أسطورة الكوكب X .. هل هي حقيقة أم خيال؟
تفتكر ممكن فعلًا يطلع في كوكب مجهول وغير مكتشف في مجموعتنا الشمسية، هو المسؤول عن أحداث الانقراض الجماعي ودمار الحضارات اللي بتحصل دوريًا بمعدل مرة كل عشرات الملايين من السنين على كوكب الأرض؟!
هل الكوكب ده ممكن يكون سبب فناء حضارتنا في المستقبل البعيد؟
النهارده تعالى معايا نتكلم مع بعض عن موضوع غريب شويتين، وممكن يختبر معتقداتك وكل اللي أنت فاكر إنك كنت تعرفه عن العالم وعن التاريخ السحيق غير المكتشف وغير المعروف لكوكب الأرض، اللي سبق وجود الإنسان نفسه.
بس قبل ما نبدأ أنا بحذرك، لإن اللي أنت على وشك إنك تقرأه ده ممكن يكون صادم بالنسبة لك.
ممكن يغير تفكيرك تمامًا في مسائل أنت طول عمرك بتعتبرها من المسلّمات.
حاول تخلي دماغك مفتحة وشيل منها أي قناعات مسبقة عشان تقدر تستوعب الكلام اللي جاي ده كويس.
هات كوباية الشاي الحلوة والنعناع في إيدك، ويلا بينا.
إحتمالية وجود كوكب خفي في مجموعتنا الشمسية
بص يا سيدي.. الموضوع كله بدأ في شهر يناير من سنة 2016، لما طلع علماء من مؤسسة كاليفورنيا للعلوم والتكنولوجيا أو كالتك (Caltech)، وباحثين فلكيين كبار ليهم اسمهم، هما مايكل براون (Michael Brown)، وكونستانتين باتيجين (Konstantin Batygin)، ونشروا بحث بيقول إنهم لقوا أدلة حقيقية على وجود كوكب مجهول في المجموعة الشمسية، لسه محدش اكتشفه خالص، واسمه كوكب إكس أو (Planet X)!
الكوكب ده –حسب افتراضاتهم– كتلته قد كوكب الأرض تقريبًا 10 مرات، وموجود على بعد سحيق من الشمس يقدر بنحو 400 وحدة فلكية أو AU، أو ما يعادل 2.8 مليار ميل من الشمس.
عشان بس تقدر تتخيل المسافة، بلوتو يبعد عن كوكب الأرض مسافة 40 وحدة فلكية فقط!
الوحدة الفلكية دي معناها هو متوسط المسافة ما بين الأرض للشمس، يعني كل وحدة فلكية واحدة بنتكلم عنها، معناها هو مسافة تساوي نفس المسافة اللي موجودة ما بيننا وبين الشمس.
المبهر بقى في افتراضاتهم، هو إن بسبب بعد الكوكب السحيق ده عن الشمس، فهو مفيش نور بيوصله تقريبًا، وعشان كده محدش قادر يكتشفه بسهولة.
كمان حسب الحسابات اللي عملوها، فهو بيتم دورة كاملة حوالين الشمس ما بين كل 10 آلاف لـ20 ألف سنة تقريبًا!
طب إزاي ممكن يكون في كوكب زي ده في مجموعتنا الشمسية؟ وإيه الأدلة على وجوده؟!
أدلة على وجود الكوكب إكس
الأدلة دي يا صديقي جاية من إنهم لقوا بعض الكويكبات اللي موجودة في منطقة اسمها حزام كويبر (Kuiper)، متجمعة مع بعضها أو (Clustered Together) بمصطلح فلكي، بشكل لا يمكن أن ينتج إلا عن تأثير جاذبية كوكب ضخم موقعه بعد كوكب نبتون.
حزام كويبر ده لو أنت متعرفوش هو حزام عظيم من الكويكبات، موقعه بعد كوكب نبتون بالظبط، وحجمه شديد الضخامة.
يعني هو قد حزام الكويكبات اللي بين المريخ والمشتري تقريبًا ما بين 20 إلى 200 مرة!
