جوازة تغير تاريخ العالم
بلدين صغيرين كده جمب بعض، العائلات الكبيرة اللي فيها عمالين يتخانقوا ويقتلوا في بعض بقالهم سنين وعايشين في قحط وفقر وخلافات مبتخلصش.
بنت صغيرة كيوت كده من البلد الأولى عندها ١٨ سنة أخوها حابسها وبيتنمر عليها وبيعاملها وحش وعايز يخلص منها ويجوزها، وهيا عمالة ترفض في العرسان اللي أخوها بيجيبهم لها.
ابن عمها من البلد التانية مراهق شاب عنده ١٧ سنة بس وأصغر منها، البنت وافقت إنها تتجوز ابن عمها ده، بس عشان تتخلص من زن أخوها الكبير عليها، وجواز ولاد العم مكنش شرعي في ثقافة البلدين دول، فزوروا عقود ووثائق عشان الجوازة تتم،
ومكنش معاهم فلوس يعملوا فرح ولا يجيبوا فوتوغرافر ولا ميكاب أرتيست، فعملوا الفرح على الضيق كده واتجوزوا، قصة عادية بتحصل في كل قرية في العالم عادي، إيه بقى اللي مش عادي في الجوازة دي؟
بسبب الجوازة دي حصل الآتي:
- البلدين الصغيرين اللي على الأطراف دول، اللي كانوا نازلين دب في بعض وقتل وحروب أهلية وصراع على الحكم، لدرجة إن ممكن أميرين يحكموا شارع هناك مثلا، توحدوا لأول مرة في التاريخ، عشان يعملوا مملكة قوية بيحكموها سوا، البلدين دول هما مملكة أراجون ومملكة قشتالة، بالإضافة لمملكة صقلية وليون والبلاد والمقاطعات اللي تبعهم.
- قدرت البنت دي بعد حرب كبيرة إنها تبقا ملكة متوجة هي وجوزها، بعد ما أخوها الكبير اللي كان حابسها الحاكم وقتها “إنريكيه العقيم”، ومرضاش يخليها وريثته في الحكم، وادعى إنه ليه بنت خلفها اسمها “خوانا”، وخلاها وريثته رخامة كده، وهو كان في الحقيقة عقيم، دخلت مع جوزها في حرب كبيرة ضد النبلاء وضد خوانا وضد ملك البرتغال انتهت بانتصارهم سوا.
- قدروا إنهم يقضوا على البلد القوية الوحيدة اللي كانت على حدودهم، جنة الله في الأرض اللي خرجت شعراء وعلماء وخلافه، اللي بقالها مئات الأعوام محدش كان عارف يخشها، ويحتلوا كامل المنطقة تحت حكمهم هما بس بعد ما كان مستحيل حد يفكر فيها أساسا، آخر إمارات المسلمين في شبة الجزيرة الأيبيرية “مملكة غرناطة” وبنو الأحمر.
إجبار المسلمين على دينهم وإنشاء محاكم التفتيش:
- أجبروا المسلمين على الكاثوليكية أو الطرد، مع الاستيلاء على قصر الحمراء العربي، وتحويل المساجد إلى كنائس، وتسببوا في خروج الملايين من المسلمين وغير المسيحيين من الأراضي اللي احتلوها في ظروف قاسية، ويستولوا على ممتلكاتهم وأموالهم وبيوتهم، عشان يموت في السكة الآلاف وهما في طريقهم إلى شمال إفريقيا لاجئين مطرودين.
- أنشأوا “محاكم التفتيش” وهم أصحاب الفكرة والبداية من عندهم، وفتحوا باب للعنصرية الدينية، اللي بدورها هتضطهد الموريسكيين “مسلمي إسبانيا”، اللي فضلوا عايشين في البلد كأنهم كاثوليك ومخبيين إسلامهم، وبقى يا تعيش كاثوليكي يا هتتقفش صايم ولا بتصلي ولا بتعطس وتقول الحمد لله فتتعرض للسجن والتعذيب الشديد لحد الموت.
- نسلهم حكموا أوروبا كلها، هما خلفوا في حياتهم أربع بنات وولد، جوزتهم كلهم جوازات سياسية وهما صغيرين عشان تضمن ولاء حكام أوروبا ليها، فبناتها اتجوزوا من أولاد الإمبراطور الروماني المقدس، وملك البرتغال، وابن ملك إنجلترا، اللي بعد كده هيبقوا ملوك وأحفادهم ملوك في عصورهم كأول اتحاد أوروبي معروف في التاريخ، اللي من سلالتهم دلوقتي ملكة إنجلترا على سبيل المثال.
إلغاء كل اللغات عدا لغة البلد الأصلية والسبب في سنوات من الاحتلال:
- لغت كل اللغات الدارجة في الأراضي التابعة لهم زي العربي وسائر اللهجات واللغات، وفي المقابل نشرت لغة بلدها الأصلية اللي هيا القشتالية، وعملت معجم خاص باللغة دي عممته على كل الأراضي التابعة ليها، اللي بعد كده هتكون اللغة دي هي اللغة الإسبانية الحالية.
- اكتشفت القارة الأمريكية، في وقت ما كان الناس فاكرة إن مفيش أراضي في الناحية التانية للمحيط الأطلسي وإن آخرها بحر وبعدين بلاد الهند، وده بعد ما دعمت البحار الإيطالي “كريستوفر كولومبوس” في أربع رحلات بحرية بالفلوس والرجالة والسفن، في وقت محدش كان راضي إنه يوافق على الرحلات دي لا في جنوة ولا البرتغال ولا إنجلترا.
- السبب في سنوات من الاحتلال الأوروبي للأمريكتين عشان تشكل ما يعرف بالولايات المتحدة الامريكية في وقتنا الحالي، وتمهيد للقضاء على شعب أمريكا الأصلي وحضارته وتاريخه، مع استعباده وسرقة موارده الطبيعية زي مناجم الدهب مثلا، وإقامة مستوطنات هناك وهجرات إسبانية على حساب السكان الأصليين، وموت الآلاف من الهنود الحمر تحت العبودية والسخرة والتعذيب.
- الزوجين دول يبقوا “فيرناندو الثاني” ملك آراجون، و”إيزابيلا الأولى” ملكة قشتالة.
تخيل جوازة بس، اتنين قرايب بيتجوزوا عادي، جوازهم ده يقدر يغير تاريخ العالم للأبد!!
اقرأ أيضاً:
من عصورنا المظلمة إلى سنة عشرة آلاف!
* تنويه: الأفكار المذكورة في المقال لا تعبر بالضرورة عن رأي الموقع.
********
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
