البانسبيرميا .. هل بدأت الحياة على كوكب الأرض؟
من تقريبا سنة فاتت، بعض العلماء اليابانيين قدروا يثبتوا حاجة غريبة ومدهشة، وممكن تذهلك لو فكرت فيها.
الحاجة دي إنهم أثبتوا بالدليل القاطع والتجربة العملية إن في بعض المخلوقات الميكروسكوبية زي الميكروبات والبكتيريا، بتقدر إنها تعيش في الفضاء لفترات طويلة للغاية.
ولو مش فاهم ده معناه إيه، فهو معناه كبير وعظيم، وممكن يحمل معاه إجابة لأسئلة كتير حيرت البشر منذ بدء التاريخ.
هات كوباية الشاي الجميلة والنعناع في إيدك، وتعالى بقى أسحلك معايا في الموضوع المذهل ده.
كيف بدأت الحياة على الأرض
بص يا عم مبدئيًا، تعالى أسألك سؤال غريب كده شوية.. تفتكر الحياة على كوكب الأرض بدأت إزاي؟!
وهل الكائنات الحية اللي على كوكبنا دي تكونت على الأرض فعلًا، ولا جت من السماء؟!
هل إحنا كمخلوقات بيولوجية متطورة وذكية، أصلنا بدأ على كوكب الأرض فعلًا، ولا إحنا اللي فضائيين وغرباء عن الكوكب؟!
إجابة السؤال ده مبقتش سهلة زي ما أنت فاكر، وسبب ده إن بناءً على بحث قام به علماء يابانيين السنة اللي فاتت، فهما اكتشفوا إن في نوع معين من البكتيريا بيقدر يعيش في الفضاء لفترة طويلة جدًا في ظروف لا تسمح بنجاة أي كائن حي.
قدرة بكتيريا الأرض على العيش في الفضاء
نوع البكتيريا ده إسمه Deinococcus radiodurans، واللي عمله الباحثين اليابانيين دول بالظبط هو إنهم بعتوا عينات من البكتيريا لمحطة الفضاء الدولية أو الـISS، وبعدين خلوا رواد الفضاء اللي هناك يطلعوها بره المحطة، ويحطوها جنب بعض في جزيئات صغيرة كده قطرها أقل من ملليمتر واحد، على ألواح من الألومنيوم ملزوقة على جدران المحطة من بره.
بعد كده في خلال 3 سنين، خدوا العينات دي مرة تانية وبعتوها للأرض عشان يدرسوها، فاللي اكتشفوه إن الطبقة الخارجية بس من البكتيريا هي اللي ماتت بسبب تأثير الأشعة فوق البنفسيجة Ultraviolet الضارة بتاعت الشمس، لكن اللي جوه فضلوا عايشين ومزدهرين!
مش بس كده، ده البكتيريا دي قدرت تصلح الـDNA بتاعها وتطوره، وكمان تنمو بشكل متزايد!
ده معناه بشكل مباشر إن مفيش أي حاجة تمنع إن يكون في أنواع معينة من البكتيريا موجودة في الكون، سواء مسافرة في الفضاء على النيازك أو الكويكبات، أو على سطح الكواكب الأخرى!
ده معناه إن صور الحياة في الكون ممكن تكون أغرب من ما إحنا متخيلين!
نظرية بانسبيرميا .. ما هو أصل الحياة؟
يا راجل ده في كائن ميكروسكوبي اسمه دب الماء أو التارديجريد Tardigrade، بيعيش في الطبيعي في الأماكن المبللة أو قيعان البرك أو البحيرات، تم تأكيد إنه بيقدر يعيش في الفضاء والفراغ بشكل دائم من غير أي مشاكل، وبيبقى في حالة زي البيات الشتوي كده.
مجرد ما بييجي عليه مية، بيصحى تاني ويمارس حياته بشكل طبيعي حتى لو بعد عشرات السنين!
ده طبعًا كان معناه المباشر إن ممكن الحياة تقدر تنتقل عادي بين الكواكب! والاسم العلمي اللي بيتم إطلاقه على الظاهرة دي هو البانسبيرميا Panspermia.
وهو بيعبر عن إمكانية انتقال الحياة عبر الكون من خلال الميكروبات العالقة في الشهب والنيازك والمذنبات والكويكبات، اللي تقدر تتحمل رحلات طويلة بشكل لا يصدق في الفضاء.
يعني على سبيل المثال، العلماء دول أثبتوا إن البكتيريا دي ممكن تتحمل رحلة طويلة للمريخ، بمنتهى السهولة، ولو وصلت على سطح المريخ، فهي هتقدر تعيش هناك عادي جدًا، وساعتها منقدرش نقول على المريخ إنه خالٍ من الحياة!
