تعرف إن في علماء دلوقتي من جامعة أريزونا عندهم مشروع إنهم يبنوا سفينة نوح جديدة، تشيل جواها كل الأجناس الحية الموجودة على الأرض، وتحفظهم في القمر تحسبًا لأي كارثة تحصل على الأرض؟!
المشروع ده بتتم دراسته بصورة جادة، وممكن جدًا يتم تنفيذه في المستقبل القريب، عشان يبقى واحد من أكبر المشاريع اللي تم تنفيذها في التاريخ البشري، كوباية شايك الحلوة والنعناع في إيدك، وتعالى بقى أحكيلك عن الموضوع المذهل ده.
ما هي سفينة نوح الجديدة؟
بص يا سيدي، الموضوع كله بدأ باقتراح من مهندس اسمه جيكان ثانجا (Jekan Thanga)، بيشغل منصب رئيس معمل الاستكشاف الآلي الأرضي والفضائي، أو اللي بيسموه (SpaceTREx) في جامعة أريزونا في الولايات المتحدة الأمريكية.
الاقتراح ده كان عبارة عن فكرة لإنقاذ صور وأشكال الحياة على كوكب الأرض، في حالة حدوث أي كوارث بيئية أو طبيعية، أو حتى كونية أدت لانقراض الحياة على الأرض، ونهاية العالم كما نعرفه.
الكوارث الافتراضية دي ممكن تبقى التغير المناخي أو ذوبان الجليد القطبي أو الحرب النووية أو حتى النيازك والمذنبات، مش مهم إيه شكل النهاية على قد ما هو مهم إزاي نقدر نهرب منها.
حفظ عينات ل 6.7 مليون نوع من الكائنات الحية
الفكرة بقى كانت بتقول إننا نصمم مبنى متطور جوه الأنفاق البركانية اللي موجودة تحت سطح القمر، عشان نقدر نخزن فيه أكتر من 6.7 مليون عينة من أشكال الحياة الأرضية، بما فيها البويضات والحيوانات المنوية البشرية، وحبوب النباتات، والسوائل المنوية بتاعت سلالات الحيوانات الأرضية، وعينات من الـDNA للطيور وغيرها.
كل العينات دي هيتم حفظها بصورة متجمدة من خلال تكنولوجيا الكرايوجينيكس (Cryogenics) الحديثة، اللي بتحفظ العينات في درجات حرارة بتوصل للمئات تحت الصفر، في ظروف لا تصلح للحياة البشرية، وده عشان لو بوظنا الدنيا هنا على الكوكب، يكون عندنا أوبشن ندوس على زرار الـReset ونرجع الحضارة من جديد.
الحقيقة إن ده مش أول مشروع يكون هدفه تخزين عينات من الحبوب وأشكال الحياة الأرضية عشان يحافظ على الحضارة، بل في مكان اسمه مخزن سفالبارد (Svalbard) في الدائرة القطبية في النرويج، موجود كميات ضخمة من الحبوب وعينات النباتات، تحسبًا لأي كارثة ممكن تحصل في أي وقت.
بس الفكرة في المشروع الجديد بتاع القمر ده، هو إنه هيدي البشر القدرة على إنهم يبدأوا التاريخ نفسه من جديد، ويرجعوا الحياة على الكوكب زي ما كانت في حالة وقوع أي كارثة، وكمان هيبقى مؤمن أكتر بكتير من بتاع النرويج، عشان هو مش معرض لأي ظروف أرضية من الأساس.
سفينة نوح القمرية قد تساعد الأنواع المهددة
بس طبعًا عشان يقدروا يعملوا مشروع ضخم زي ده، فهو هيحتاج مجهود عالمي غير مسبوق، وتكلفة مستحيل تتحملها أي دولة لوحدها، ممكن توصل لمئات المليارات من الدولارات، فـتعالى بقى أفهمك تفاصيل المشروع عشان تحاول أنت تستوعب الخيال ده!
