لماذا ينمو الشعر الأبيض في سن صغير؟
النهاردة هنجاوب في جولتنا عن السؤال ده، لأن أغلب الناس بتربط وجود الشعر الأبيض بكبر السن، وأغلب الناس دول ميعرفوش أن الشعر الأبيض ممكن يظهر لأي شخص مهما كان سنه.
طيب هو إيه اللي بيدي الشعر لونه الأبيض؟ جسم الإنسان فيه العديد من بصيلات الشعر، واللي بتكون موجودة في الجلد ومسؤولة عن نمو الشعر، والخلايا الصبغية اللي بتدي لون الشعر (melanocytes)، واللي بتفرز صبغة الميلانين وبتكسب الشعر لونه الطبيعي، ومع تقدم العمر والسن الخلايا دي بتفقد قدرتها بالتدريج بالتالي الصبغة بتقل علشان كده بنلاقي كبار السن عندهم شعر أبيض. طيب بردو مقلتليش هو ليه ممكن يظهر في سن مبكر؟
يعم هقولك أصبر عليا بس..
أسباب ظهور الشعر الأبيض
دي بقي أسباب ظهور الشعر الأبيض في سن صغير أو مبكر: هقولك أسماء الtopics وبعدين نرغي فيهم: “العوامل الوراثية (Genetics)، نقص الفيتامينات (Vitamin deficiencies)، أمراض المناعة الذاتية (Autoimmune diseases)، التدخين (Smoking)، بعض المنتجات مثل الشامبو، تشجيع نادي برشلونة (أكيد بهزر، بس أهو من غلبي من اللي بيعملوا فينا بارتيميو)”.
العوامل الوراثية:
ودي أهم سبب من أسباب ظهور الشعر الأبيض، وفيه دراسة بتقول أن بداية ظهور الشعر الأبيض عند السكان الأوروبيين ممكن يبدأ من سن ال ٢٠، والآسيويين من سن ٢٥، و الآفارقة من سن ٣٠، وأن الشخص ده غالبا ما يكون أحد أجداده أو آبائه ظهر عنده شعر أبيض في نفس السن، زي متلازمة فيرنر، ودي حالة وراثية نادرة جدا بتظهر فيها أعراض كبر السن في سن مبكر جدا، ومنها الشعر الأبيض.
نقص الفيتامينات:
نقص الفيتامينات زي فيتامين B12، والمهم في عملية تكوين كريات دم سليمة، وفيه حالة مرضية اسمها (pernicious anemia) دي بتسبب قلة امتصاص فيتامين B12، بالتالي بتتكون كريات دم غير سليمة، واللي بدورها بتأثر على كمية الأكسجين اللي بتوصل الخلايا، ومنها خلايا بصيلات الشعر، وده اللي بيأثر على تكوين الميلانين، ويؤدي إلى ظهور الشعر الأبيض، وفيتامينات تانية زي فيتامين (E & D & B7 & B6) مهمين جدا لتكوين الميلانين، ونقصهم بيؤدي لظهور الشعر الأبيض.
أمراض المناعة الذاتية:
زي داء الثعلبة (alopecia areata)، وده مرض مناعي بيصيب الجلد، وفيه الشخص بيفقد شعر في مناطق كتير منها فروة الرأس والوجه، ولكن أحيانا بينمو الشعر مرة تانية ولكن باللون الأبيض، وده نتيجة لضمور وضعف الخلايا الصبغية اللي بتفرز الميلانين، وفي حالة زي البُهَاق (vitiligo)، والحالة دي مصاب بيها 1% من سكان العالم، وفيها بعض أجزاء الجسم بتفقد الصبغة، وممكن تصيب أجزاء فيها شعر بالتالي هتفقد الصبغة، وهتظهر باللون الأبيض.
التدخين:
في دراسة اتعملت في ٢٠١٧، ربطت ظهور الشعر بالتدخين بالأخص قبل سن الثلاثين، طيب ييجي شخص يقولي ليه التدخين؟ بسبب إيه ده؟ أقولك يا سيدي، التدخين بعيدا عن الأضرار اللي بيسببها للقلب والرئة، واللي منخفيش دورهم والتأثير اللي ممكن تسببه على الشعر، التدخين بيؤدي لضيق الشرايين مع مرور الوقت وطول فترة التدخين، واللي بيؤدي إلى قلة كمية الإمداد الدموي اللي رايح لبصيلات الشعر، بالتالي فقدان الشعر وضعفه، وظهوره باللون الأبيض في سن مبكر، وده غير تأثير المواد الضارة اللي في السجائر زي النيكوتين وغيره، واللي بتأثر على أجزاء كتير في الجسم، ومنها بصيلات الشعر.
نوع الشامبو
تعرف أن الشامبو ممكن يأثر على لون الشعر؟ أيوه زي ما بقولك، بعض المنتجات زي الشامبو، واللي ممكن يكون بيحتوي على ثاني أكسيد الهيدروجين (Hydrogen peroxide)، وده بيدمر خلايا وبصيلات الشعر، وبيؤدي إلى ظهور الشعر الأبيض.
طيب إيه العلاج؟
أكيد ده السؤال المهم، لو كان سبب ظهور الشعر الأبيض وراثي فده ملهوش علاج، أما الأسباب التانية فغالبا بتزول بزوال السبب، فأخذ مكملات غذائية فيها فيتامينات زي B12، وفيتامين E، وD، بيؤدي لرجوع الشعر للونه الطبيعي، وكذلك الإقلاع عن التدخين. وبكده نكون خلصنا جولتنا عن ظهور الشعر الأبيض في سن مبكر، نتمنى تكونوا استفدتم معانا.
