لعنة كاساندرا
“في بؤس البعض سعادة للآخرين”، ده مثل فرنسي مشهور لو فكرت فيه هتلاقي إن في رابط أحيانًا فعليًا ما بين بؤس أحد الأشخاص وسعادة شخص تاني.
منذ بدء الخليقة والإنسان بيفكر بازدواجية مُسطحة دون البحث عن المعنى الأعمق للأفكار، الخير قصاده شر والمادة قصادها فراغ، والسعادة قصادها بـؤس وكل شيء له نقيض وضد.
لكن في الوحدة لا بديل عن التعاسة تقريبًا في أعمق معانيها، حتى وإن بدا العكس فالحقيقة تعيسة للغاية.
المُهم..
مش فيه ساعات كده بتحلم أنك بتتكلم أو بتصرخ وصوتك مش طالع؟ مش فيه ساعات بتتكلم وتحس إن اللي حواليك مش واصلهم صوتك؟
كام مرة تكلمت ومحدش سمعك رغم إن صوتك كان عالي؟ وكام مرة محدش سمع اللي إنت قولته؟
أسئلتي كتير أنا، إيه الملل ده؟
كاساندرا ابنة بريام
كاساندرا بنت جميلة جدًا ويمكن أجمل بنت في اليونان كلها، بنت القصور والملوك هي ابنة الملك بريام Priam، ملك طروادة وأخت باريس Paris اللي كان السبب في حرب طروادة ،أيوة اللي أنت شوفته في فيلم Troy.
الإغريق كان لهم إله إسمه “أبولو” وده كان مُتخصص في التنبؤ بالمستقبل، يعني يعرف بكرة فيه إيه ودي قدرته المطلقة.
بس كان عنده مشكلة، يعني لو قصاد كل تنبؤ صحيح بالمستقبل وحبيت تستشيره تعمل إيه لما يحصل كده كان هينصحك نصيحة تجيب أجلك، لأنه فاشل جدًا في الحكم على الأمور والنصح.
كاساندرا بقى كانت بتخدم في المعبد بتاع أبولو ده وكانت مُلفتة، تقريبًا كل اللي كان بيزور المعبد كان بيزوره عشان يشوف كاساندرا، كاساندرا حرفيًا كانت أجمل بنت في المدينة.
أبولو اللي هو إله وعلى الرغم من غرابة الجُملة اللي جاية إلا إنها مُدوّنة في الأسطورة زي ما هكتبها لك، أبولو أول ما شاف كاساندرا أعجب بيها ووقع في غرامها!
أسطورة تنبؤات كاساندرا وحرب طروادة
وعشان كده أبولو حاول معاها بكل الطُرق أنها تقرب له وتحبه لحد ما يأس، فعرض عليها عرض لا يمكن ترفضه أبدًا، عرض على كاساندرا إنها تمتلك القدرة على رؤية المستقبل دونًا عن البشر مقابل إنها تكون معاه وتحبه زي ما بيحبها.
كاسندرا وافقت، وبالفعل منحها أبولو قدرة رؤية المستقبل، لكنها بعد ما قدرت تحصل على العطية دي شافت فورًا أبولو وهو بيساعد جنود من اليونان على غزو طروادة.
كاسندرا شافت جنود في كل مكان خـارجين من جسم شبه حصان خشبي ضخم وأبولو واقف بيساعدهم، كاسندرا اتفزعت، ومن فزعها بصقت في وجه أبولو اللي كان بيميل عليها عشان يُقبلها غصب عنها.
أبولو شاف إنها خدعته ورفضت تقرب منه، الموضوع ده خلاه يستشيط غضبًا، مكنش مصدق إن في إنسانة من البـشـر تـُرفضه ومتقبلش تقرب منه.
فقرر يعاقبها..
لعنة كاساندرا
العقاب مكنش يقدر إنه يحرمها من العطية اللي منحها إياها، وإنما كان يقدر بس يعاقبها بإنه يضيف شيء فوق العطية دي، وبحركة خبيثة قرر إن الزيادة دي هتكون شر، شر من جنس عملها.
أبولو أنزل عليها لعنة إن كل البشر ميصدقوش كلامها، ومش بس كده يعاملوها على إنها مجنونة كلامها ملوش وزن، وهذا عقاب لو تعلمون شنيع.
كاسندرا كانت بتقول للناس اللي هيحصل في المستقبل لكل واحد فيهم وتنصحهم لكن محدش كان بيصدقها، أو بيسمع لها.
حتى عائلتها عاملوها على أنها مجنونة، كاسندرا كانت بتتكلم بطلاسم مش مفهومة للناس ولكن مفهومة لها جدًا ومكنتش فاهمة ليه الناس مش فهماها.
مقتل كاسندرا
لدرجة إنها تنبأت بزيارة أخوها الشؤم لأسبرطة وإنها هتكون سبب في حرب حتمية الهزيمة والانكسار، واللي هي حرب طروادة، وبرضه محدش صدقها أو سمع لها.
في أثناء الحـرب كانت بتمشي في الشارع زي المجانين تتكلم وتحذر الناس من قبول هدايا الأسبرطيين، ومحدش صدقها أو سمع لها، وكانوا سايبينها تهاتي مع نفسها في عز الحرب والأزمة.
لحد ما بالفعل تم احتلال المدينة بالكامل، وهربت كاسندرا واللي معاها على معبد مينرڤا، وهناك كان أياكس الأصغر مستني عشان يغتصبها ويرميها في المعبد هي واللي معاها لوقت توزيع الغنائم.
كاسندرا وقعت من نصيب أجاممنون وده يبقى أخو ملك أسبرطة، لكن كاسندرا حذرته من مصير مُظلم لو فضلت معاه.
قالت له أنه هيتم قتلهم هما الإتنين، لكنه بالتأكيد مصدقهاش يعني، لحد ما تم قتلهما معًا بأمر من كليتيمنيسترا في أسبرطة!
عقاب كاساندرا
الحقيقه إن عقاب أبولو لكاسندرا كان قاسٍ جدًا ومبالغ فيه، عارف إنت إحساس إنك بتتكلم وما حدش بيسمعك؟ وحتى لو سمعك كأنه ما سمعش؟ عارف إنت لما يكون كلامك مش فارق ولا له معنى؟ لما تبقى عارف الحقيقة وحقيقتك أنت مالهاش وزن عشان طالعة منك؟
يمكن العقاب كان أشد وأكثر قسوة من القتل.
وعليه تقدر تحدد قيمة الصوت اللي طالع منك، وقُدرتك على التعبير وتعززها جدًا، وتحس بمدى قيمتها الغالية اللي أحيانًا أنت لا تلتفت لها.
يمكن المقال ده يغيّر فكرتك.
اقرأ أيضاً:
أسطورة الكوكب X .. هل هي حقيقة أم خيال؟
أحجار جورجيا الإرشادية ونظرية المؤامرة
سقروطة … والسُحب … والحقائق المقلوبة
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