الفكرة يا سيدي إنهم عايزين يبنوا زي قاعدة أو مخزن فضائي ضخم ومتطور، جوه الأنفاق البركانية بتاعت القمر اللي قلنا عليها دي، والميزة في ده هي إن الأنفاق دي تكونت مع بداية تكون القمر، من أكتر من 3 مليارات سنة، وهي محمية تمامًا من أي ظروف بيئية أو كونية خطيرة، سواء كانت ضربات المذنبات والنيازك الصغيرة، أو الإشعاع الكوني اللي ممكن يبوظ الـDNA بتاع الكائنات اللي بنحاول نخزنها.
بعد ما المخازن دي تتبني في الأنفاق، هيتم ربطها بسطح القمر عن طريق أسانسيرات حديثة مصممة للعمل على الجاذبية القمرية، والأسانسيرات دي هتبقى متوصلة بالجزء التاني من المشروع، اللي هو هيبقى منظومة اتصالات متطورة، وألواح طاقة شمسية مبنية فوق السطح عشان تقدر تولد طاقة لإدارة المستعمرة.
إرسال أسراب من الروبوتات إلى سطح القمر
الظريف بقى إن كل اللي هيبقوا شغالين في المستعمرة هيبقوا روبوتات صغيرة متصممة مخصوص للمهمة دي، عشان يبقى وزنهم خفيف، ويستحملوا كمان الظروف البيئية الصعبة والإشعاع، ويقدروا يتنقلوا على السطح من دون مشاكل، وهيتم التحكم فيهم عن بعد من هنا على الأرض.
ده غير إن هيبقى في غرفة ضغط أو (Airlock) زي اللي موجودة على محطات وسفن الفضاء، عشان تسمح للبشر إنهم يدخلوا المستعمرة ويزوروها في أي وقت لو احتاجوا.
طبعًا عشان يقدروا يعملوا مشروع زي ده، فهمَّ هيحتاجوا يطلقوا أكتر من 250 صاروخ على الأقل، وفي حسابات تانية العدد ممكن يوصل لـ500 كمان، وكل دول هيبقوا شايلين أجزاء من البنك البيولوجي لأشكال الحياة الأرضية، كل جزء فيهم هو واحد من ضمن ملايين الأنواع الموجودة حوالينا في الطبيعة في كل حتة، وبكده هتكون دي بداية لمستعمرة كاملة ممكن يتم تجهيزها في المستقبل لاستقبال البشر نفسهم.
حفاظاً على التنوع البيولوجي
تكلفة كل ده طبعًا هتبقى كبيرة جدًا، غير إن المشروع ممكن يستغرق تقريبًا 30 سنة على الأقل عشان يتبني، بس برغم ده فالمشروع عجب الخبراء جدًا، وفي كلام على إنه بيتم دراسته حاليًا ودراسة إمكانية تنفيذه قريب من جانب الأمم المتحدة ومؤسسات علمية وفضائية كبيرة زي ناسا ووكالة الفضاء الأوروبية أو الـESA.
يقال إن لو حصل تعاون دولي حقيقي في المشروع ده مستقبلًا، لو الأرض اتهددت بأي كارثة ممكن تأثر على تنوع الحياة البيولوجية الموجودة على الكوكب، ففي طرق فعالة لتنفيذه في فترة 15 سنة بس.
تفتكر الخبراء دول ليه خدوا الموضوع بجد، وبيدرسوا المشروع وإمكانية تنفيذه برغم إن تكلفته ممكن تعمل مشاكل اقتصادية في العالم كله، مش في مجرد دولة واحدة؟!
هل الناس دول عارفين حاجة إحنا منعرفهاش؟! هل ممكن يكونوا حاسين إن مستقبل الأرض فيه خطر مستنينا وجاي في المستقبل، ومحدش مننا عنده أدنى فكرة؟!
هو ده السؤال.
المصادر
https://www.space.com/proposed-lunar-ark-for-biodiversity
https://futurism.com/the،./send-million-sperm-samples-moon
https://www.livescience.com/proposed-lunar-ark-for
مقالات ذات صلة:
هل نثق في العلم؟ كيف؟ ولماذا؟!
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
