نظرية خيالية أم واقعية؟ .. الجزء الثاني
الحل إننا نخلق حروب وندعم ثورات وحركات متطرفة، ونغرق الدول الفقيرة في الديون لحد ما يصبح من المستحيل عليهم إنهم يخرجوا من المستنقع اللي هيقعوا فيه، ولا هيقدروا عمرهم يطلعوا لقدام!
مش بس كده، ده إحنا هندعم حركات وأجندات غريبة وجديدة على الجنس البشري، وبتتعارض تعارض تام مع فطرة الإنسان، زي مثلًا الم**ثلية الج**نسية وتحديد النسل، عشان نحد من النمو السكاني في العالم، ونوقف الصراع على الموارد! وفي سبيل ده، ممكن نعمل أي حاجة ومفيش حدود ولا مبادئ ولا أخلاق!
لو مش مصدقني، خليني بقى أحكيلك على بعض الحقائق المذهلة اللي هتبينلك إن الخطط دي شغالة من زمان جدًا، ومستخبية ورا ستار الدول العظمى وحقوق الإنسان، عشان محدش ياخد باله.
خد عندك مثلًا اللي بتعمله أمريكا من حروب وغزو لدول كتير عشان تحتلها وتسيطر على مواردها الطبيعية، زي ما حصل في العراق وأفغانستان، وخد عندك دعمهم للحركات الثورية ولأجندات المث**لية وتحديد النسل في الدول النامية!
في مايو من سنة 1991، الرأي العام في دولة البرازيل ثار وهاج لما كشفت صحف محلية برازيلية عن خطة سرية عملها مجلس الأمن القومي الأمريكي هدفها تقليل عدد سكان البلاد النامية، بهدف السيطرة على مواردها، وده من خلال تعقيم نساء الدول دي بطرق شيطانية وغير مباشرة، ومن غير ما حد يعرف أو ياخد باله، ومن ضمن الـ13 دولة اللي اتطبقت فيهم الخطة دي كانت البرازيل!
بناء على الوثائق الرسمية اللي تم اجبار السلطات الأمريكية على نشرها سنة 1989، فالخطة دي كان اسمها خطة التعقيم أو (NSSM 200)، واللي صاغها كان “هنري كيسنجر” وزير الخارجية الأمريكي المعروف، وكتب عنها مذكرة كاملة من 107 صفحة لما كان ماسك منصبه في سنة 1974، وكان من المقرر إن الخطة دي تكتمل بحلول سنة 2000، لولا إنها تسربت للصحافة!
لما وزارة الصحة البرازيلية حققت في الموضوع، اكتشفوا مفاجأة مرعبة، أكتر من 44% من جميع النساء البرازيليات اللي أعمارهم بتتراوح ما بين 14 و55 سنة تم تعقيمهم بشكل دائم! وعمليات التعقيم دي تمت بشكل غير رسمي، بدعم من مجموعة كبيرة ومتنوعة من المنظمات والوكالات الأجنبية، ومثال عليهم مثلًا: الاتحاد الدولى لتنظيم الأسرة، وصندوق باشفاينر الأمريكي، ورابطة وسائل منع الحمل الجراحى التطوعي، ومنظمة فاميلي هيلث (Family Health)، والأدهى من كل ده، إن كل البرامج اللي نفذتها المنظمات دي كانت برعاية وتوجيه مباشر من الوكالة الأمريكية للتنمية الدولية أو (USAID)!
أنت متخيل أنا بقولك إيه؟! نص سكان البرازيل تقريبًا تم تعقيمهم تعقيم غير قانوني، وبطريقة تسببت في إيقاف النمو السكاني بشكل مرعب، لدرجة إن حسب كلام وزير الصحة البرازيلي “السينين جويرا” وقتها، الانخفاض المفاجئ في معدل الخصوبة ده حرم البرازيل من أكتر من 30 مليون نسمة! ولولاه، كان عدد سكان البرازيل تجاوز 200 مليون من سنة 2000!
كل ده حصل في بلد واحد بس عشان تم تسريب الموضوع! ما بالك بقى بالـ13 بلد التانيين اللي محدش فيهم سمع أي حاجة عن الخطة الشيطانية دي، ولا عرفوا أي حاجة؟!
مش بس كده، ده لسه الموضوع مرعب أكتر، عارف أنت جائحة فيروس كورونا اللي غيرت وجه العالم كله في الـ3 سنين اللي فاتوا؟ أهو المندوب الروسي في مجلس الأمن أكد إن القوات الروسية اللي دخلت أوكرانيا في الحرب الأخيرة ما بينهم، بيقولوا إنهم لقوا شبكة خطيرة بتتكون من أكتر من 30 معمل ومختبر بيولوجي في أوكرانيا! وإن الولايات المتحدة طورت في أوكرانيا متحوّرات بيولوجية وفيروسية باستخدام الطيور المرقّمة، والطيور دي كان بيتم إرسالها للبلاد المستهدفة، وفيروس كورونا (كوفيد 19) كان واحد منها!
حتى الرئيس الروسي فلاديمير بوتن نفسه تكلم عن مؤامرة المليار الذهبي دي في حديث عمله يوم 20 يونيو سنة 2022، قال فيه إن نموذج الهيمنة الكاملة لما يسمى بالمليار الذهبي، مفيش فيه أي عدالة على الإطلاق، وطرح تساؤل بيقول اشمعنى من بين كل سكان الأرض، المليار الذهبي ده (اللي هو الدول الغربية) لازم هو اللي يسيطر على العالم كله ويفرض سلوكياته وقواعده عليهم؟!
قال كمان إن النظام العالمي الحالي نظام أحادي القطب، هدفه إنه يعطل التنمية العالمية ويخلي الشعوب دايمًا في حالة فقر وتخلف، وإنه لازم يتغير!
رغم كل ده، لسه الخطة مستمرة، وفي كل يوم بتتولد خطة جديدة وسرية بتتطبق سياسيًا واجتماعيًا على العالم كله، عشان يغيروا من تفكيرك ويخلوك تتقبل الموضوع بشكل أكبر من غير حتى ما تحس، وأفلام هوليوود الأخيرة مثال على الموضوع ده، وأشهرها مثلًا سلسلة (Avengers Infinity War) و( End Game) الأخيرة، اللي كان بيظهر فيهم الشرير ثانوس بيحاول يقضي على نص سكان الكون عشان يحافظ على الموارد، وناس كتير جدًا تعاطفت معاه وكانوا شايفينه صح، وده بالظبط المطلوب، إنك تتعاطف مع التوجهات دي، وتبقى شايف إن الزيادة السكانية هي السبب في فقر الشعوب والأمم، مش السياسات الشريرة الخبيثة اللي بتمارس عليهم من وراء الستار!
في النهاية الموضوع مرتبط بتفسيرك لكل اللي إنت قرأته ده، هل إنت شايف الكلام ده حقيقي وممكن فعلًا يكون بيحصل وبيتطبق علينا كلنا من غير ما نحس؟! ولا كل الأحداث دي مجموعة من الصدف؟!
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
