يعتبر من الأمراض الحديثة نسبيًا في الطب، يعني العالم بدأ يتنبه للمرض ده في الستينيات من القرن الماضي (من ٧٠ سنة تقريبًا).
طيب إيه المشكلة في كده؟ المشكلة في حاجتين:
أولًا: قلة وعي الناس بالمرض ده وأعراضه وكيفية تشخيصه.
ثانيًا: بعض الأطباء يبالغ بشكل كبير في تشخيص المرض ده، يفسر أي شكوى أو عرض تنفسي للمريض على إنه مرض انسداد التنفس أثناء النوم.
ده طبعا بيكلف المريض مبالغ كبيرة، لأنه بيضطره يعمل جلسات تشخيصية وعلاجية، غير تكلفة جهاز السيباب (CPAP) اللي هيضطر يشتريه بمبلغ كبير، وممكن ما يكونش محتاج له أساسًا.
أعراض انسداد التنفس أثناء النوم
طيب علشان ما نقعش في الخطأ ده، هنشرح نقاط مهمة عن المرض:
* أولا.. إمتى تشك إنك مصاب بالمرض؟
في مجموعتين من الأعراض لازم يظهروا عليك علشان تشك إنك مصاب بالمرض:
المجموعة الأولى (أعراض ليلية):
ودي غالبًا مش هتلاحظها إنت، وإنما هيلاحظها الشخص اللي بينام جنبك في نفس الأوضة، ومنها إنك تكون بتشخر وإنت نايم أو إن نفسك يوقف وإنت نايم أو إنك بتتقلب كتير في السرير، بالإضافة إلى أعراض تانية هتحس إنت بيها، زي كترة الكوابيس والاختناق أثناء النوم والاستيقاظ المتكرر لدخول الحمام (والعرض ده تحديدًا بيتشابه مع مرضى السكر).
المجموعة الثانية (أعراض نهارية):
ودي بتشمل الشعور بالإرهاق وعدم كفاية النوم والصداع وعدم التركيز وسرعة الانفعال، وأهم عرض نهاري هو إن الشخص ينام على نفسه كتير بالنهار خاصة لو كان قدام تلفزيون أو في المواصلات.
كيف يتم تشخيص انسداد التنفس أثناء النوم؟
طيب لو الأعراض دي كلها عندي، إيه المفروض اللي يتم؟ في الحالة دي المفروض إن الطبيب بيقيّم ٨ نقاط مهمة وهي:
- نوع المريض ذكر أم أنثى (طبعا الذكور أكتر إصابة بالمرض).
- سن المريض (كل ما السن زاد عن ٥٠ سنة زادت فرص الإصابة بالمرض).
- وجود شخير من عدمه.
- حد لاحظ حدوث توقف للتنفس أثناء النوم ولا لأ؟
- الشعور بالتعب والإرهاق من عدمه.
- هل بيعاني المريض من ارتفاع ضغط الدم ولا لأ؟
- قياس محيط رقبة المريض (هل يزيد عن ٤٠ سم أم لا؟).
- قياس مؤشر كتلة الجسم (وزن المريض على مربع طوله)، هل يزيد عن ٣٥ كجم/م² أم لا؟
لو جبت ٣ فأكثر من النقاط اللي فوق فده معناه احتمالية إصابتك بالمرض كبيرة، طيب إيه اللي المفروض يتم بعد كده؟ المقال القادم هنشرح الحلول.
يتبع…
مقالات ذات صلة:
الفيروس المخلوي التنفسي .. سؤال وجواب
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
