أمجاد
بعد السنين
إللى ملتنا جفاف
ومرارها عتم
كل شيئ ينشاف
عبينا مدفع
صبرنا اصرار
دار الصمود
واتحرك المقداف
بإيدينا دوسنا
ع الزناد ونادينا
إحنا بدينا
حرب الاستنزاف
خضرنا بورنا
بعزمنا وناورنا
وفتحنا نارنا
وانفجر إعصارنا
شط القنال
واقف وبيصورنا
حافظ صورنا
والرغيف الحاف
اوصاف سباتنا
زودت نسبتنا
وبلعنا ريقنا
بعد طول كسرتنا
وطبول سيرتنا
دقها متوالى
وصداها عالى
في الليالى طاف
شق الهتاف
قلب الفضا يارياض
يارمز غالى
وقلب كلة بياض
زاد انتفاض
النبض جوة عروقنا
دمع البنادق
والخنادق فاض
مشهد زفافك
للخلود متسطر
الدم سايل
والجنود بتكبر
الله اكبر
والتفانى مخاض
اعراض أسانا
راح يزيدنا طموح
من غير خلاف
هنطيب المجروح
يا بن الوطن
ياللى وهبت الروح
صدر النعيم
فى الجنة ليك مفتوح
اسمك هيفضل
فى القلوب دقات
زهرة شبابك
فى التاريخ هتفوح
لوح الزمن سطرك
والمجد سمى عليك
داخل مـدار الفـدا
وقف المـدى يرقيك
زاحت إيديك المرار
والتارعيار ودليل
النيـل سـقاك التفـانى
والـوفا مراسيك
سبل عينيك الوطن
على قبلة الأحرار
والارض شمـت عبيـرك
فتَّـح النوار
عليت فنـار الشرف
كتب النهار اشـعار
ضى النهار كرمك
قـام الفخار يكسيك
معانيك علامـة
وسيرتك غصنها مداد
والصـورة متزوقة
ومشقشقة أمجاد
تسـلم يمين
اللى قاد الشمع للأحفاد
ضحى بروحة
وسلم للجهاد نواصية
بغـروبة فتـَّـح
شروق العـزة وغازلنا
ولبسنـا تـوب العـزيمة
هـب زلـزالنا
ونزلنا بحرالصمود
والجود ومازلنا
ندهة علمنا إمامنا
ونبضنا مساعية
يـاللى فديت الوطن
والله ما نسيتـك
ماأنـا اللى شلتـك
وسبلتـك وغطيتك
صوتك ملانى حياة
والصورة ملالية
والسـيرة حيـة
وجنـات النعـيم بيتك
يا أم الشهيد
الحى ما تبكيش
ابنك فى جنة ربنا
ها يعيش
ما تسلميش
لليأس والأحزان
وما تدفنيش
العمر جوة النوح
* تنويه: الأفكار المذكورة في المقال لا تعبر بالضرورة عن رأي الموقع.
اقرأ أيضاً:
بورسعيد في الأغنية الوطنية وإحياء روح الانتماء