هل بدأ الإنسان الحياة على المريخ ثم انتقل إلى الأرض؟
الدراسة دي تم نشرها السنة اللي فاتت في شهر أغسطس، في مجلة The Frontiers in Microbiology العلمية الكبرى، بالتعاون مع وكالة الفضاء اليابانية JAXA، وتقدر تقراها وتطلع عليها بالكامل من اللينك ده:
https://bigthink.com/…/did-life-on-earth-start-in-space
واحد من الباحثين اللي شاركوا في الدراسة دي، اسمه أكيهيكو ياماجيشي Akihiko Yamagishi، من كلية الصيدلة وعلوم الحياة بجامعة طوكيو، قال إن بناءً على الدراسة دي، فإحنا مش عارفين الحياة بمفهومها العام والشامل –قبل ظهور الإنسان ككائن حي متطور– بدأت فين في الكون.
لو بدأت على الأرض، فهي ممكن جدًا تكون اتنقلت للمريخ بسهولة مع ضربات وتصادمات النيازك والكويكبات، اللي كانت بتحصل في بداية عمر الكوكب وبتقذف أجزاء منه ناحية الكواكب الأخرى.
بالمثل، لو الحياة بدأت على المريخ مثلًا، فهي ممكن جدًا تكون اتنقلت للأرض بنفس الطريقة، بمعنى إننا في الواقع ممكن نطلع مريخيين في الأصل!
المشكلة إن ده متوافق جدًا مع اللي إحنا نعرفه عن نشأة الكوكب بتاعنا، وبدايات المجموعة الشمسية.
اقرأ أيضاً:
الاصطدام الكارثي الذي شكل القمر وقتل الكوكب ثيا
يعني مثلًا، من تقريبا 4.5 مليار سنة كده، الفرضية العلمية المتوافق عليها لنشأة الأرض بتقولك إن كان في كوكب حجمه قريب من حجم كوكب المريخ، اسمه ثيا Theia، تصادم مع كوكب الأرض، والتصادم ده نتج عنه قذف أجزاء كبيرة من الكوكب للفضاء، وتكون بسببه القمر بتاعنا اللي بنشوفه في السماء!
الكلام ده حصل من 4.5 مليار سنة، بينما أقرب الحسابات المبنية على الدلائل العلمية لبدايات ظهور الحياة على كوكب الأرض، بتقول إنها بدأت من 4 مليار سنة، يعني الحياة بدأت في الظهور على الكوكب بعد نصف مليار سنة من الحدث الكوني الرهيب ده.
وطبعًا نص مليار سنة ده كلام فارغ بالنسبة للتطور البيولوجي الطبيعي لأشكال الحياة، ده غير إن أصلًا كوكب الأرض خد فترة طويلة عشان يهدى ويبرد تاني بعد التصادم العظيم مع الكوكب التاني ده.
يعني النص مليار سنة دول شيل منهم جزء كبير ضايع في الوصول للشكل الحالي بتاعه، فاشمعنى بعد الحدث ده بالذات بدأ الشكل البيولوجي الأول للحياة العضوية؟!
احتمال كبير لوجود حياة في الفضاء
هل ممكن يكون كوكب ثيا ده كان عليه أنواع من الميكروبات قدرت إنها تتنقل لكوكبنا مع التصادم اللي حصل ده؟!
طب هل ممكن يكون ده حصل بسبب تصادم النيازك والمذنبات بسطح كوكبنا في بداية تكونه؟!
هل ممكن تكون ظاهرة البانسبيرميا دي السبب في وجود الحياة العضوية اللي على كوكبنا دلوقتي؟!
الموضوع مثير ومشوق لو فكرت فيه، عشان معناه لو طلع صح، إن ممكن يكون حصل قبل كده كتير، وبالتالي ممكن تكون في كائنات حية تانية موجودة على كواكب تانية، مش شرط تكون ذكية زي البشر، بس على الأقل ممكن يكون في حياة ميكروسكوبية أو بكتيريا أو ما شابه.
أصل البشر ليس كوكب الأرض
وحتى لو فكرت في الموضوع من منظور ديني، هقولك إن مفيش ما يمنع.
حكايات بدايات الخلق في كل الأديان السماوية بما فيها الإسلام، بتقول إن الله سبحانه وتعالى نزل البشر على الأرض من الجنة بعد خطيئة آدم وحواء الأولى والأكل من الشجرة المحرمة.
يعني معنى كده إن البشر أصلًا مش من كوكب الأرض، بل تم وضعهم على كوكب الأرض في ظروف استثنائية.
فهل ده ممكن يكون صحيح فعلًا؟!
ولو طلع صح، يا ترى هيكون تأثيره إيه على النظرة بتاعتنا للكون ومسألة وجود حياة خارج حدود كوكب الأرض؟!
وإيه أثر ده بالتالي على المجتمع الإنساني كله، والنظرة البشرية اللي بننظرها لنفسنا على إننا جنس مميز ومفيش غيرنا في الكون؟
هو ده السؤال.. وأكيد إجابته لما نعرفها هتكون خارقة للعادة.
مصادر
https://bigthink.com/…/did-life-on-earth-start-in-space…
https://science.nasa.gov/…/how-did-life-begin-and…
https://www.voanews.com/…/study-provides-support-theory…
https://www.wired.com/…/a-ball-of-bacteria-survived…/
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
