أنا أحمد، أنا إنسان، أنت إيه بقى؟ أنت مين؟!
أنا أحمد، أنا إنسان ، مسلم، مصري على فكرة، أنت إيه بقى؟! أنت مين؟!…
أنا مسلم… وأنا مسيحى… أنا بقى يهودي
أنا أبيض، هههههههههه بص ده أسود. محدش يكلمني انا مصري… وأنا… وأنا…
افتكر كويس أنك قبل متكون أبيض أو أسود أو كذا أو كذا.. أنت إنسان.
إيه ياعم أنا إنسان ولا مسلم؟ أنا إنسان ولا مصري؟
بص مفيش أى تعارض أنت الاتنين مع بعض انسان مسلم، انسان مصري… الترتيب هنا مش تفضيلي الترتيب للسبق… بالعكس الأديان جت عشان تكمل الإنسانية والأخلاق، قال الرسول صلى الله عليه وسلم (إنما بعثت لأتمم مكارم الأخلاق).
أنا إنسان وأنت إنسان وهو إنسان وهي إنسانة… إيه يعني إنسان؟
إنسان يعني رباط تجاوز المذهب واللون والجنسية… يعنى حاجه مشتركة بتربطنا انسان مش أنك (تفكر، تتعلم، تلعب، تحب، تكره، تفرح، تزعل، إلخ..) وبس… لا إنسان إنك تحس بالإنسان تحب الإنسان، تساعده، أنك متبقاش أناني ،ماتظلمهوش…
إنسان إن بنت صغيرة تبيع ألعابها عشان تتبرع بالمال لملجأ الحيوانات الأليفة
إن شاب يعرض حياته للخطر عشان ينقذ حيوان كان بيغرق …
أنك تشوف ست كبيرة شايلة حاجات كتير تروح تساعدها
أنك تشوف حاجة غلط تحاول تصلحها
أنك تعيش لغيرك مش بس لنفسك.
أن واحد صاحبي يروح الموقف عشان يركب ويروح بس الوقت اتأخر و فيه بنات كتير ومفيش عربيات و لما تيجي عربية الكل يتسابق ويتزاحم و هو الوحيد اللى ساعدهم ومرضاش يركب إلا لما كل البنات ركبت… (رجولة).
أني وأنا راكب القطر ورجالة كتير وشباب قاعدين وستات وبنات وناس كبيرة واقفه وتلاقي شاب جاي من الشغل تعبان ومش قادر يقوم و يقعد حد فيهم (نخوة).
أن واحد صاحبى يلاقى واحدة بتشحت ف الشارع (لظروف قاهرة) مش بس يديها حسنة لا ده يقعد معاها ويكلمها ويسأل عليها ويحسسها أنه ابنها اللي مخلفتوش .
أن فى عيد الأم كل واحد جاب هدية لمامته وواحد صاحبى فكر يجيب هدايا للناس اللى ملهمش حد ويسأل عليهم…
إنها الإنسانية
الإنسانية مش مجرد موقف مؤثر او تصرف كويس او مجرد كلمه او إحساس أو ..أو.. الإنسانية هي أنت في أفعالك أقوالك احوالك حتى مشاعرك وتفكيرك… يعني تفكر في الإنسان زي ما تفكر في نفسك، تعمل كذا وتعملش كذا عشان أنت انسان
الإنسانية معاني وأخلاق بتيجى الأديان عشان تكملها…
الإنسانية بداية بس بداية مشتركة لينا كلنا..
انا وأنت والراجل الياباني، والست الألمانية و الحاج أيمن و والواد مينا كل واحد فينا كل يوم بيعمل نفس العمل الإنساني رغم اختلافنا في دينا وفي لوننا وفي وطننا..
الإنسانية لغة عدت اللغات كلها، لغة يفهمها كل إنسان، لما تشوف فيديو تايلاندي فيه عمل انساني بتفهمه بتدركه بتحسه من غير ترجمه من غير ما تفهم كلمة
..الإنسانية #فطرتنا النقية اللى بنلوثها كل يوم بكدب وكره وحسد وأنانية و.. و..
الإنسانية طفل برئ المفروض نكبره مش نقضى عليه… أو ننتهك براءته..
الإنسانية قلب بيوجهنا وعقل بيحكمنا… وعقل بيحكمنا
الإنسانية هى الإنسانية …
عشان كده أنت إنسان مينفعش تكون مش إنسان
الإنسانية لما تضيع لا يتبقى شىء… هي الملاذ الأخير، تضيع الرحمة، تضيع المحبة، يضيع التعاون، تعيش حياة بهيمية… وبالمقابل تنتشر العداوة، الحقد، الأنانية، لدرجة الحروب والقتل.
أيّا كان دينك او مذهبك أو جنسيتك أو لونك أو… انت قبل كل ده إنسان
مزيد من المقالات:
الكيان المادي الخانق .. كيف ينقذ الإنسان روحه ؟
أين أجد إجابات للأسئلة المصيرية ؟ وكيف يتم التوافق ؟
الثقافة وأزماتها.. ما هي الثقافة ؟ وكيف نواجه الأزمة ؟
لقراءة المزيد من المقالات يرجى زيارة هذا الرابط.
ندعوكم لزيارة قناة أكاديمية بالعقل نبدأ على اليوتيوب.
