فن وأدب - مقالاتمقالات

قلوع الصبر

من صغر سني بأغني

للحياة مواويل

وتعبني طول التمني

ونوهت في التأويل

الصبر كان الخليل

والليل صاحبني كتير

دبابير بلسع في ذاتي

والتجني غفير

يا ما زفير الحياة

عكر مقاماتي

والآه كلتني

ومدت فيا آناتي

وصبرت على قصتي

والجرح ما عاتبتوش

وصبرت على غصتي

والفرح ما لمحتوش

وصبرت ياما وياما

وصبري مررني

وحاصرني ياما الوجع

وشبعت حلق حوش

متسلموش عمركم

لليأس يلعب بيه

علوا قلوع صبركم

قارب نجاتكم فيه

والدنيا إيه غير ساعات

هنعيشها بقدرنا

ولو صبرنا هنوصل

والنصيب نجنيه

افرد حبالك

لحد المد وارخيها

ماشي الخلايق بزمة

وهمة خاويها

خليها تحلف بإنك

للرضا مفتوح

الروح

مداها في الحياة

قد الأجل ما يمد

والنفس

بين الكد بتعافر

سافر

لكل ما تبتغيه تلقاه

عمرك دواه

إنك تكون موزون

الكون براحك

وملاحك أمل مكنون

يطلع صباحك

من عيون صبرك

لو لف زهرك

عكس ما بتريد

خليك بعيد

واتملا مكتوبك

طهر غروبك

وإنت لسه شروق

سوق الدلال

ع الدنيا واتمايل

حايل رضاك

حلمك يطاطي لك

ويشوف دليلك

سكتك وخطاك

وغطاك يكفي

منتهاك ويزيد

إنت الوحيد

المستفيد م الظرف

غير بنود

الصرف والتعبير

وابعت

لطير الحب عنوانك

يعزف زمانك

قصتك ألحان

وتبان معاني

الأصل والصورة

والسيرة تلمع

ترفع المنسوب

توب الأدب

لوعت على عودك

يصبح وجودك

صعب تعديله

والجهل خيله

لو رمح جواك

ترضع سماك

من  صدر خفافيشك

طيشك أفيشك

والسراب بدروم

وتزوم في جحر

الغدر والخسة

الحصة واحدة

والسؤال مطروح

على قد سعيك

في الجواب هتبوح

هتعبي

لوح الآخرة بالأوزار

ولا نهايتك

فوق سفينة نوح

اقرأ أيضاً:

عدلك يزينك

الصبر مواجهة

لا يسألون

* تنويه: الأفكار المذكورة في المقال لا تعبر بالضرورة عن رأي الموقع.

عبد الله محمد الهادي عبده بخيت

عقيد متقاعد بالقوات ( الجويه ) من ابطال ملحمة العبور أكتوبر 1973 عضو إتحاد كتاب مصر عضو مجلس إدارة اتحاد كتاب مصر فرع الشرقية والقناة وسيناء عضو جمعية الأدباء فرع القاهرة رئيس نادى أدباء التل الكبير

مقالات ذات صلة