خليك قاعد..

والدنيا مسافرة وسايباك

احبس نفسك جوة الأوضة الضلمة في قلبَك

تربِس بابها..

وما تسمَحش لنور أحلامك يدخل من شيش الشبّاك

حسِّس.. يا أعمى..

وأمّا تلاقي الكرسي الميّت..

لأ مش دا..

اللي هناك..

قرّب منّه.. واسنِد كفّك..

واقرا عليه الفاتحة وعيَّط

بات الليلة في حضن الوحدة..

واكتب وسط الضلمة قصيدة..

قوم إلقيها لنفسَك واعمِل فيها الشاعر والجمهور

ما أنت لوحدك..

وسط الضلمة مين بيشوف عشاق النور؟

مين هيفرّق بين الحق.. وبين الزور؟

وإن صدى صوتك..

ردّ عليك بكلام مش حلو..

قول له يا عاجز.. يا مقهور

يا اللي حبيبتك..

مات الورد في روحها وهيا بتستناك

يا ما قالت لك.. إوعى تسيبني.. خُدني معاك

وأنت الشايل حِمْل الليل القاطم ضَهرك..

دايس فوق شوقك وهواك

خليك قاعد.. خليك عاجز.. مُوت جوّاك..

والدنيا اللي أنتَ اتمنّيتها..

أهي بكرة.. مسافرة وسايباك

مقالات ذات صلة:

ماذا يفعل بنا الاكتئاب

اترك اليأس وأبدأ الحياة من جديد

فقد الشغف

* تنويه: الأفكار المذكورة في المقال لا تعبر بالضرورة عن رأي الموقع.

_________________________________

لمتابعة قناة اليوتيوب لأكاديمية بالعقل نبدأ، اضغط هنا

لقراءة المزيد من المقالات، اضغط هنا