فيلم John wick 2
ما هي قصة فيلم جون ويك؟
في نهاية الجزء الثاني من الفيلم المذهل “John wick 2” تم الحكم على البطل من قبل الإدارة العُليا بالموت.
كان معنى الكلام ده إن كل القتلة المأجورين في العالم هيسعوا لقتله، عشان يكسبوا مبلغ مادي ضخم، كل القتلة المأجورين وعددهم ملايين بالنسبة للأحداث يعني.
فجأة العالم بيوسع قُدام John وبيحس أنه لا مُنتمي، والخطر وعدم الأمان عنده بيوصلوا لقمتهم، ده خلانا نشوف البطل “John wick” يجري وسط الناس وهو عيونه مليانة خوف، لأنه مش عارف فين القاتل المأجور إللي هيقتله ولا إزاي ولا إمتى ولا فين؟
عندما يكون الموت قريبا
مشهد وعينه كلها هلع وخوف بيجري مرعوب خلاني أفكر في حاجة بديهية جدًا، الإنسان أصلًا ممكن يموت في أي لحظة، لأي سبب، في أي مكان، بعدد لا نهائي من الأسباب.
ده الطبيعي، أنتَ دلوقتي مش ضامن الساعة الجاية هتكون فيها حيّ ولا ميت، حرفيًا دي حقيقة مجردة وفقًا لقانون الاحتمالات الرياضية.
أنتَ بكل بساطة لو بصيت فوق على السماء، ممكن بعينك المجردة تشوف مجموعة من النجوم.
النجوم دي متعلّقة في الهواء كده، مفيش أي حاجة مسكاها عنك غير الجاذبية والكتلة وكثافتها محسوبة على مساحة الجاذبية، وموضوع معقد كده مخليها محبوسة في المكان ده فوقيك، لكنها في أيّ وقت ممكن تسقط وتقع على الأرض.
فطرة الخوف
الخطر الحقيقي موجود في كل مكان حواليك، بس أنتَ مع الاعتياد بقيت بتتناسى إيه هيَّ الحاجات إللي ممكن تموّتك فعلًا، لأنك أصلًا مش بتخاف من الموت.
أنت بتخاف من الأذى، أنت بتخاف من الإصابة في جسمك وتقول الموت أرحم، بتخاف من الأذى في مشاعرك وتستخدم نفس التعبير لا واعيًا، لأن الأذى ده فعليًا مقيت جدًا أكتر من المُوت نفسه، إحنا بنخاف نتوجع أكتر ما بنخاف نموت.
عشان كده John كان بيجري بهلع لأنه مكنش هيموت بشكل طبيعي، إنما كان هيتأذى الأول.
غريزتنا الإنسانية بتخلينا نهرب بعيد عن الأذى، وده شيء لو تعلمون عظيم، لأن مع إدراكنا لمواطن الأذى فإحنا بنحب نكون عنها في غربة، وده بيخلّينا نبعد بعيد عن أي شيء أو شخص مؤذي.
ماذا يفعل اليقين بالله؟
أنتَ في الدنيا ماشي بنفس نظرة الهلع إللي كانت في عين John Wick دي في نهاية الفيلم، بس خلاص جالك اعتياد عليها وبقيت ماشي بيها طول الوقت.
عشان تتخلص من حالة الهلع دي، خلّي عندك يقين بالله، عشان كده الإيمان بيطمن، وهتلاقي آيات كتير في القرآن بتقولك متخافش.
سلِّم أمرك لله وخلّي عندك يقين إن مفيش شيء فعلًا يقدر يؤذيك، إلا إذا أنتَ نسيت اليقين ده.
اقرأ أيضاً:
فيلم مهم للجميع في عصرنا الحالي
فيلم وثائقي يجيب عن أيهما أفضل: المادة أم المعنى؟
مناقشة لأحداث فيلم ” الدائرة ” The Circle
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
