فن وأدب - مقالاتمقالات

مشاوير

مشاوير

بين اللي جاي

واللي فات

بيشدني التفكير

حكايات كتير

بتقاسمني

صحوي ومنامي

وخيوط كلامي

بتغزل

م الألم فوازير

ياتوهة المشاوبر

في تزوير المناسك

العمر ماسك راسه

والتفكير صداع

أوضاع كتير اتغيرت

واتبدلت أحوال

وعادات أصيلة اتدمرت

وعشان تعود أبدا محال

وصفات جميلة اتكسرت

على صخرة الإهمال

والشر مال ع الخير

وطير الظلم فاع

ضاع اللي ضاع

والخداع

بيلغ في التبذير

والغش والملعنة

والهيمنة طوابير

والبير شرق م البلا

والمهزلة طواحين

نبض الحنين اتوأد

جوة الولد والبت

بيفت فينا الأنين

طول السنين ويهت

ويلت في نبضنا

ويهد في الوجدان

قلب الزمان اشتكى

من كتر ما تعبناه

طول عليه البكا

والآه تجر الآه

وضياه خلاص انطفى

لما اختفى الإخلاص

ومافيش خلاص م الوجع

طول م البدع أرغول

بيغني سيكا وصبا

وفي دمنا مغلول

وطبول آسانا بتدوي

في الفصول وترن

بتزن فينا المبادئ

في النهار والليل

واحنا

في جوف المهازل

قهرنا بيسيل

المستحيل عقدنا

والعجز خلخالنا

ودخلنا بين الشقوق

ووصلنا للأدغال

ذل السؤال مصنا

وحياتنا جبانة

خللى قلوب طيبة

تايهة وعميانة

خللى العزاب والمهانة

والعدم أسباب

على كل باب خبطوا

وسقونا م المعاناة

شمع الشباب انطفى

والحلم منهم تاه

يا ألف حسرة وندم

ع اللي العدم سواه

وكواه بنار الضنا

طرح المرار جواه

ورماه بسهم الآنا

والمسكنة واليأس

والبؤس حطم معاني

العدل والإنصاف

مابين حدود الجفاف

بورنا محاصرنا

ومصيرنا هز الكتاف

حالف ما ينصرنا

وعصرنا طول التمني

والتدني مطاف

تحت اللحاف الغرور

بعرقنا مدفي

والانحراف الغبي

جوانا متخفي

بيشفي لحم الشهامة

والشرف والعز

ويهز قلب المدى

ويدمر الأعراف

عراف خيالي

هيفتح مندلة وبيبوح

يعدل مقام كلمتي

ويرد فيا الروح

ويفوح عبير اللي عدا

حب ومودة

وفي كل شدة

تاخدني فرحتي وتروح

تقفل جروح العتاب

وتداوي أناتي

وتعيد ملامح

جمال الماضي للآتي

تعزف ناياتي

على وتر القريب والخل

وارتاح في ضل الوفا

بين أهلي وأخواتي

يامغنواتى الزمان

صحي القانون والعود

وامحي بنود المبالي

خللي الليالي تعود

وتشوف عيون الوجود

الحب مالينا

والود فينا معاني

سحرها مرصود

* تنويه: الأفكار المذكورة في المقال لا تعبر بالضرورة عن رأي الموقع.

اقرأ أيضاً:

أمجاد

إنسان اللذة والهروب من الألم

حوار مع أنا!

اظهر المزيد

عبد الله محمد الهادي عبده بخيت

عقيد متقاعد بالقوات ( الجويه ) من ابطال ملحمة العبور أكتوبر 1973 عضو إتحاد كتاب مصر عضو مجلس إدارة اتحاد كتاب مصر فرع الشرقية والقناة وسيناء عضو جمعية الأدباء فرع القاهرة رئيس نادى أدباء التل الكبير

مقالات ذات صلة

شاهد أيضاً
إغلاق
زر الذهاب إلى الأعلى