هــرم مــقلوب
الشمس غابت من سنين
والبدر تاه
حتى النجوم
وقفت على باب السما
تاخد عــزاه
والحلم تاه
بين المآسي والأنين
بقالنا سنين هرم مقلوب
تاريخ مغلوب
غروب في غروب
ومش نافع فرات ولا نيل
في ديل الغرب بنتبت
لحد القيمة ما انكبت
ونخل العزة بيطاطي
يسيل الدم من تمرُه
ومجد بيبكي على عمره
ما بين الغش والتضليل
ما بين الليل
وبين الليل بنتكفى
ونتخفى في جحر العار
وسيبنا الدار
يدور فينا على خندق
بنـتشدق بإنـا أهـل
وداء الجهل في الجتة
وجوه العته عتين
ما كنا سبوع في وادينا
بقينا في الوهن ساكنيين
بقالنا سنين مستسلمين
ومسلمين للانهيار
سواقي النار بتروينا
وحوالينا الوجع إعصار
رافعين شعار الصمت
ورايات الخنا
في عنينا
بتموت السنة ورا السنة
واحنا في قلب المحزنة
واقفين ثبات
بنولف المقامات
ونغرق في الغُنا
ملعون أبوها العكننة
طول عمرنا متعذبين
بقالنا سنين
قاعدين بنستنى النهار
والنهار صعبان عليه
كل ما يحاول يفـتـح
السراب يقفل عينيه
الليل طويل ومالوش حدود
والفجر مش عارف يعود
والشمس واقفة في انتظار
الشرق يفتح للصباح
والصباح محتاج يشوفنا
بالكفاح متسلحين
بقالنا سنين
فاتحين كتاب الذكريات
اللي فات نردم عليه
واللي جاي نكسيه شموخ
والتاريخ مليان ملامة
والندامة حالها باين
والكماين جوه فيتو
بس هُس خلاص فينيتو
بكرة هيحطولنا كيتو
واللي مش طايق يطق
واللي مدايق يعبي
والطبول ع الراس تـدُق
كل عام والظلم طايح
والفضايح مستـتبة
والعزيمة يأس جـامح
والنـصايح نص لبة
واللي نادى واللي لبى
في الحقيقة ميتين
بقالنا سنين
عايشين بنحلم بالخلاص
نايمين بنحلم
حلم مش لاقي الدليل
تايه في سوق المستحيل
واقف في وسط العتمة
مستني القرار
محتار ما بين
مص الشفايف والعويل
شايف زهور الجيل بتفتل
من دموعها حبال غسيل
والشعوب بتشيل بلاها
لما صبح الويل ويلين
بـقالنا سنين
بنكتب ع الجبين العار
بنمشي بس بالمندار
وبوسنا الأرض
لما الذل دهوسنا
وفي نفوسنا الخصام حمضان
وأحضان المحبة شوك
وبين شاكك
وبين مشكوك
ديوك والقهر كابسنا
ولمـا الجهل جرسنا
كنسنا كل مساجدنا
وشلشلنا وعدِّدنا
وزودنا المبله طيـن
بقالنا سنين
وعين العقل مش فينا
ومش شايفين خطاوينا
وحطينا ما بينا سدود
وشمتنا الوجود فينا
حفينا والصـدا كلنا
ودوخنا كتير في مشاكلنا
ولما النفط فـشكـلنا
فـشلنا قـام وشنكـلنا
وشكلنا الهلاك طوابير
وبين خنزير وبين جنزير
زفير الشر بيشوطنا
ولما الحقد شلفطنا
خبطنا دماغنا في القوانين
بقالنا سنين
حوار اليأس متواصل
وبين الفصلة والفاصل
مفاصل شملنا سابت
وخابت صرخة الثورة
عشان العورة معوورة
وجوة الصورة محروقين
