جدري القرود
منظمة الصحة العالمية أعلنت إن جدري القرود حالة طوارئ صحية عامة. كلنا امبارح قرأنا البوست دا أو سمعنا الأخبار من أي مصدر.
طب إيه؟ المفروض نعمل إيه؟! نقلق ونخاف؟!
أبدًا والله!
أولًا: منظمة الصحة أعلنت إن جدري القرود حالة طوارئ صحية عامة، لكن ما أعلنتهاش جائحة زي الكورونا.
ثانيًا: إحنا أيام جائحة كورونا وفي عز المعمعة والناس بتموت فالشوارع، والعدوى بتطير في الجو كدا طير، تلاقي اتنين بيحضنوا ويبوسوا بعض، ويقول له: واحشني يا صاحبي! يقوم التاني رادد عليه: وأنت أكتر يا جدع!
يقوموا شدين أي كرسيين في أي قهوة متدارية وينزلوا الباب عليهم ويشيشوا، مع إن الشيشة من أكتر الحاجات اللي كانت بتساهم في تفشي فيروس كورونا، والحكومة منعتها وقتها.
بس ما دام منزلين الباب وما حدش شايفهم يبقى إن شاء الله ما حدش هيتعدي ولا حاجة!
بيقولوا يا جدع هنموت بالبتاع اللي بيقولوا عليها كورونا دي! يقولوا زي ما همه عايزين، ما أنا كدا كدا ميت في حبك يا صاحبي!
نيجي بقى لجدري القرود.. وما أكثرهم عندنا الصراحة!
كيف ينتقل فيروس جدري القرود؟
دا مبيعديش غير بالملاصقة التامة، يعني لازم تلمس البثور اللي في المريض بإيدك عشان تتعدي، أو لو عطس في وشك لا سمح الله.
فيروس كورونا باشا بذات نفسه كان بيبات على الأرصفه وفي الجو، اللي هو ممكن وأنت في بيتكم ومنزلتش الشارع بأيام بس تتصاب، وكنا نتجنن طب جات منين الإصابة؟
لكن لا والله جدري القرود مش كدا خالص!
نقطة تانية مهمة..
جدري القرود مش موجود في مصر حتى الآن، يعني كل اللي بعتلي صور وخايف ما يخافش بس يروح يكشف طبعًا، وارد يكون مرض جلدي عادي.
وأنتي بصفتك أم بقى عليكي تعرفي إن الأمراض الجلدية بتنتقل عن طريق اللمس، فما فيش داعي تلمسي طفلك دا وتلمسي طفلك التاني بعده على طول من غير ما تغسلي إيدك لأن أنتي كدا بتنقلي العدوى من المريض إلى السليم.
ما هي أعراض مرض جدري القرود؟
إيه أعراض المرض؟!
أولًا هي عدوى فيروسية، فترة حضانتها ما بين وقت الإصابة حتى ظهور الأعراض من ٧ لـ١٤ يوم، يعني ممكن تتصاب النهاردا بس ما تحسش أو تظهر أعراض غير بعد أسبوع.
الأعراض بقى زي:
- ارتفاع في درجةالحرارة.
- طفح جلدي.
- صداع.
- ألم في العضلات.
- آلام في الظهر.
- تضخم في الغدد الليمفاوية.
- الشعور بالتعب والإرهاق.
المرض ما بيتنقلش غير بظهور الأعراض، أي مريض عندك اعزله عن باقي البيت وتجنب ملامسته أو ملامسة أدواته أو ملابسه أو تنام مكانه.
وزي ما قولتلكم مفيش حالات ظهرت في مصر، ودي مجرد رفع حالة طوارئ، مش وباء زي الكورونا.
طمئنوا الناس، ويا رب أكون عرفت أطمئنكم.
مقالات ذات صلة:
فيروس كورونا على أي الأحصنة نراهن؟
الخدمة الاجتماعية الطبية وإدراة الأزمات
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
