بيت القصيد
بص عليك واتأمل ذاتك
بص كويس وإملا عينيك
فكر فيك على قد ما تقدر
يمكن تلقى دليل يهديك
الأحوال حواليك مفتوحة
وتملّي بتتأمل فيك
خليك واعي ودايما راعي
إن الداعي لخوفي عليك
إنك مني وغصبن عني
لازم أقولك صون معانيك
ياللي انتو
عايشين في الخيال
عايز إجابة للسؤال
إزي حال قصر النظر؟
ويا ريت يكون
الرد جد ومختصر
سيبوا البصر يسرح بعيد
وأكيد هيوصل للمحال
الارتحال في الحل
مختل الوضوح
والبوح ماهوش ناوي
يداوي علتي
كل اللي شوفته في سكتي
أشلاء طموح
مسموح تغير كل شيء
لجل الوصول
لجل الحصول ع الصك
وجواز المرور
العقد زور
والقصد مبهور بالقصور
ناكر جميل النور
وبور عقلك عماك
جهلك ملاك بالعند
ونسيت منبتك
عايش ما بينا
ودنيتـك واخداك بعيد
منك ومنا
ونيتـك بيت القصيد
سيب الرصيد
يستقبلك ساعة تعود
سيب العهود
تحلم بإن الجود متاح
الانفتاح ع الكون
بدون تفكير خطير
ممكن تشوف الخاطي
سيد أو أمير
ممكن تشوف شرير ملاك
ممكن هواك
يغطس في بحر الامتلاك
وعماك يجرك للهلاك
وصفاك يقاسي م الزفير
خليك هنا
وارضَ بنصيبك وسطنا
هنا الحلال
مافيهوش رتوش
هنا الحيا مالي الوشوش
وهناك عروش متسيطا
باين عليها الانسجام
لكنها متلخبطة
مش كل شيء حلو وجميل
ولا أي شيء يغويك تميل
ولا كل متزوق يغرك
خلّي إحساسك دليل
ناسك أساسك
والوطن هو المقام
عبي كاساتك بالتفاني
والأماني والسلام
حقق الأحلام معانا
بالصراحة والأمانة
وخلّي إخلاصك إمام
اقرأ أيضاً:
الحلم والسواد القاطن هنا وهناك
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
