وظائف المستقبل شكل المهن سنة 2040
مع التطور العلمي والتكنولوجي اللي بيوصل ليه العالم كل يوم، شكل الكوكب نفسه بيتغير ما بين ساعة والتانية، واللي كان الناس بيشتغلوه وبيعملوه زمان، ممكن جدًا في المستقبل يبقى دقة قديمة، وميأكلش عيش.
عشان كده دول كتير بره بدأت تستثمر في تعليم ولادهم التخصصات اللي هتبقى مطلوبة في المستقبل، عشان يضمنوا للقوة العاملة اللي عندهم إنها تبقى حديثة ومواكبة لتطورات العصر.
المهن المستقبلية اللي بدأت تنتشر وتتطلب دلوقتي دي، وغيرها من اللي لسه هيبدأ، هتغير شكل العالم كله كمان 20 سنة بالكتير أوي.
هات بقى كوباية شايك الحلوة والنعناع في إيدك، وتعالى معايا أحكيلك على أهم الوظايف والتخصصات دي، ونشوف العالم رايح بينا على فين في المستقبل.
أهم مهن المستقبل
بص يا سيدي، في الأول كده لو إحنا النهارده جينا وحاولنا إننا نتنبأ بشكل مهن ووظايف المستقبل، فإحنا مش هنقدر نعدهم ولا نحصرهم خالص.
ده في بعض الإحصائيات بتقولك إن في أكتر من 150 نوع وظيفة وشغلانة هتظهر في المستقبل كمهن جديدة تمامًا، أو امتداد لمهن تانية موجودة دلوقتي.
معظم خبراء التكنولوجيا والمستقبليات المشهورين بيتوقعوا إن لما تيجي سنة 2040 بالكتير، هنلاقي إن نسبة اعتماد الشركات على برامج الذكاء الاصطناعي وتكنولوجيا الروبوتات والبرمجة وصلت للذروة، وهيبقى العالم كله ماشي بالذكاء الاصطناعي والأجهزة الذكية والمميكنة.
لو مشينا ورا الناس دول، وتخيلنا دلوقتي إننا عايشين سنة 2040، هنلاقي إن شكل العالم والمجتمع كله بقى مختلف تمامًا عن شكله دلوقتي.
مهندس روبوتات
وقتها مثلًا هنكون أخيرًا قدرنا نبتكر روبوتات الخدمة المنزلية، اللي دايمًا كنا بنشوفها في أفلام الخيال العلمي.
تخيل كده إنك في المستقبل هيكون تحت إيدك وفي بيتك روبوت يعملك كل حاجة، سواء طبيخ أو غسيل أو حتى يساعدك في شغلك وحياتك.
عشان كده هتظهر وظايف جديدة ليها علاقة بالروبوتات دي، زي مهندسين الروبوتيكس (Robotics)، ومسؤولين البرمجة أو الـ(Programming) والذكاء الاصطناعي (AI) والـ(Machine Learning).
كل الوظايف دي في المستقبل هيكون الطلب عليها كبير جدًا عشان تغطي احتياجات السوق، اللي هيبقى أساس القوة العاملة فيه روبوتات وأجهزة مميكنة شغالة بالذكاء الاصطناعي.
المبرمجين ومهندسين السوفت وير بالذات متوقع إنه قريب هيزيد الطلب عليهم بشكل كبير جدًا، وده عشان الشركات العالمية كلها عندها توجه موحد دلوقتي لإنهم يخلوا اعتمادهم أكبر على البرامج والآليات المميكنة.
عشان كده وظايف البرمجة بتزيد ولسه هتزيد أكتر، والحلو في الموضوع إن المبرمجين دول هيقدروا إنهم يشتغلوا عن بعد في أي شركة في العالم من بيوتهم.
محلل البيانات
كمان مبرمجين ومهندسين الروبوتات هيزيد عليهم الطلب جدًا، بسبب تطور تكنولوجيا الذكاء الاصطناعي وإنترنت الأشياء أو الـ(Internet of Things).
ده عشان همَّ اللي هيقدروا يزيدوا من كفاءة الروبوتات والأجهزة الآلية، ويصممولها خوارزميات تحسن أداءها وتخليها تتعلم خبرات جديدة بشكل أسرع وأوسع.
الروبوتات دي هتكون داخلة في كل حاجة حرفيًا، سواء الخدمة في البيوت أو البيع في المحلات الصغيرة، أو حتى التصنيع التقيل في المصانع الكبيرة واستكشاف الفضاء.
عشان المستقبل هيكون معدل انتشار واستخدام المعلومات والداتا بتاعت الشركات فيه أكبر بكتير، فمتوقع كمان يزيد الطلب على محللي البيانات أو الـ(Data Analysts).
