الــــــكنز
ياللي أنت بتقول
معايا كنز عايش بيه
الكنز مش مال
ف توهه بال يتبعتر
الكنز صاحب جدع
أصله يرد عليه
لو توزنه بالدهب
عمره ما يتقدر
طبعه السماح والأدب
والأصل فيه موجود
وتمللي بيجود
وساعة شدتك تلاقيه
افهم كلامي يا خال
الكنز مش أموال
الكنز راجل عال
والأصل في وريده
والأصل مش أطيان
ولا عزبة ولا بستان
الأصل في الإنسان
وارثه عن سيده
المرجلة ليها ناس
والجدعنة ليها ناس
والراجل الحساس
إحساسه بيزيده
له في الكرم أمثال
بيساعد إللي مال
وإن ضاق عليك الحال
بيمد لك إيده
مهما يكون المال
ملايين على ملايين
لا هيغنى عن صاحب
ولا يشتري محبين
دا الصاحب إللي يصون
ولا عمره مرة يخون
جوة القلوب مكنون
وبتهوى مواعيده
اسمع كلامي وروق
وافهمني يا مخلوق
عيش الحياة بالذوق
والشر ما تقيده
مهما يكون وياك
خلي الأدب وياك
تغلا على إللي معاك
ويقولوا.. ويعيدوا
ويقولوا.. ويعيدوا
اقرأ أيضاً:
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا