الفيروس المخلوي التنفسي .. سؤال وجواب
س١)) إزاي بيسبب الفيروس المخلوي المرض؟
بمجرد وصول الفيروس المخلوي للخلايا المبطنة للجهاز التنفسي العلوي أو السفلي بيبدأ في إصابتها مباشرة والتكاثر بداخلها لفترة من الوقت ممكن توصل لـ٨ أيام، وفي نهاية المطاف بيصيب عدد من الخلايا المبطنة للجهاز التنفسي بالتلف وأحيانا بيسبب ضيق في الشعب الهوائية، وبعد كده وبعد اكتمال عملية التكاثر بينطلق عدد أكبر من الفيروسات مع رذاذ عطس أو كحة المريض علشان تصيب الفيروسات أشخاص تانيين وتبدأ دورة جديدة.
س٢)) طيب إزاي بيوصل الفيروس المخلوي للجهاز التنفسي؟
بيقدر الفيروس المخلوي إنه يوصل لجهازك التنفسي من خلال فتحات الأنف أو الفم أو من حتى من خلال العينين نتيجة فركهم بيد ملوثة.
س٣)) مين هما الأشخاص الأكثر عرضة للإصابة بالفيروس؟
كل الأشخاص معرضين إنهم يتصابوا بالفيروس بدرجات مختلفة، لكن أكتر ناس ممكن تتصاب بسهولة هم الأطفال وكبار السن وأصحاب الأمراض المزمنة زي أمراض القلب والرئتين.
طبعًا معدلات الإصابة بتزيد في فصل الشتاء.
العدوى بالفيروس المخلوي التنفسي
س٤)) إزاي بينتقل الفيروس المخلوي من الشخص المصاب للشخص الطبيعي؟
بيتنقل عن طريق الهواء بأكثر من وسيلة زي:
– رذاذ الكحة.
– رذاذ العطس.
– تقبيل الأطفال.
أو عن طريق لمس الطفل للأسطح الملوثة بالفيروس وبعد كده لمسه لأنفه أو فمه أو عينيه.
أعراض الفيروس المخلوي التنفسي
س٥)) إيه هي أعراض الإصابة بالمرض؟
تختلف أعراض الإصابة بالمرض من شخص للتاني، وغالبًا مش بتظهر مرة واحدة وإنما في شكل مراحل.
فلو الإصابة في الجهاز التنفسي علوي هتؤدي لأعراض تشبه نزلة برد أو التهاب الجيوب الأنفية، يعني ممكن يكون فيه عطس أو رشح أو انسداد في الأنف أو ارتفاع في درجة الحرارة.
أما لو الإصابة امتدت ووصلت للجهاز التنفسي السفلي فهتكون النتيجة الإصابة بالتهاب شعبي حاد، وده أعراضه غالبًا الكحة والبلغم وضيق التنفس وصوت صفير أو أزيز مع النفس.
س٦)) إيه هي المدة اللي بيتعافى فيها الشخص بعد الإصابة بالفيروس؟
غالبًا الشخص بيتعافى خلال أسبوع، لكن في بعض الأحيان ممكن تطول لأسبوعين.
س٧)) هل ممكن يسبب الفيروس التهاب رئوي شديد ونقص في الأكسجين؟
ممكن، لكن ده قليل جدًا جدًا، ومش بيحصل غالبًا إلا عند الأشخاص المصابين بنقص شديد في المناعة.
اقرأ أيضاً: علاقة التغذية بالمناعة
تعرف على: مرض الفينايل كيتون يوريا
اقرأ أيضاً: الإنفلونزا الإسبانية في مصر
طرق الوقاية من الفيروس المخلوي التنفسي
س٨)): إزاي نحمي نفسنا وولادنا من الإصابة بالفيروس؟
في طرق كتيرة ممكن نعملها للوقاية من الإصابة:
- نحرص على غسل الأيدي باستمرار.
- نلبس الكمامة في الأماكن الزحمة.
- نتجنب مخالطة المصابين.
- تجنب لمس العينين أو الفم أو الأنف خاصة لو اليدين مش نظيفة.
- استعمال المناديل عند العطس أو الكحة.
- نتجنب تقبيل الأطفال علشان النفس ممكن ينقل العدوى ليهم بسهولة.
- ما نستعملش أدوات حد تاني، زي الملاعق والأكواب والزمزميات والشاليمو وغيرها، خاصة بالنسبة لطلاب المدارس.
- غسل ومسح الأسطح جيدًا.
- يفضل بقاء الأطفال المصابين في المنزل، وعدم مخالطة زملائهم حتى يتعافوا من الإصابة.
- الإكثار من شرب السوائل.
نصائح لتقوية المناعة
س٩)) إيه مأكولات ممكن تكون مفيدة للمناعة؟
– الفواكه خاصة البرتقال واليوسفي والجوافة.
– الخضروات مثل الفلفل الأخضر.
– العصائر زي الليمون.
– عسل النحل.
علاج الفيروس المخلوي التنفسي
س١٠)) هل فيه لقاح للفيروس المخلوي؟
لا، لا يوجد له لقاح.
س١١)) إيه التعليمات اللي أعملها لو اتصبت بالفيروس؟
– الراحة.
– شرب السوايل.
– خافض حرارة عند اللزوم.
– الإكثار من المشروبات والمأكولات المنشطة للمناعة.
– زيارة الطبيب لوصف العلاج اللازم إذا لزم الأمر.
مع تمنياتي بدوام الصحة والعافية.
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