المحللين دول هيصنفوا وينظموا المعلومات اللي بتدخل للشركة ويعالجوها، ويساعدوا الشركات إنها تعمل خطط واستراتيجيات لشغلها على المدى البعيد.
خبير أمن سيبراني
زي ما هو بادئ يحصل دلوقتي، الشركات الكبيرة في المستقبل هيكون شغلها معتمد بالكامل على المعلومات والأجهزة الذكية والمميكنة، وهيقل اعتمادهم على الموظفين التقليديين.
بسبب ده هيكونوا دايمًا معرضين في أي وقت للهاكرز وهجمات القراصنة والاختراقات الرقمية، اللي ممكن تسرق الداتا بتاعتهم أو توقعلهم السيرفرات الخاصة بيهم وتوقف شغلهم كله.
عشان كده بالفعل بدأ يزيد الطلب دلوقتي على خبراء الأمن السيبراني (Cyber Security Experts)، والمختصين بحماية الشبكات الإلكترونية من الاختراق.
متوقع إنه في خلال سنين قليلة، هيوصل الطلب ده لليفل عالٍ جدًا، وهيكون شغل خبير الأمن السيبراني ده زي منجم الدهب حرفيًا، خصوصًا لإن المتخصصين فيه قليلين جدًا ويتعدوا على الصوابع.
مختص الطباعة ثلاثية الأبعاد
في المستقبل بردو هتحصل ثورة تكنولوجية في عالم الطباعة ثلاثية الأبعاد، والثورة دي بالفعل بدأت تظهر دلوقتي.
بدأنا نشوف تصميمات عربيات وبيوت وطيارات وأسلحة بتتعمل بالطباعة المجسمة ثلاثية الأبعاد.
حتى في الطب نفسه، دلوقتي بدأوا يعملوا أعضاء بشرية تتزرع للناس باستعمال التكنولوجيا دي.
عشان كده بالفعل الطلب بدأ يزيد وهينتشر أكتر في المستقبل على متخصصين الطباعة ثلاثية الأبعاد دي.
هيكون ليهم وزن وتقل كبير جدًا في سوق العمل في خلال سنين قليلة، ومرتباتهم هتكون عالية جدًا بالمقارنة بغيرهم من التخصصات، لإنهم هيكون بيعتمد عليهم في كل حاجة حرفيًا.
متخصصين هندسة الطاقة البديلة
عندك كمان واحد من أكتر التخصصات المطلوبة في المستقبل هيكون مهندسين الطاقة البديلة، اللي هيقدروا يشتغلوا على إنتاج واستخدام مصادر الطاقة النظيفة اللي مش بتلوث البيئة.
ده طبعًا عشان الكوكب دلوقتي بيمر بتغير مناخي شديد وقاسٍ بسبب الإسراف في استعمال مصادر الطاقة البترولية.
متوقع إن المشكلة دي هتزيد أكتر في المستقبل وهتسبب كوارث بيئية، وهيزيد معاها الطلب على متخصصين هندسة الطاقة البديلة عشان يلاقولها حلول.
اقرأ أيضاً:
معلم عن بعد
حتى التعليم نفسه في المستقبل هيتغير شكله، ومش هيبقى مقتصر على إن الطلاب تروح المدارس عشان يدخلهم مدرس ويشرحلهم جوة فصل فيه 100 طالب.
لأ، متوقع جدًا إنه في المستقبل معظم التعليم يكون عن بعد، وهتتحول وظيفة المدرس التقليدية إلى وظيفة معلم عن بعد أو (Online Tutor).
ده عشان تطور المجتمع السريع وقتها هيخلق توجه ناحية التعليم الذاتي والرقمي، هيخلي المدارس نفسها تبقى موضة قديمة.
بالنسبة للطب بقى، فوظيفة الدكتور في المستقبل هتكون في خطر، بسبب إن هتكون في برامج ذكية بتشتغل بالذكاء الاصطناعي، وبتقدر تشخص الأمراض وتعالجها.
كمان هيكون الأطراف والأعضاء الصناعية منتشرة ورخيصة، وبالتالي هيكون اعتماد الناس على الدكاترة التقليديين أقل بكتير، وهتبقى كل حاجة مميكنة ومش محتاجة لتواجد بشري.
مختص نفسي
بسبب الثورة التكنولوجية دي، فشريحة كبيرة من الناس هيكونوا مفتقدين للتعامل مع ناس زيهم، وهيكون كل تعاملهم مع روبوتات أو أجهزة مميكنة.
