جزيرة الثعابين .. أخطر مكان على وجه الأرض!
النهاردا هحكيلك حكاية مرعبة شوية وممكن تخليك تقشعر وتحلم بكوابيس لو تخيلتها، تخيل إن في جزيرة صغيرة على سواحل البرازيل، تعتبر أخطر مكان ممكن تروحه على كوكب الأرض تقريبًا، ودا عشان كل متر مربع في الجزيرة دي مليان بعشرات التعابين الضخمة شديدة السمية!
الجزيرة دي مقفولة تمامًا وعليها حظر سفر من الحكومة البرازيلية، وأي محاولة للوصول إليها هتبقى أشبه بحكم إعدام أو محاولة انتحار، مش بس عشان التعابين اللي عليها عددها يقدر بعشرات الآلاف حرفيًا، من نوع نادر ومهدد بالانقراض، بل لإن عضة واحدة منها ممكن تقتلك في دقايق دون أدنى مبالغة!
مش بس كدا، الجزيرة دي مرتبطة بأساطير شعبية عند الناس هناك في البرازيل، بتحكي عنها قصص غريبة ومخيفة فعلًا، فحضر بقى كوباية شايك الحلوة ونعناعك في إيدك، وتعالى معايا أحكيلك القصة كلها من البداية.
أين توجد جزيرة الثعابين؟
بص يا عم، الجزيرة اللي إحنا بنتكلم عنها دي، اسمها “إيلا دي كيميدا جراندى” (Ilha da Queimada Grande)، ومعناها بالبرتغالي “جزيرة الحريق الكبير”، موجودة على بعد 32 كيلومتر من سواحل البرازيل جنوب ولاية ساو باولو.
القصة ورا اسمها دا إن زمان السلطات البرازيلية كانوا عايزين يحرقوا الغابة الموجودة على الجزيرة عشان يفضوا المكان بالكامل لزراعة الموز اللي كانت ناجحة جدًا اقتصاديًا في بدايات القرن العشرين.
بس لما الناس راحوا هناك وبدأوا فعلًا يحرقوا الشجر والخضرة، اتفاجأوا بحاجة مرعبة أكتر من أي كابوس شافوه في حياتهم! عشرات الآلاف من التعابين والصراصير والحشرات الضخمة خارجة عليهم من كل حتة في الغابة، بتهاجمهم وتلدغهم في كل منطقة من أجسامهم، والتعابين دي مكانش في مفر ولا مهرب منها لأي حتة، لإنها كانت موجودة في كل متر مربع من الجزيرة حرفيًا!
اقرأ أيضاً: جزيرة نورث سينتنل
عدد الأفاعي في جزيرة الثعابين
من هنا بدأ السكان يكتشفوا ببطء مدى خطورة المكان اللي هما فيه، واتضح إن الجزيرة دي عايش عليها واحد من أخطر أنواع التعابين في العالم، واللي مش موجود في أي حتة تانية على الكوكب غير الجزيرة دي، وعشان كدا اضطروا يسيبوا اللي بيعملوه ويهربوا، ومن اللحظة دي اتحرمت الجزيرة على البشر بعدها، وأصبحت معروفة في وسط الناس باسم “جزيرة التعابين” (Snake island).
الجزيرة دي يا صديقي مساحتها تقريبًا 430 كيلومتر مربع، وعايش عليها حسب بعض التقديرات والحسابات، أكتر من 400 ألف تعبان وحشرة من أنواع مختلفة! يعني تقريبًا في هناك تعبان في كل متر مربع، ومفيش خطوة هتاخدها إلا أما هتلاقي فيها تعبان أو صرصار ضخم تحت رجلك!
ثعبان رأس الرمح الذهبي
ومن وسط التعابين دي كلها، في منهم 4000 تقريبًا من نوع نادر ومهدد بالانقراض، طوله بيوصل لأكتر من نص متر، ومش موجود غير في الجزيرة دي بس، اسمه “أفعى الرمح الذهبية” (golden lancehead viper)، من أقارب أفعى رأس الحربة (Fer-de-lance)، اللي تعتبر أكتر تعابين قاتلة في البلد كلها، والمسؤولة عن 90% من إجمالي عدد الوفيات بالتعابين في البرازيل بالكامل كل سنة.
بس المرعب بقى إن أفعى الرمح الذهبية دي أخطر بكتير من أخواتها اللي على البر الرئيسي، وسمها فتاك لدرجة إنه لو تعبان منهم عضك، فاللحم اللي حوالين العضة هيبدأ يدوب ويتحلل، وجسمك نفسه هيبدأ يدوب من جوه، وهيجيلك نزيف في الأمعاء والمخ لحد ما هتموت بعدها بساعة بالكتير لو مخدتش الترياق!
دا بالضبط اللي حصل زمان لصياد كان ضايع في قلب البحر بعد عاصفة، واضطر ينزل بالمركب بتاعه على شط الجزيرة دي، ودخل الغابة عشان يدور على حاجة ياكلها، عشان يتفاجأ بالتعابين اللي ماليه الشجر والزرع حواليه، وبعدها بأيام لقوه ميت في المركب بتاعه وحواليه بركة من الدم، بعد ما حاول يهرب من الجزيرة بعد ما التعابين عضته عشرات المرات في كل حتة في جسمه!