قبل ما تسأل، تأثير الكوكب الافتراضي اللي بعد نبتون ده، مش ممكن أبدًا يكون ناتج عن كوكب بلوتو.
عشان أولًا بلوتو صغير جدًا جدًا على إنه يقدر يعمل التأثير اللي همه رصدوه في حزام الكويكبات بتاع كويبر ده.
ثانيًا، أصلًا بلوتو تم إزالته من قائمة كواكب المجموعة الشمسية بسبب اكتشافات العالم مايكل براون اللي خلت الكوكب ينزل لمرتبة كوكب قزم (Dwarf Planet) سنة 2006.
ده نفسه العالم مايكل براون اللي عمل الورقة العلمية اللي بتفترض وجود كوكب إكس!
الكوكب إكس فكرة تحولت لواقع مدمر
بس الفكرة بقى إن الكوكب ده لو صح وجوده، فهو مش هيكون مجرد اكتشاف مبهر شويتين وخلاص.
بل هو ممكن يأثر فعليًا على الطريقة اللي بنفكر بيها في تاريخ كوكب الأرض كله، والسبب في ده مقبض، ومرعب.
السبب يا صديقي هو إن في بعض العلماء والخبراء الفلكيين بيقولوا إن الكوكب ده هو المسؤول عن حوادث الانقراض الجماعي اللي بتحصل بمعدل كل فترة من العمر الجيولوجي للأرض.
هو مثلًا المسؤول عن الكويكب الضخم اللي صدم الأرض جنب سواحل المكسيك في خليج اليوكاتان (Yucatan Peninsula) من 66 مليون سنة تقريبًا، فيما يعرف باسم صدمة تشيكسولوب (Chixulub impact)، وكان سبب في فناء الديناصورات!
طب إزاي ده ممكن يحصل؟! وإيه علاقة الكوكب ده بالكويكبات اللي بتصطدم بالأرض؟!
العلماء يكشفون سبب القضاء على الديناصورات بعد اصطدام الكويكب
الإجابة هتصدمك، لإن الحقيقة إن الكوكب الافتراضي ده مع مداره الطويل والضخم جدًا، اللي بياخده لأبعاد سحيقة حرفيًا في الفضاء، المفروض إنه بيمر من خلال أطراف النظام الشمسي نفسه.
المشكلة إن على حافة النظام الشمسي بتاعنا ده، في سحابة عملاقة من الكويكبات والمذنبات موجودة حوالينا، اسمها سحابة أورت Oort Cloud.
لما الكوكب ده بقى بيعدي من وسط السحابة العملاقة دي، بيسبب بمجال جاذبيته العملاق إن كويكبات ضخمة بيتم قذفها نحو الكواكب الداخلية في النظام الشمسي، لحد ما بيوصلوا لحد عندنا هنا على الأرض، وبيتسببوا في تدمير سطح الكوكب كله، وانقراض أي أجناس حية تعيش عليه!
ده اللي حصل وقت الديناصورات، وحصل في أوقات تانية كتير من التاريخ السحيق للأرض، اللي محدش يعرفه ولا يسمع عنه لإنه سبق وجود الإنسان نفسه.
كل اللي عرّفنا إنه حصل هو الأدلة اللي بنلاقيها في الطبقات الجيولوجية من قشرة الكوكب.
هل الكوكب إكس موجود أم محض خيال؟
طب تفتكر أنت ممكن الافتراض ده يكون حقيقي فعلًا؟! وتفتكر ممكن يكون في أدلة على حاجة زي كده، من التاريخ التراثي للشعوب القديمة اللي عاشت على الأرض في أزمنة سحيقة من التاريخ؟!
من هنا بقى يا صديقي القصة بتصبح أكثر إثارة.
سنة 1976، جه عالم لغات غريب الأطوار اسمه زكريا سيتشين (Zecharia Sitchin)، وأصدر كتاب لف العالم كله كالعاصفة، وسبب قلبان كبير جدًا في الأوساط البحثية والتاريخية.