كمان بسبب تأثير الإعلام الرقمي والسوشيال ميديا الضار في الناس، فمعظم البشر هيكونوا غصب عنهم بيربطوا سعادتهم بالماديات، وبحياة المشاهير اللي بيشوفوهم على السوشيال ميديا، وهيبدأو يحسوا بالفشل والعجز.
شريحة كبيرة من المجتمع هيكون عندها احتقان وكبت نفسي وفراغ عاطفي، وهيبقوا فاقدين الثقة في نفسهم.
نتيجة لده متوقع إنه يزيد الطلب على الأطباء والمتخصصين النفسيين، عشان يعالجوا الناس ويشخصوا حالاتهم النفسية ويرجعولهم ثقتهم من تاني، وصعب جدًا الشغلانة دي تتغير أو تتعمل بروبوتات، عشان الطب النفسي مالوش قواعد ثابتة، وبيتطور وبيتغير باستمرار.
كاتب محتوى
لإن المستقبل هتكون لغة النجاح فيه بالإبهار البصري والمعلوماتي، والاعتماد فيه على السوشيال ميديا والديجيتال كبير جدًا، فالشركات كلها هتبقى بتتنافس على تواجدها الرقمي على الإنترنت، عشان الناس يشوفوها وتعمل دعاية لنفسها، ونتيجة لده هيزيد الطلب مستقبلًا جدًا على صناع المحتوى بجميع أنواعهم.
هيكون مطلوب جدًا في كل شركة صناع محتوى، وخبراء إعلانات، وكتاب سكريبتات شاطرين جدًا عشان يقدروا يسوقوا لشغل الشركات ويجذبوا انتباه واهتمام العملاء، ويزودوا الطلب على المنتجات اللي بتقدمها الشركة.
عشان كده فمهنة صانع المحتوى والـ(Copywriter) هتكون مهمة جدًا في المستقبل، والطلب عليها هيكون ضخم وكبير.
مهندسين الطيران وفنيين الملاحة الفضائية
ده غير كمان إن مع تطور تكنولوجيا السفر في الفضاء واستكشاف الكواكب، هيتفتح قدام البشر فرص ضخمة للتعدين والتنقيب عن العناصر النادرة في الكواكب التانية، وعلى الكويكبات والنيازك اللي في الفضاء الخارجي.
نتيجة لده هيزيد الطلب والاعتماد على كل المهن والتخصصات اللي ليها علاقة باستكشاف الفضاء وتصميم المركبات الفضائية، سواء مهندسين الطيران أو الفيزيائيين أو فنيين الملاحة الفضائية.
مبرمجين
كمان اقتصاد العالم في المستقبل هيتغير، وهيكون معتمد على العملات الرقمية المشفرة أكتر بكتير من دلوقتي، وممكن نوصل لمرحلة يختفي فيها مفهوم الفلوس الورقية التقليدية، ويحل محلها المعاملات المالية الإلكترونية اللي بتعتمد على تكنولوجيا الـ(Block chain).
عشان كده الطلب على مصممين ومبرمجين قواعد بيانات الـ(Block chain) هيزيد جدًا، وهيكون العالم كله بيعتمد عليهم تقريبًا.
الحقيقة إحنا لو قعدنا نتكلم من هنا لبكره عن شكل المستقبل، وقد إيه هو هيبقى مختلف، وهيتغير فيه شكل المجتمع بالكامل، والمهن اللي بيشتغلها الناس، فإحنا مش هيكفينا سلسلة مقالات كاملة.
أهمية التخطيط للمستقبل
بس الخلاصة إن اللي ماشي دلوقتي مش هيمشي بكره، ولو مطورتش من نفسك وتعليمك، وعملت شيفت للكارير بتاعك عشان تتخصص في حاجة من الحاجات اللي العالم رايحلها، فأنت هييجي عليك وقت وهتحس فجأة بإحساس أبهاتنا لما كانوا بيتعاملوا مع الكمبيوتر لأول مرة، وهم مش فاهمين فيه أي حاجة، ولا عارفين يشغلوه إزاي.
لو عندك أولاد، فلازم تكون مخطط لحياتهم ومستقبلهم، وعامل حساب إن العالم بكرة هيكون مختلف وغير تقليدي.
لو معلمتهمش تعليم مختلف وعودتهم يفهموا التكنولوجيا الحديثة ويعتمدوا على نفسهم، فالمستقبل هيظلمهم ومش هيعرفوا يعيشوا ولا يواكبوا العصر.
متنساش تقولي إيه أكتر وظيفة في دول عجبتك وشايف نفسك فيها.
* تنويه: الأفكار المذكورة في المقال لا تعبر بالضرورة عن رأي الموقع.
*********
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
