ما هي الإشارات الغريبة الآتية من مركز المجرة؟
هو إيه الحدث الغريب اللي بيحصل في مركز المجرة بتاعتنا ده؟! إشارة راديو غريبة وغامضة، ومجهولة المصدر تمامًا بالنسبة لكل علوم الفلك الأرضية.
بقالها فترة بتتكرر وبتوصلنا من مكانٍ ما قريب من مركز المجرة بتاعتنا، اللي هي درب التبانة “Milky Way”!
طب إيه الحكاية بالضبط؟! كوباية شايك والنعناع الحلوة، وتعالى أحكيلك ❤☕
شبح راديو يصعب تفسيره
بص يا سيدي.. الإشارة دي بيسموها اسم طويل وغريب شوية هو ASKAP J173608.2-321635، بس عشان أنا مش عايزك تتعب، خلينا نسميها الشبح “The Ghost” اختصارًا.
المهم إن الإشارة دي تم التقاطها لأول مرة سنة 2019، بواسطة تليسكوب راديو أسترالي ضخم، اسمه “ASKAP”، وده كان جزء من مسح شامل للفضاء القريب من مركز مجرة درب التبانة، اسمه “VAST”.
الوظيفة الرئيسية للتليسكوب ده إنه بيدور على المصادر اللي بتطلع إشارات راديوية بتروح وبتيجي عشان يدرسها كويس، والمصادر دي في المعتاد بتبقى نجوم نابضة “Pulsars”، أو نجوم مغناطيسية “Magnetars”، أو انفجارات نجمية “Supernovae”، أو حتى عواصف شمسية “Solar Flares”، أو غيرهم من حاجات إحنا عارفينها كويس.
بس عارف المشكلة إيه؟!
المشكلة كانت إن إشارة الشبح دي لما تم التقاطها سنة 2019، مكانتش شبه أي حاجة تانية إحنا نعرفها في علوم الفلك! 😅
ليه؟!
إشارة فضائية غامضة تحير العلماء
عشان الإشارة دي كانت عشوائية وخصائصها غريبة جدًا، يعني بتروح وتيجي في فترات عشوائية تمامًا، وتم التقاطها تقريبا 17 مرة خلال فترة السنتين من ساعة ما تم اكتشافها.
مش بس كده، ده كمان الضوء اللي جاي منها بيبقى مستقطب أو زي ما بيسموه “polarized light”، وده شيء نادر جدًا جدًا في الكون لدرجة إنه بيحصل في كل واحد من وسط الآلاف من المصادر المجهولة، وفي المعتاد بيكون له تفسير، إلا في المرة دي!
ده حتى درجة السطوع بتاعت المصدر الغامض ده غريبة جدًا، إضاءتها وسطوعها بيزيد جامد وبعدين يقل، في فترات زمنية عشوائية تمامًا وغير ممكنة الحدوث بالشكل ده من جسم كوني طبيعي.
لدرجة إن ممكن السطوع يفضل شديد لمدة أسابيع كاملة، وبعدين يخفت في أقل من يوم! كإن في حد راكب ميكروباص وبيقلبلك نور. 😅
عايز أقولك إن الموضوع ده محير العلماء بتوع الفلك لدرجة إنهم سخروا كذا تليسكوب كامل للبحث عنها فقط، لإنها بتختفي وترجع تاني في فترات عشوائية تمامًا تخليك تشك في نفسك كإنك كنت بتهلوس!
آخر مرة لقطوها كان يوم 7 فبراير من سنة 2021، وبعدها مرة كمان في إبريل اللي فات!
مصدر إشارة الشبح
المشكلة إنهم لما بصوا على الداتا اللي عندهم من قبل 2019 من نفس التليسكوبات وفي نفس الأماكن عشان يشوفوا الإشارة دي ظهرت قبل كده ولا لأ، ملقوش ليها أثر، يعني هي ظهرت فجأة تقريبًا!
ده غريب فعلًا بالنسبة لمصدر كوني، لإن الأحداث الكونية دي مبتحصلش في يوم وليلة، وبالتالي كده الموضوع دخل في سكة مرعبة حبتين.
لو قلنا ان الإشارة دي جاية من مصدر إحنا نعرفه وحاولنا نقارنها بأقرب حاجات بتعمل إشارات قريبة منها، هتلاقي بردو إنها مختلفة.
يعني لو قلت إنها Solar Flares هتلاقي إنها ساطعة جدًا وعالية الطاقة أكتر بكتير من مجرد عواصف شمسية من نجم بعيد.
ولو قلت إنها جاية من نجم نابض أو Pulsar، فبردو هتلاقي إن النجوم النابضة بتردد إشاراتها في فترات زمنية مظبوطة زي الساعة، لدرجة إنها أدق من الساعات النووية، بس الإشارة الشبح دي عشوائية تمامًا وممكن تفضل شغالة لأسابيع قبل ما تطفي فجأة!
اقرأ أيضاً:
البانسبيرميا .. هل بدأت الحياة على كوكب الأرض؟
لغز الإشارات الواردة من الفضاء
طب لو نجم نابض مغناطيسي Magnetar؟! بردو لأ عشان دول المفروض بيطلعوا موجات من أشعة إكس X-Rays، وده مبيحصلش مع الإشارة الشبح المجهولة دي!
الحقيقة إن المصدر ده حسب كلام العلماء هو الوحيد من نوعه اللي تم رصده لحد دلوقتي في الكون كله، أو على الأقل في المناطق اللي درسناها منه.
مفيش أي شيء نعرفه ممكن يفسر لنا ماهيته أو هو عبارة عن إيه بالضبط! ولذلك فهو يظل شيء مجهول تمامًا بالنسبة لنا، والمجهول دايمًا مرعب زي ما أنت عارف.
فإنت رأيك إيه؟! تفتكر إيه المصدر الغريب اللي عايز يحظى باهتمامنا هنا على الأرض ده، وكل شوية يبعتلنا إشارات غريبة عشوائية وبعدين ينطفي تمامًا؟!
هل إشارة الشبح دليل على وجود حضارة فضائية؟
هل من الممكن إنه يكون مصدره من حضارة فضائية متقدمة، أو من بقايا تكنولوجيا متطورة ومجهولة المصدر موجودة هناك في مركز المجرة؟!
تفتكر فعلًا الموضوع ده ممكن يبقى أول احتكاك حقيقي لينا بمصدر تكنولوجي قادم من حضارة غير أرضية؟ طب هل ممكن يكون بوابة عبر الأبعاد بتودي لكون مختلف أو منطقة مختلفة من الكون بتاعنا، محدش لسه يعرف عنها أي حاجة؟!
ولا ممكن يكون له تفسير منطقي لسه لم يتم اكتشافه في علوم الفلك والفيزياء الكونية؟!
هسيبلك إنت الخيال والإجابة في الكومنتات تحت 👇، وكالعادة لو الموضوع عجبك، هفكرك إنك تعمل شير ومنشن لصحابك، وتحكيلهم عن المواضيع اللي بتقرأها هنا، الشير بيعبر عن دعمك ليا وللمحتوى، وبيساهم فعلًا في انتشاره لعدد أكبر من الناس، فمتبخلش به لو شايف المجهود يستحق.
المصادر
دي مصادر للموضوع 👇 ومساءك فل 😘
https://newatlas.com/space/strange-radio-signal-galactic-center-askap/
https://www.cnet.com/news/extraordinary-unknown-radio-signal-from-heart-of-milky-way-puzzles-astronomers/
#علام
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