الكتاب ده كان اسمه الكوكب الثاني عشر (The Twelfth Planet)، وحسب كلام سيتشين، المحتوى بتاع الكتاب كان مبني على ترجمة خاصة قام بيها لألواح أثرية يعود أصلها للحضارة السومرية، اللي هي حضارة بلاد ما بين النهرين (Mesopotamia) قديمًا أو العراق حاليًا.
الترجمة بتاعته دي بقى، والمحتوى اللي في الكتاب كان بيقول حاجات غريبة ومبهرة لدرجة الخيال العلمي!
اللي قاله سيتشن في الكتاب هو إن في كوكب عاشر غير معروف بالنسبة لنا في المجموعة الشمسية، اسمه كوكب (نيبيرو Nibiru).
اقرأ أيضاً: البانسبيرميا .. هل بدأت الحياة على كوكب الأرض؟
تعرف على: الرجل الذي نسيه الروس في الفضاء
اقرأ أيضاً: هل لديك أي طلبات أخرى قبل النهاية؟!
سكان كوكب نيبيرو
الكوكب ده بيسكنه جنس من الكائنات الفضائية اللي شكلها قريب جدًا من البشر، سمهم جنس الأنوناكي (Annunaki).
الأنوناكي دول يا سيدي هما نفسهم اللي بعض كتب المذاهب المسيحية بتوصفهم بالـنيفيلم (Nephilim)، ودول في الإنجيل هما عبارة عن ملائكة ساقطين من الجنة للأرض.
ليهم ذكر في مواضع كتير من كتب المذاهب المختلفة للإنجيل والتوراة، بس اللي يهمنا هنا هو تفسير زكريا سيتشن اللي بنتكلم عنه ده.
اللي قاله سيتشن هو إن جنس الأنوناكي دول سافروا من كوكبهم وجم على كوكب الأرض، عشان كانوا بيدوروا على الذهب وبعض المعادن الأخرى على كوكبنا.
عشان عايزين ينقلوها للكوكب بتاعهم لإن الغلاف الجوي بتاعه كان مهدد بالدمار، وهما محتاجين المعادن دي عشان يقدروا يصلحوه بتفاعلات كيميائية معينة.
أسطورة الأنوناكي
اللي حصل بعدها هو إن الجنس القديم دول لما جم للأرض في سفنهم الفضائية، قابلوا أجناس قديمة من البشر البدائيين اللي مكانوش بشكل وذكاء البشر الحالي.
عشان هما كائنات فضائية مرفهة ومتقدمة جدًا، قرروا إنهم يدمجوا الحمض النووي بتاعهم مع الحمض النووي بتاع المخلوقات القديمة الموجودة على الأرض دي، عشان يصمموا الجنس البشري بتاعنا، من خلال استعمال نوع متطور من الهندسة الوراثية (Genetic Engineering).
بعد ما صمموا جنس مختلف تمامًا وأذكى من اللي كان موجود على الأرض بالفعل بفارق ضخم وكبير جدًا، بدأوا يستعملوا الجنس الجديد اللي هما عملوه ده –اللي المفروض إحنا يعني أو البشر– في إنهم يبقوا عبيد وينقبوا عن الذهب ويستخرجوه عشان سادتهم الأنوناكي.
بعدها، بدأ الأنوناكي يتعاملوا مع البشر بطريقة دونية استعبادية، على أساس إنهم الآلهة بتوعهم اللي خلقوهم.
كوكب نيبيرو في كتب الأديان السماوية
بيتطور بقى الموضوع مع الوقت لحد ما بتلاقي حكاية جديدة شبيهة بالحكايات الموجودة في كتب الأديان السماوية، بتفسر لك تاريخ الأرض كلها والأديان، بس بشكل جديد وغريب محدش سمع عنه ولا قدر يتصوره بخياله قبل كده.
مثلًا، سيتشين بيقول إن الطوفان، اللي المسلمين والمسيحيين واليهود يعرفوه باسم طوفان نوح، حصل بسبب إن كوكب نيبيرو ده قرب من كوكب الأرض جدًا بمداره.
