خلّي بالك كويس لازم متلازمة رد الفعل

هو إحنا ممكن نعمل Code كده نلِم فيه كل الطرق المختصرة عشان تكون Influencer أو شخصية مشهورة على وسائل التواصل الاجتماعي:

مظاهر جنون الشهرة على السوشيال ميديا

– إنك تُخطب أو ترتبط بواحدة جميلة وتنشر ڤيديوهات معاها كل شوية، وتُقعدوا توهموا الناس بإن قد إيه الحياة وردية وجميلة، وإنهم هما إللي غلط وحياتهم العاطفيّة خربانة، وإن عشان يبقوا زيكم يعملوا زيكم.

– إنك تعمل مقلب في أهلك وأهل بيتك وتصوره، وكل يوم تعمل مقلب جديد وأهلك يتفاجأوا بقد إيه أنتَ شقي وحرام عليك يا أحمد، وأنتَ مجنون يا أحمد، وتكتب على الڤيديوهات: “عملت مقلب في بابا رميته بالجزمة، وشوف رد فعل بابا إيه؟”، مع إضافة صورة ليك بتوضح مدى شقاوتك.

تجاوزات لا تغتفر

– إنك تجيب أخوك الصغير وتصور معاه، وتعمل ڤيديوهات عن مدى ذكائك في مُقابل غبائه أو ضيق أفقه لأنه لسّه صغير، “شوفوا أخويا الصغير عبيط إزاي؟” وصورة ليك شقية برضه.

– مفيش حاجة من دول نافعة، هات واحد صاحبك واعملوا تحديات، تحداه إنك مثلًا إللي فيكم هياكل البلح بالنوى بتاعه هيكسب، وإللي مش هيقدر يخسر، وتعملوا أحكام شقية بقى كلها تهزيق وقلة قيمة في بعض.

– لو بنت أرقصي.

مشاهير بدون محتوى

– مفيش حاجة من دول لسّه جايبة، اعمل خير ومترميهوش البحر، صوره.

– كل ده لسّه مش جايب، اعمل ڤيديوهات دينية، أو من إللي بيسمّوها هادفة، واقعد انصح الناس يعملوا إيه في حياتهم وأنتَ لسه شنبك طالع امبارح، عادي يعني خبرتك في الحياة مقوية قلبك.

– طيب مفيش لسّه، اعمل ڤيديوهات عن البنات إللي بترقص، وقول ينفع كده يعني، وفين أهالي البنات دي، واعرض ڤيديوهاتهم بغرض التوعية يعني ومحدش يعمل زيهم وكده.

– لسه يا فقير المُتابعين، اشتري مُتابعين عادي يعني ما كله بيعمل كده.

– لو بنت ارقصي.

انتهاك الخصوصية

– خايف الناس تقابلك في الشارع تقولك يا ديوث أو إيه قلة الأدب دي والجو السخيف ده، اعمل ڤيديوهات عبارة عن أفلام قصيرة، وهات واحدة من إللي بيلبسوا عريان واكتب فوق: “خانت جوزها مع عشيقها شوف رد فعل الزوج”، وجُوّه الڤيديو اعمل أي حاجة عادي، وقول على نفسك ممثل وإن ده تمثيل.

– طيب مفيش لسّه، هتتعبني معاك شكلك، بُص اتجوز بقى خلاص، وصور ڤيديوهات مع مراتك في البيت ويكون العنوان مثلًا: “عملت الغدا مكرونة بشاميل وأنا مش بحبه، شوف رد فعلي كان إيه؟”، لازم مُتلازمة رد الفعل دي، خلّي بالك كويس.

مشهورون لكن فارغون

إللي يهمني يعني السوشيال ميديا بقت مستنقع حقيقي وممكن جدًا تجُر رجل أيّ حد لحافة الهاوية، سعيًا في الثراء السريع والشهرة المزيفة وبسبب عدم الرقابة من الأهل أو السُلطات، إللي المفروض يعني بتتعامل مع الشعب على إنه كبير وعاقل وله حريته الشخصية.

ده أصبح أو اتضح أنه غلط، أنتَ بكُل سهولة هتلاقي أعراض ناس كتير على الإنترنت وببلاش.

هتشوف قصص مزيفة كتير جدًا، هتسمع عن كذب ونفاق ومش هتشوف إلا إللي هُما عايزينك تشوفه.

هُما هيظهروا قدامك لابسين حلو وعايشين كويس، وعلى درجة عالية من التعليم، بس للأسف كل ده كذب ومش حقيقي.

حل مشكلة سوء استخدام وسائل التواصل الاجتماعي

حاربهم وتجاهل كل العبث ده، لا فيه ضحك ولا تسلية ولا أي شيء، انشُر الحاجات الكويسة وحاول تخليها هي إللي تنجح، ده هيخلّي ناس كتير عندها مواهب وإمكانيات حقيقية تقدر تفيدك بيها تاخد الخطوة وتتشجع وتملى السوشيال ميديا حاجات كويسة.

الصين عندها Tik Tok غير بتاعنا خالص، كله ڤيديوهات تعليمية وتثقيفية، كذلك الولايات المتحدة بتعادي الأبليكيشن ده.

ليه؟ لأن كل الڤيديوهات إللي مُوجهة ليهم رقص وهبل، بس ده ليه برضه؟

كيفية الاستفادة من الذكاء الاصطناعي لمحاربة المحتوى غير الهادف

بكل بساطة لأن الأبليكيشن شغال بالـAI، يعني أعمى مش بيشوف غير بيانات، الناس في المنطقة دي بينجذبوا لنوعية ڤيديوهات، يبقى نوجه لهم النوع ده من الڤيديوهات أكتر ونشجعهم عليها وهكذا.

كذلك باقي الأبليكيشن بتشتغل بالذكاء الاصطناعي ومفيش أيّ دخل لحد بيها.

الـAI بيشتغل كاستجابة للمجتمعات أو البيئة المنوطة باستخدام البرامج دي.

أنتَ هنا في الوطن العربي بتشجع التفاهة، نزودك الناس إللي بتقدم التفاهة، أنا كبرنامج أهم حاجة عندي تُقعد أنتَ عندي على البرنامج وقت أطول عشان أعرض لك إعلانات أكتر.

أنتَ بوصلة العالم إللي حواليك، بس أنتَ مستصغر الأمور

اقرأ أيضاً:

سوءات المجتمع على تطبيق التيك توك

المحتوى العربي وهوس الشهرة

 خطورة وسائل التواصل على الأفراد

* تنويه: الأفكار المذكورة في المقال لا تعبر بالضرورة عن رأي الموقع.

*************

لمتابعة قناة اليوتيوب لأكاديمية بالعقل نبدأ، اضغط هنا

لقراءة المزيد من المقالات، اضغط هنا