شرع الله
يا شعب وادي النيل
يا شعب حر أصيل
رب العباد قال لنا
في محكم التنزيل
أنة خلقنا وخلق
من نفسنا أزواج
رحمة ومودة وسكن
وكلامه لينا دليل
إيه السبيل للرجوع
موضوع محيرني
صعبتوا ليه الأمور
يا رب صبرني
الخوف غمرني
وعفرني القلق والضيق
وإزاي أشوف الطريق
يا خلق دلوني
أهل الحبيبة كادوني
والمطالب سيل
الشبكة كتبت جنوني
للعزاب مراسيل
والمهر عدا الحدود
وبنود مالها لزوم
والقايمة بتزوم
وأنا حيلي صبح مهدود
باجود وأودي
وأعدي بين حدود وحدود
وأنط حاجز ورا حاجز
وأعدي سدود
لجل ما أنول الرضا
وأوصل لمطلوبي
العند ينزح جيوبي
وابتزازي لدود
مجلود يا حالي
وأموالي يا دوب ع القد
وإزاي هاعيش فرحتي
وأنا تحت سقف الكد
باشقى وأعافر
وأسافر
في الشقى راضي
يا قاضي نفسي ومنايا
نمشي بالمعدول
ونقول بلاش للغشم
ونسهل المعقول
نول الشباب لو غزل
توب الحيا يكسيه
ولو عرفنا نواسيه
لحن الهنا هيطول
البنت ويا الولد
رافضين سعار المهر
خايفين يقاسوا الألم
ويدوقوا كاس القهر
مهر التعالي رمح
وسبقنا مش مضمون
هدوا قانون الجفا
وتعالوا نتحداه
نبدر سماه بالصفا
نلقى الوفا ممنون
المال لا يمكن يكون
حاجز لشرع الله
ومهما كان الحسب
كف النسب شايلاه
تاه الغنى في المتاهة
والفقر نداهة
والآهة شالت وحطت
والصدا معناه
الشقة شرحة وبرحة
والجهاز محلاه
فستان وبيشة وطرحة
محبوكين ع الجاه
شط النجاة الخروج
من دايرة التبذير
خايف زفير الحرام
يرمى الغرام جواه
ساعتها بس الحياة
هتزل أنفاسنا
ما احنا اللي دوسنا الأصول
وعصرنا وكبسنا
ولبسنا توب الذنوب
وعصينا ع الإصلاح
ونسينا إن الفلاح
أفراح تونسنا
اقرأ أيضاً:
* تنويه: الأفكار المذكورة في المقال لا تعبر بالضرورة عن رأي الموقع.
