أكتــوبر – ليلة ميلاد الكرامة
شوفت ف منامي خير
العتمة بتنور
والطير بيبني عشوش
والأرض بتخضر
والحب دب الحوش
ووشوش
بتحضن بعضها ملايين
وقلوب مصلين
وسمعت هاتف م السنين
بيقول
قوم يا مصرى
مصر دايما بتناديك
***************************
ألف ولامين
وهاء عالية على مادنة
( الله )
لفظ الجلالة
في يوم الشدة ساعدنا
وف شهر فيه الجهاد
دايما مواعدنا
قمنا عبرنا الهزيمة
واتنصب عيدنا
الصبر خدنا
على شط الأمان نرتاح
ونسينا الليل الآسي
ورسينا ع الأفراح
والفجر جاب الصباح
والشمس شافتنا
والضي زوق حياتنا
وإلهنا زادنا
كبرنا ساعة عـبورنا
والندا يامعين
شوفنا الرجال م السما
زي القدر نازلين
متجهزين للفدا
متحفزين للتار
متحصنين بالكتاب
وبسنة المختار
ناويين يزيحوا الحصار
ويطهروا الجتة
م الغطرسة والغرور
والجهل والعتة
وبكل حب الوطن
ع النصر متعاهدين
وقف التاريخ وانتشى
يكتب في كراسة
حزن البلاد انتهى
والطين رفع راسه
والحلم داير بكاسه
يفرق الحكايات
ويطمن الأمهات
ويزف أعيادنا
تاهت معالم سيرتهم
لمَّا خطينا
واتهد معبد ثباتهم
تحت خطاوينا
وف عرض سينا
ركبنا مهرنا الرهوان
وف طولها وقف الزمان
ينقش أسامينا
مالت علينا
وحضنت كل واحد دور
واتنهدت بالقوي
من قلبها المجبور
طيف السرور ضمها
والسعد دوقها
عرفت طريقها
وشربت من مواردنا
ورفعنا فوق المدن
بدل العلم أعلام
من بعد طول الألم
ومرارة الأيام
وقلعنا جدر الظلام
وطلعنا م الأهوال
لما طوينا المحال
والحق عاد لينا
باتت عيونهم حزينة
وإحنا فرحتنا
مليانة بيها القلوب
والسعد زار بيتنا
بعد الهوان والضنا
ردينا عزتنا
وكتبنا جوة التاريخ
لولادنا قصتنا
دنيتنا كانت أماني
صهدها بركان
وحياتنا كانت مواني
نبضها زهقان
واما الأدان لمنا
على التقوى والإيمان
هبينا زي الطوفان
وبقوة عدينا
راحوا ما عادوا
ونادوا بالسلام طالبين
قولنا السلام شرعنا
لو جد بيه راضيين
والأرض رجعت
وعاد الحق يامهاجرين
خلوا الألم فرح
ومكان الدماء بساتين
* تنويه: الأفكار المذكورة في المقال لا تعبر بالضرورة عن رأي الموقع.
اقرأ أيضا:
إلى روح رافع العَلم في ذكرى نصر العاشر من رمضان
المجد لمن قالوا بأعلى أصواتهم وبرغم بساطتهم: فلسطين عربية
