ملاجئ يوم القيامة!
في الوقت اللي إنت بتقرأ فيه السطور دي، في شركات كبيرة في العالم بتبني مخابئ نووية تحت الأرض بيسموها مخابئ يوم القيامة، والمخابئ دي بيتم تجهيزها بكل وسايل الحياة والراحة عشان تكون بيوت لمجموعة صغيرة من أغنى أغنياء الكوكب، يهربوا فيها من نهاية العالم!
كوباية شايك الحلوة والنعناع في إيدك، وتعالى أحكيلك قصة غريبة شويتين ومخيفة، عن المستقبل المحتمل للمجتمع والحياة على الأرض!
مخابئ الأثرياء حال تدمير الأرض
بص يا سيدي.. في شهر سبتمبر من سنة 2022، الإعلامي وخبير التكنولوجيا والمستقبليات الأمريكي دوجلاس راشكوف (Douglas Rushkoff) أصدر كتاب اسمه (Survival of the Richest)، الكتاب ده اتكلم فيه عن إنه في يوم من الأيام جتله دعوة لإنه يروح في زيارة سرية يقابل فيها بعض من أغنى أغنياء العالم، عشان عايزين ياخدوا رأيه في استفسار يتعلق بالتكنولوجيا ومستقبل الأرض.
بس اللي مكانش مخططله دوجلاس إنه الناس دول كانوا هيوجهوا له أسئلة مرعبة وأغرب من اللي هو كان متوقعه تمامًا.
لما دوجلاس نزل من طيارته عشان يروح يقابل الناس دول، كانت مستنياه عربية في المطار، وبدل ما توديه على مكان المقابلة في فندق أو مطعم، العربية خدته لمكان في وسط الصحراء، مبنى فيه مخبأ عملاق تحت الأرض.
المخبأ ده كان متجهز بكل المؤن والمعدات اللازمة لأي شخص عشان يعيش لفترة طويلة لوحده في معزل عن العالم واللي بيدور فيه، ولما دوجلاس قابل مجموعة رجال الأعمال اللي كان رايح يقابلهم دول، اتضح له إن بينهم كان في 2 مليارديرات مشهورين ومعروفين، بس مقالش أساميهم.
الأسئلة اللي اتوجهتله هناك كانت كلها متعلقة بإيه اللي هما محتاجين يعملوه عشان يقدروا يحافظوا على حياتهم في قلب المخابئ النووية دي لو حصلت أي كارثة أدت إلى نهاية العالم، وكمان إزاي يقدروا يأمنوها ضد أي ثورات أو تمردات من فرق الأمن اللي بتحميهم!
ملاجئ 5 نجوم للمليارديرات
الحقيقة بقى واللي مش كتير يعرفوه إن فكرة مخابئ يوم القيامة دي مش منتشرة ما بين الأغنياء بس، بل في شركات كتير بتشتغل عليها وبتبنيها حسب الطلب لأي حد حرفيًا، والشركات دي أشهرها في العالم شركة (Vivos) و(Rising S)، وسعر تكلفة بناء مخابئهم بيبدأ من 35 ألف و40 ألف دولار وأنت طالع، لحد أكتر من 8 مليون دولار!
المخابئ دي بقى بتبقى مبنية على كذا دور تحت الأرض، ومتزودة بتجهيزات 5 نجوم حرفيًا، وجواها كل حاجة ممكن تحتاجها أو توحشك على سطح الكوكب، يعني فيها مثلًا غرف نوم وأسانسيرات، وجزء منها جواه غرف ترفيهية وحمامات سباحة وغرف ساونا ومسارح وسينمات وميادين رماية وصالات بولينج!
معظم المخابئ دي بتبقى متصممة عشان تشيل جواها تقريبًا 40 أو 50 شخص، بيكونوا في المعتاد من السياسيين أو مشاهير الفن أو الرياضة، وبعض من المشاهير اللي اشتروا مخابئ زي دي بيل جيتس وكيم كارداشيان وتوم كروز، وحتى الرئيس الأمريكي السابق دونالد ترامب نفسه.
قصور سرية ومؤمنة تحت الأرض
لكن بعض المخابئ دي ممكن يوصل حجمها وضخامتها لإنها تشيل جواها مئات ويمكن آلاف من الناس، وسعرها ممكن يوصل لأكتر من 14 مليون دولار كاملين، والمخابئ دي في المعتاد بتكون جزء من خطط إنقاذ الحكومات في حالة حدوث حرب نووية!
الفكرة بقى إن المخابئ دي بدأت تنتشر جدًا في الفترة الأخيرة، وخصوصًا في أمريكا وأوروبا، بعد الغزو الروسي لأوكرانيا، وتوقع خبراء كتير إن ده ممكن يؤدي إلى قيام حرب نووية، عشان كده ناس كتير حاليًا بدأوا يستثمروا بشكل جاد في المخابئ دي وبيحجزوا أماكن فيها ليهم ولعائلاتهم!
حسب كلام دوجلاس راشكوف في كتابه، فالحرب النووية مش هي الحاجة الوحيدة اللي ممكن تتسبب في نهاية الحياة على سطح الأرض، بل في كوارث طبيعية وكونية كتير ممكن تسبب حاجة زي دي في المستقبل، زي الاحتباس الحراري والتغير المناخي أو تصادمات النيازك والكويكبات، أو حتى الأمراض والأوبئة المقاومة للأدوية واللقاحات.
الأمنون من جحيم الحرب
جزء كبير من رجال الأعمال وأغنياء العالم دلوقتي، بيدوروا بكل الطرق على وسيلة تحميهم وتضمنلهم إنهم يفضلوا عايشين للأبد، زي جيف بيزوس مؤسس أمازون وبيتر ثيل (Peter Thiel) مؤسس بالانتير (Palantir)، اللي بيستثمروا في شركات بتحاول تعكس مسار الشيخوخة وترجع البشر للشباب.
ده غير إيلون ماسك صاحب تسلا وسبيس إكس اللي عنده خطة لبناء مستعمرات على المريخ والخروج تمامًا من الأرض، ومارك زوكربيرج مؤسس فيسبوك أو ميتا، اللي بيخطط في المستقبل لنقل التواصل الاجتماعي ما بين البشر لعالم الميتافيرس، عشان نعيش كلنا في عالم افتراضي ونهرب من الواقع تمامًا!
هل هي الملاذ الأخير؟
رجال الأعمال والأغنياء دلوقتي في العالم كله، بيحاولوا يهربوا من الواقع اللي إحنا عايشين فيه، ويسيبوا سطح الأرض كلها بكل المشاكل والكوارث البيئية اللي بتهددها في المستقبل لينا إحنا نتعامل معاها مع نفسنا!
بعد ما كانوا زمان بيتكلموا عن تطور التكنولوجيا في المستقبل وقد إيه هتقدر تفيد المجتمع البشري كله، بقوا دلوقتي بيتسابقوا ما بينهم وبين بعض على إنهم يعزلوا نفسهم عن الواقع وعن باقي البشر، ويلاقوا مهرب بعيد عن كل الكوارث اللي هما متأكدين إنها جاية دي! وواحدة من أهم الوسايل اللي بيحاولوا بيها ضمان مستقبلهم هي المخابئ دي!
تفتكر إنت في حد من الناس دول يقدر يتحكم في مصيره، ويهرب من أي كارثة ممكن تواجه الأرض والجنس البشري في المستقبل عن طريق إنه يشتري مستقبله في ملاجئ يوم القيامة دي؟! ولا القدر ممكن يكون له رأي تاني؟!
الإجابة هسيبها ليك إنت.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