الجاذبية بتاعته أدت لإن المحيطات تتكون فيها أمواج وبراكين يقدر طولها بمئات وربما آلاف الأمتار، وبيحكي من خلال ده قصة طوفان غريبة شوية عن اللي الأديان السماوية بتحكيه.
بيقول في الكتاب إن الأنوناكي دول لسه موجودين لحد النهارده على كوكبهم، وإن كوكبهم اللي هو نيبيرو ده بيتم دورة كاملة حوالين الشمس كل 3600 سنة، وده بسبب إنه بعيد جدًا عن الشمس مقارنة بالكواكب الأخرى الداخلية اللي إحنا نعرفها.
ومؤخرًا في انفجار من الأبحاث والاكتشافات اللي بتأكد أكتر إن الكوكب ده موجود وإن اكتشافه مسألة وقت.
سباق ما بين علماء الفلك لإثبات وجود كوكب إكس
مثلًا عندك اكتشاف جسم ضخم اسمه TG387 أو العفريت (The Goblin) سنة 2015 على إيد علماء من مؤسسة كارنيجي للعلوم، باستعمال مرصد فلكي ياباني على جزيرة هاواي اسمه (Subaru).
الجسم ده بيتم دورة واحدة حوالين الشمس كل 40 ألف سنة، ووجوده في المكان ده –حسب كلامهم– دليل مباشر على وجود كوكب ضخم هو اللي دفعه للمدار ده.
كمان في علماء تانيين طلعوا يقولوا إنه ممكن ميكونش كوكب، بل في الواقع ثقب أسود (Black Hole) بيدور حوالين الشمس وحجمه قد كرة البولينج، وغيرهم أبحاث وافتراضات تانية كتير.
دلوقتي في سباق ما بين علماء الفلك في كل مكان في العالم على إثبات وجود كوكب إكس ده.
بيقولوا إن أكبر دليل على وجوده إنه بيفسر ظواهر كتير جدًا غريبة بتحصل في الأجزاء الخارجية من المجموعة الشمسية لوحده، بدل ما همه زمان كانوا بيفسروها بمجموعة كبيرة ومتناقضة من التفسيرات.
طبعًا أبسط تفسير هو اللي بيبقى صح في 99% من الحالات.
لغز الأنوناكي والحضارة السومرية
ومن المتوقع إن في خلال الفترة الجاية يتم استعمال تليسكوب جيمس ويب الفضائي الجديد في محاولة البحث عن الكوكب ده لو كان موجود.
غير طبعًا مراصد فلكية تانية بتتعمل في كذا مكان من الكوكب، كلها هدفها البحث عن الكوكب الأسطوري ده.
لحد وقتها خلينا نسأل السؤال من تاني.. هل معنى وجود كوكب إكس ده –لو طلع موجود فعلًا– إن أساطير الحضارة السومرية عن كوكب نيبيرو وحضارة الأنوناكي دي حقيقية؟!
هل ممكن يكون الكوكب ده فعلًا هو المسؤول عن الانقراضات الجماعية اللي بتحصل عندنا على الكوكب كل كام مليون سنة؟!
هل حانت نهاية الحياة على الأرض؟
لو ده صحيح، تفتكر كام سنة بتفصلنا عن حدث الانقراض الجماعي الجديد اللي المرة دي هيكون نهاية الحضارة البشرية كلها؟!
كل الكلام ده طبعًا مستبعد وخيالي جدًا، بس هو مثير، ويخلي قلبك يدق بسرعة لو قعدت تفكر فيه لوحدك بالليل كده وأنت بتبص على السماء.
أخيرًا، الموضوع ده مش تأييد لنظرية المؤامرة خالص، على قد ما هو عرض شيق لحقائق وأحداث غريبة، ممكن تكون البداية لاكتشاف يغير الشكل اللي بنفكر فيه في تاريخنا وأصلنا ومستقبلنا نفسه، وليك مطلق الحرية تصدق أو لأ.
بس في الحالتين يهمني أعرف رأيك.
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
