الوجه الآخر للأرجنتين
بص، طريق “ليونيل أندريس ميسي كوتشيتيني” لتمثيل منتخب وشعب دولة الأرجنتين طريق طويل وغريب جدًا.
هنا أنا مش هتكلم عن شخص ميسي اللي كلنا عارفينه، لكن هرجع وأتكلم عن البدايات، دولة الأرجنتين نفسها، البلد الوحيد في أمريكا اللا تينية بلا إفريقي واحد يمثل منتخبها، بعكس باقي أمريكا اللا تينية، هنتكلم عن ٧ مراحل مرت بيها الأرجنتين وصَّلوا “ميسي” لتمثيل دولة الأرجنتين، والتحدث بالإسبانية، والمراحل هي..
المرحلة الأولى: الاستيطان الإسباني ١٥١٦م
أرض الأرجنتين زيها زي باقي أراضي العالم الجديد، كانت مطمع للمستكشفين الأوروبيين في القرون الوسطى، إلا إنها مكانتش فاضية، لكن كان بيسكنها شعوب أصلية من الهنود الحمر الأمريكيين وكانوا متقسمين لقوميات، منهم صيادين باتاجونيا وباميا وتشاكو، ومنهم حضارة الإنكا في جبال الإنديز، ومنها ثقافة التوبي جواراني في الشمال.
وصل ليها المستكشفين من إسبانيا والبرتغال على رأسهم أمريجو فيسبوتشي سنة ١٥٠٢م، ومع الوقت وتعدد الرحلات ووصول خوان دياز دي سوليس سنة ١٥١٦م بدأوا في بناء المستوطنات الإسبانية واستعباد السكان الأصليين وصولًا لاستعمار “ريو دي لا بلاتا” واستيطان الإسبان، سيطروا على مناطق معينة من الأرجنتين، ومناطق تانية معرفوش يسيطروا عليها بسبب قوة السكان الأصليين على أطراف العاصمة بيونس آيرس.
المرحلة الثانية: استجلاب الأفارقة ١٥٨٥م
بعد سيطرتهم على أراضي الأرجنتين والبحث عن مناجم الذهب والفضة، والزراعة، احتاجوا عمال، وعليه بدأوا يشتروا في عبيد من الأفارقة اللي كانوا وصلوا للبرازيل بالفعل، وعن طريق برتغالي اسمه “بيدرو جوميز رينيل” تم الاتفاق على توريد ٦٠٠ إفريقي سنويًا للأرجنتين.
فضلت تجارة النخاسة شغالة في الأرجنتين جوة عاصمتها بيونس آيرس، ومنها للمناطق الداخلية لحد سنة ١٨٣٥م، وإلغاء العبودية عالميًا، وصل عدد الأفارقة من سكان الأرجنتين وقتها لأكتر من ٤٠٪ من السكان، إلا إن الإنسان الأوروبي مكنش قادر يعترف بحقوقهم أنهم بشر، بيبصلهم بصات احتقار وإنهم “بلا أرواح”، وده تصريح حقيقي بالمناسبة.
المرحلة الثالثة: حرب الباراجواي ١٨٦٥م
بعد استقلال الأرجنتين عن إسبانيا، دخلت في حرب طاحنة مع الباراجواي والبرازيل، الحرب دي كان لازملها جنود، فما كان من رئيس الأرجنتين الجديد “دومينجو فاوستينو سارمينتو” إلا إنه يستخدم السود وقود للمدافع، عن طريق إنه يحطهم في الخطوط الأمامية قصاد المدافع في عقد لمدة خمس سنوات مقابل إنه لو عاش يبقى حر.
الحرب دي مات فيها آلاف من الأفارقة بسبب نظرة الاستعلاء بس للملونين، والباقي منهم هرب إلى البرازيل والأوروجواي خوفًا من الحرب وتداعياتها، لحد ما وصلت نسبة الأفارقة في الأرجنتين إلى ١٪ بس من السكان.
المرحلة الرابعة: الحمى الصفراء ١٨٧١م
ظهر وباء الحمى الصفراء في الأرجنتين سنة ١٨٧١م، وقتها الرئيس الأرجنتيني “سارمينو” كتب في مذكراته إنه فيه ٤ ملايين من السود، وفي خلال ٢٠ سنة هيتضاعف الرقم، هنعمل إيه معاهم وهُم سود بيكرهوا العرق الأبيض؟
هنا قرر الرئيس إنه يجبر الملونين أو السود اللي نجوا من الحرب إنهم يقعدوا في الأحياء اللي انتشرت فيها الحمى الصفراء، ويحظر خروجهم أو علاجهم، لحد ما نقص عددهم خالص وبقوا كام ألف بس، أغلبهم ستات وأطفال.
المرحلة الخامسة: مخطط التبييض القسري للسود ١٨٧٠م
قانون الرحم الحر هو قانون أرجنتيني، أُجبِرت بيه الستات من أصل إفريقي على الزواج من الرجالة البيض بالإجبار، خصوصًا اللي ليها زوج مات في حرب أو أخ، زواج قسري يجبرها تروح تتجوز وتخلف من راجل أبيض، واللي تخلفه يتجوز من واحد أبيض، لحد ما ينتهي الجين الأسود تمامًا.
