بعد أن احتل أرواحنا
أنت لازم تلبس ملابس غربية عشان تدخل السينما أو المتحف، لازم تتحشر في بنطلون وقميص عشان تبقى شيك وأنيق وعالمي.
راحت فين ملابس الريفيات في الوجهين القبلي والبحري؟ راحت فين أغطية الرأس المتنوعة؟!
كل ملابسنا اعتبرت علامة على التخلف ويجب التخلص منها، مارس الاحتلال علينا أكبر قدر من العنصرية والإقصاء ثم رحل الاحتلال وتركنا نكرر مقولاته ونزدري أنفسنا.
أنت مثلًا لازم تبني بيتك على الطريقة الغربية، لازم تبني بيوت زي بيوت لندن وباريس ذات المناخ البارد، مش مهم الشمس عندك، مش مهم الطقس، مش مهم إيه يناسبك، لكن ضروري تتخلص من أنماط البناء القديم كلها، لكي تصبح متحضرًا.
وحين تمرض لا تتبع أي وصفة شعبية اختبرها الناس لقرون، وعاشوا مئات القرون يعالجون أنفسهم ويحفظون حياتهم بها، لا تتبع أي شكل طبي إلا أن يكون غربيًا أمريكيًا، وإلا ستكون جاهلًا ومتخلفًا، الطب الغربي هو الطب لا ينازعه شريك، ولا يقبل بأي وصفة حتى لو كانت نعناع أخضر لراحة القولون.
لازم المرأة تبقى بيضاء ونحيفة، لأن البياض هو الجمال، والنحافة هي الأناقة، رغم أن البشرة البيضاء نادرة في بلادنا وعموم الناس لونهم قمحي، إنما لا، لازم يحتلوك من أعماق روحك، فتضبط بوصلة قلبك على البيضاء، وتعشق النحافة، ومن ثم: افتح مغارة علي بابا لبيع كريمات التفتيح وعيادات النحت والتقويم والتصغير والتكبير، (الأرقام مفزعة!).
إحنا ناس محتلة، ومختلة، وبندور حول الغرب، بنحب زيهم، ونكره زيهم، وناكل زيهم، ونلبس زيهم، ونبني بيوتنا زيهم، مش مهم خالص إيه يناسبنا وإيه لا يناسبنا.
حدثت قطيعة شاملة مع الملابس والعمارة والطب وبدأنا من الغرب، لم يتطور أي شيء عندنا، حدث استبعاد واحتقار عجيب لكل ما لدينا، كأننا ولدنا فقط مع الاحتلال.
رحل الاستعمار من بلادنا بعد أن احتل أرواحنا وطبّعها على مقاسه، وجعلنا ننطق بلغته ونشيد بقيمه، ونحلم أن نكون مثله.
مقالات ذات صلة:
هكذا يربي المستعمر ليضمن بقاءه
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
