what-if-zero-gravity.htm
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