هنا هُم مهتموش بالأفارقة بس، إنما قسموهم أربع مجموعات، الكريولو “السكان الأصليين أو الهنود الحمر”، والموروشو “أصحاب البشرة الداكنة”، والباردو “البني الفاتح”، والتريجوينو “أصحاب البشرة القمحية”، وأجبرتهم كلهم على الزواج القسري من البيض.
المرحلة السادسة: عملية غزو الصحراء ١٨٧٥م
الحكومة الأرجنتينية بقيادة الجنرال “خوليو أرجنتينو روكا” بتقرر إنها تتوسع في الأراضي اللي لسة تحت حكم السكان الأصليين، وبتقرر إنها تسرق أراضيهم اللي على أطراف العاصمة وما حولها، واللي كان لسة فيها سكان من أصل “قبائل مابوتشي” المواليين لتشيلي.
بتنظم جيش كبير وبتقرر تغزو المناطق الواسعة دي، في عمليات ممنهجة لتطهير الأراضي دي من إيد الهنود الحمر، وعن طريق حملتين “حملة آلسينا وحملة روكا”، اعتقلت ١٥٠٠٠ مواطن من الأصليين واستعبدتهم وعمدتهم بالغصب، ومنعوهم من الخلفة أو التكاثر، لحد ما اختفوا من التاريخ نهائيًا، وسيطرت على أراضيهم البالغة ٦٧٠ ألف كم٢، بس أرض فاضية مفيهاش حد عشان سكانها ماتوا.
المرحلة السابعة: تشجيع هجرة الإيطاليين ١٨٩٠م
بعد ما أخدوا الأرض، وقتلوا صحابها، وقتلوا السود وطردوا الباقي، الأرجنتين كانت بلد فاضية فيها شوية إسبان وبرتغال بس، عندنا أراضي محدش بيزرعها، عندنا موارد مش عارفين نستغلها، وأغلب الهجرات بتروح المكسيك وبيرو، طب نعمل إيه؟
المناظر السياسي “خوان باوتيستا ألبردي” بيقترح مادة في دستور الأرجنتين، المادة دي تشيل اأي عوائق للهجرات الأوروبية، يعني اللي عايز ييجي يتفضل من غير أي شروط، لو بتدور على حياة جديدة تعالى، عندنا خيرات وحياة جديدة، ومش هنحط قدامك أي عوائق.
الأخبار دي وصلت إيطاليا وإسبانيا، وقتها إيطاليا كانت بتعاني من حروب داخلية وصراع للنقابات على رأسهم “رابطة العمال الدولية”، والحرب الكارلية التالتة في إسبانيا، فبحثًا عن فرص حياتية جديدة بدأت واحدة من أكبر موجات الهجرات الأوروبية في التاريخ.
وصل الأرجنتين من إيطاليا بس وقتها ٢.٢ مليون إيطالي بيدوروا على أرض يزرعوها وحياة جديدة يعيشوا فيها، واستلموا الأراضي الزراعية وطوروا نظام الري فيها، اللي بعد كده هيحول الأرجنتين لـ”سلة الخبز” ويغير اقتصادها للأحسن.
بداية عصر الأرجنتين البيض
من ضمن المهاجرين الإيطاليين اللي كانوا بيدوروا على فرص جديدة للحياة، فلاح من مواليد ١٨٦٦م كان عايش في فقر وظروف قاسية في إيطاليا، بيشتغل في أرض جنب قلعة مونتيفيوري، بيسمع عن موجة الهجرة والبحث عن موارد جديدة في أمريكا اللا تينية، فبيودع عيلته وأخوه الأكبر “جيوفاني” في إيطاليا، وبيقرر ياخد مراته “ماريا” وعياله ويبدأ هناك على نضيف.
المهاجر ده اسمه “أنجيلو ميسي”، الجد الأكبر لليونيل ميسي، بياخد القطر مع مراته لأنكونا في إيطاليا، ومنها لميناء جنوة، وبياخد سفينة متجهة عبر المحيط الأطلسي وصولًا إلى سواحل الأرجنتين، وهناك بياخد أرض يبدأ يشتغل فيها في منطقة روساريو، ويخلف وعياله تخلف ويبقى مواطن أرجنتيني.
لحد ما سنة ١٩٨٧م بيتولد من عيلة المهاجرين دي ليونيل أندريس ميسي كوتشيتيني، ويبقى ظاهرة في كرة القدم ويرفع كأس العالم باسم بلاده الأرجنتين.
كواحد من ٦٠٪ من الايطاليين المكونين لشعب الأرجنتين النهاردة بعدد ٢٥ مليون إيطالي أرجنتيني، في مقابل ٣١٪ من الإسبان الأرجنتين، ومنتخب بلا تمثيل إفريقي أو ملون كلهم من العرق الأبيض إيطالي وإسباني، و١٪ بس من باقي السكان اللي إفريقي واللي هندي أمريكي واللي عربي وما إلى ذلك، بيسموهم هناك لحد النهاردة “الموروشو” واللي بالمناسبة كان منهم “مارادونا”.
٧ مراحل كل واحدة منها قادت للتانية، وصولًا لرفع ميسي كأس العالم في قطر ٢٠٢٢، ممثلًا عن دولته ودولة جدوده الأرجنتين، أرض الفضة أو جبال الفضة، كما أسماها الإسبان بعد انتشار شائعة أنها “جبالها من الفضة”.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