في قصة مخيفة تعتبر أسطورة شعبية هناك في البرازيل، بتحكي عن الجزيرة دي وبتقول إنه زمان كان في حارس عايش هو ومراته وابنه الصغير هناك في المنارة الصغيرة المبنية في وسط الغابة اللي على الجزيرة، وفي يوم التعابين هجمت عليهم ودخلتلهم من الشبابيك وعضتهم كتير جدًا، وملحقوش يهربوا منهم وماتوا كلهم في قلب الغابة ومحدش لقى جثثهم لحد وقتنا هذا!
اقرأ أيضاً: المدنُ المسحورةُ.. وهمٌ جغرافي وتاريخٌ أسطوري
نشأة جزيرة الثعابين
لكن السؤال بقى اللي أكيد خطر في بالك، إيه السبب في وجود كل الكمية دي من التعابين على الجزيرة دي بالذات؟! واشمعنى النوع شديد السمية دا مش موجود في أي حتة تانية على الكوكب؟!
الحقيقة يا صديقي السؤال دا له إجابتين، الأولى أسطورة شعبية بردو بتقول إنه زمان في أيام عصور القراصنة، كان في قرصان معين هو اللي جاب التعابين دي وحطها على الجزيرة، عشان يحرسوا كنز كبير جدًا مدفون هناك، ومحدش يقدر يقرب منه أبدًا، وفي ناس كتير هناك مصدقين القصة دي.
بس الحكاية الحقيقية بقى أقدم من كدا بكتير، وبتحكي قصة أغرب من كدا شوية.
زمان من 11 ألف سنة تقريبًا، الجزيرة دي كانت جزء من البرازيل نفسها، وكان كل المساحة اللي بينها وبين البر الرئيسي دي أرض يابسة، لكن مع نهاية العصر الجليدي، بدأ مستوى سطح البحر في الارتفاع بشكل كبير جدًا وصلت لـ60 متر تقريبًا، ودا أدى لإن الأرض اللي كانت بتربط بينها وبين البرازيل اختفت تحت المية، وبكدا أصبحت الجزيرة منفصلة عن البر الرئيسي ومنعزلة تمامًا، وكل أجناس التعابين اللي كانت موجودة جواها اتسجنت عليها.
مع الوقت بعدها، التعابين دي كلها مبقتش قادرة ترجع للبر الرئيسي تاني، ومبقاش عندهم أي مصدر للأكل خالص غير الطيور اللي كانت بتنزل على الجزيرة من وقت للتاني، بس المشكلة بقى إن سم التعابين دي زمان كان زي سم أخواتها اللي على البر الرئيسي، شديد وخطير أيوه، بس مش سريع بما فيه الكفاية، وكانت الطيور بتهرب منهم قبل ما يلحقوا ياكلوها.
عشان كدا مع مرور الزمن، حصلت طفرة بيولوجية استثنائية في التعابين دي بالذات، ومحصلتش في أي فصيل تاني منها خالص، والطفرة دي خلت سمها يتطور لحد ما أصبح مركز جدًا وشديد الخطورة، لدرجة إنه يقدر يقتل أي طائر في ثانية واحدة تقريبًا من العضة!
تعرف على: أقوى حيوان في العالم
جزيرة الموت أم مصدر للتعافي
الفكرة إن السم دا رغم خطورته، فهو نادر جدًا ومهم جدًا بالنسبة لعلماء الأدوية والباحثين في المجالات الطبية، ودا لأن في مواد وعناصر جواه بيستعملوها في صناعة أدوية مهمة جدًا للصحة البشرية، وفي بعض الأبحاث بتقول إن المركبات المستخرجة من السم دا بالذات، ممكن في المستقبل تُستَعمل في علاج أمراض القلب والسرطان!
عشان كدا، في هناك في البرازيل ناس كتير بيشتغلوا حاجة اسمها (Bio Pirates)، وبيروحوا للجزيرة دي مخصوص عشان يصطادوا التعابين دي ويبيعوها بعد كدا لشركات الأدوية في السوق السودا، وسعر الواحد بس منها بيوصل لأكتر من 30 ألف دولار!
بسبب دا، الحكومة البرازيلية فرضت حظر شامل على الجزيرة وحطوا قوانين بتمنع أي شخص يقرب منها، حفاظًا على أرواح الناس، وعشان يحافظوا على التعابين دي من الانقراض لأن أعدادها بتقل كل سنة بسبب عمليات الصيد، والجهة الوحيدة المسموح ليها بدخول الجزيرة دي الجيش والبحرية البرازيلية، والباحثين وعلماء البيئة والأحياء اللي معاهم تصاريح خاصة.
فلو أنت في يوم من الأيام قررت تسافر البرازيل ورماك حظك السيئ جنب الجزيرة دي، افتكرني كويس وافتكر المقال دا، وحاول ما تغامرش وتعتب برجليك الشط بتاعها مهما كان السبب.
دا لو أنت حياتك مهمة بالنسبة لك يعني!
مصادر:
https://a-z-animals.com/blog/snake-island-the-true-story-of-the-most-snake-infested-island-on-earth/
https://allthatsinteresting.com/snake-island
https://www.youtube.com/watch?v=oa1Tu6BRFxU
https://www.atlasobscura.com/places/snake-island-ilha-de-queimada-grande
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
