أغرب وأقوى كائن
اللي في الصور ده يُعد أغرب وأقوى كائن حيّ موجود على الأرض، وسط شكوك علمية بأنه “مخلوق فضائي” يعيش معانا على نفس الكوكب، اللي قُدامك في الصور ده اسمه “دب البحر” أو الـ(Tradigrade) وهو أقدم من الديناصورات على الأرض.
عُمر فصيلته على الأرض أكتر من 400 مليون سنة، يعني حرفيًا أقدم من الديناصورات، طوله بيتراوح من ١ ملليمتر لـ١.٥ ملليمتر، وبرضه بنعتبره حيوان مش حشرة على الرغم من حجمه الضئيل جدًا، حيوان له ثمان أقدام بيمشي عليهم بحجمـه الصغير ده كله، بس إزاي أقوى حيوان؟
لماذا دب الماء هو أقوى حيوان في العالم؟
الحيوان المجهري ده موجود في كل حتة في العالم حرفيًا، أي مياة عذبة هو عايش فيها، وكمان يقدر يعيش في المياة المالحة زيّ البحار والمُـحيطات، الحيوان ده حرفيًا عايش في أي حتة، اللي هو أي مكان ممكن تتخيله لحد بطون الجبال، ومُنتشر بشكل مهول لدرجة أنه ممكن يكون عايش جُوّة جسمك وانتَ مش حاسس، لكن قبل ما أقولك على قُدراته الخـارقـة، لازم أقولك إن العلماء مُنبهرين بيه بشكل مهول وبيدرسوه عشان يتعلموا منه قُدراتـه الغريبة والنادرة دي، ومِـن شدة انبهارهم بقدراته دي قرروا في سنة 2007 أنهم ياخدوه في رحلة للفضاء ويشوفوا هيقدر ينجوا هناك كمان ولا إيه؟!
وصلوا بيه للمركبة الفضائية الروسية “فوتون- إم 3” في مُهمتها لاستكشاف القمر، مُتخيّل إن ده فعلًا حصل؟ طب مُتخيّل النتيجة؟! النتيجة يا رفيق أنه تعايش عادي ومش بس كده، ده تزاوج ووضع بيض وفقس! الحيوان ده وبيضه استحمل ضغط مُنخفض وانعدام الأكسچين ورياح شمسية شديدة وعاش عادي في الفضاء.
شيء آخر مُدهش، العلماء عايزين يعرفوا هو يقدر يستحمل درجة حرارة قد إيه فسخنوا عليه لدرجة ٣٧٥ فهرنهايت ومماتش، طيب يستحمل برودة قد إيه؟ في درجة حرارة ٢٧٠ تحت الصفر عاش برضـه، طب نجرب أشعة جاما القاتلة مباشرةً عليه كده؟ مماتش برضـه.
من أين جاء دب الماء؟
مُعدل أعمار الحيوان الواحد منـه بتوصل ٢٠٠ سنة، طيب بيتغذّى على إيـه؟ بيأكل النباتات عادي، وممكن اللحوم لدرجة أنه ممكن يأكل اللي أصغر منه ومن نفس جنسه لو ملقاش أكل خالص.
طيب ممكن يستحمل يعيش في عُمق المُحيطات وتحت ضغط رهيب؟ آه يا رفيق ده ممكن يعيش في خندق ماريانا اللي هو أعمق نقطة على الأرض في المُحيط.
بس تعالى أفهمك إزاي مُمكن يكون جاي من الفضاء، الفضاء الخارجي بعيدًا عننا ده ساعات بالمعنى الدارج كده بتُقع منـه نيازك وأحجـار صغيرة كده علينا.
افتراضيـة بتقول إن الحيوان ده كان مثلًا لازق في نيزك وسقط على الأرض كده، ومنه انتشر هنا عندنا في الأرض، وده افتراض لاحتمال وجود حياة خارج الأرض، طيب والمُعضلة بالنسبة للعلماء فين؟
دب الماء ينجو في النار والجليد وحتى في الفضاء
هـُما عايزين يكتشفوا إزاي كائن زيّ ده قدر أنه يعيش في كل الظروف دي، وإحنا البشر من سُكان الأرض أصلًا ساعات في مننا ناس بتموت من الحرارة الزيادة أو البرودة الزيادة، ده لأن غالبًا ومُحتَمل إنـنا أصلًا كائنات فضائية!
إزايّ؟
مـتنساش إن الإنسان مخلوق وعاش في الجـنة، ونزلنا الأرض وتأقلمنا عليها لحد النهاردة، صحيح مش مظبوط زيّ باقي الحيوانات اللي محتاجتـش تشغل عقلها عشان تحمي نفسها من البيئة الأرضيّـة، بس تأقلمنـا إلى حد كبيـر، ويظل دب البحر أو الـ(Tradigrade) أغرب كائن حيّ على الإطلاق، وفي الأخير لا نملُك إلا أن نقول سبحان الخالق العظيم.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
