لعبة القدر
الإنسان من ساعة ما بيتولد ولحد ما يموت، قدره مكتوب على جبينه، بيشيب ويكبر ويدوس على الناس عادي.
بس مبيكونش عارف ميعاد ومكان وفاته لحكمة يعلمها الله وحده، تخيل لو تعرف ميعاد وفاتك، هتعيش إزاي؟ يا إما هتعيش في بؤس دائم لأنك خلاص هتحسب الأيام والساعات والدقايق على نهايتك فمش هتحقق حاجة، يا إما هتخرب الدنيا وتيجي في آخر لحظة تتوب، في الحالتين الحكمة من إخفاء موعد وفاتك وقدرك إنك تعيش وما تشيل هم موتك، تعمر الأرض وتشتغل وتتجوز وتعيش حياتك زي ما مكتوبة ليك، وأي حاجة تانية ربنا كاتبها هتعيشها، بس هتتفاجأ بيها.
تسمع عن قصة موعد مع سامراء؟
دي قصة الكاتب الإنجليزي سومر ست موم، عدت عليّ، لو مكنتش سمعت عنها ولا عدت عليك تعالى أما أحكيها لك.
القصة باختصار إن كان فيه تاجر من بغداد زمان بعت الخادم بتاعه للسوق عشان يشتريله شوية حاجات، الخادم ده راح السوق ورجع ووشه مليان علامات الرعب، التاجر بيسأله: “مالك يا بني؟”، قاله: “وأنا في السوق قابلت ملك الموت، واللي رعبني إنه بصلي بصة غريبة كدا خوفتني وشكله كدا والله أعلم كان بيهددني!”.
طيب والحل إيه يا خادم؟ الخادم قاله: “أنا لازم أهرب”، “هتهرب إزاي؟”، قاله: “بسيطة، سلفني أقوى وأسرع حصان عندك وأنا هاخده وههرب لسامراء وهناك مش هيلاقيني!”، التاجر يهديك يرضيك مفيش، طيب يا سيدي اتفضل أحسن حصان عندي أهوه.
الخادم أخد الحصان وجري، وخلصت حكاية الخادم هنا.
بس القصة نفسها لسة ما خلصت، التاجر دماغه ودت وجابت على الخادم بتاعه، واستغرب ليه أصلًا ملك الموت يبص للخادم بتاعه البصة دي، فالتاجر لبس بسرعة وراح على السوق، وفضل يبص يمين وشمال لحد ما وصل لمين؟ لملك الموت، ووقفه وسأله: “أنت ليه بصيت لخادمي بصة تهديد؟ هيا إيه الحكاية؟ هو عملك إيه؟”.
ملك الموت جاوبه الإجابة الخالدة، أساس قصتنا كلها، قاله: “أنا مبصتلوش بصة رعب وتهديد، أنا بصتله بصة استغراب!”.
التاجر سأله: “واستغربت ليه؟”، قاله: “لأني شفته هنا في السوق في بغداد، وعندي ميعاد معاه الليلة في سامراء!”.
العبرة من القصة واضحة وصريحة، مهما هربت، متعرفش تهرب من قدرك أبدًا، طيب أنا ليه حكيت القصة دي؟ لأن قصتنا الحقيقية النهاردة أغرب شويتين، حصلت فعلًا هنا في مصر، في الغردقة، نقدر نسميها موعد مع الغردقة!
الحكاية بتقول إيه؟
شاب روسي اسمه فلاديمير عنده ٢٣ سنة، ساكن في قرية بعيد جمب القطب الشمالي آخر بلاد المسلمين زي ما بيقولوا، بينه وبين الغردقة أراضٍ وقارات ومحيطات وبلاد لا تعد ولا تحصى، أنت بتتكلم في ٨٠٠٠ كم من الجبال والتلج والأنهار والشعوب.
شاف ملك الموت، بس مش بهيئته إنما بالسبب والنتيجة، شاف الموت عن طريق حرب روسيا وأوكرانيا، وإعلان روسيا التعبئة العامة آخر السنة اللي فاتت، هو شاب بقى مطلوب منه إجباري إنه يشارك في حرب لا ناقة له فيها ولا جمل، بعد ما كان قدم في جامعة موسكو وبيدرس أمن المعلومات ومصاحب والدنيا جميلة، شاف الموت في شكل التجنيد في الحرب، والموت بصله نفس بصة الاستغراب، فأبوه قرر يهربه أقصى مكان في العالم، الغردقة مصر!
الأب خاف على ابنه من ويلات الحرب، وحب يستنصح وباع بيتهم وأملاكهم كلها في روسيا، وراح اشترى بيت في المنتجع البريطاني في الغردقة وجاب العيلة كلها، ومنهم الشاب ده، ليه؟
عشان الواد ده زي ما قلنا كان في سنة تالتة كلية وعايز يكمل تعليمه وميخشش الجيش، فهرب على مصر وبدأ يعارض بوتين وقال هيدرس بالمراسلة من هنا، وهنا أمان وبتاع وجاب صاحبته معاه، أبعد مكان عن ملك الموت اللي بصله باستغراب، بس بدل ما يركب أسرع حصان عند التاجر، ركب الطيارة.
يوم ٨ يونيو اللي فات صحي الصبح فطر وأخد أبوه وصاحبته وراحوا على قرية دريم بيتش عشان أرخص، أهو يوفروا قرشين يفيدوهم في عيشتهم في مصر، وعشان ينزلوا المياه ويتصوروا وكدا، ونزل هو وصاحبته، ولسة بيتصوروا لقى القرش في وشه!
في البداية افتكروه دولفين، فكملوا سباحة لحد ما بدأ يهاجمه، صاحبته شافت المنظر جريت وباعته مع إنهم مرتبطين من خمس سنين!
إيديه اتاكلت في الأول، ففضل ينادي على أبوه ينقذه لحد ما القرش قطم دماغه، قصاد أبوه اللي باع كل حاجة عشان ينقذ ابنه من التجنيد الإجباري.
كأن أبوه اللي شاف ملك الموت في القطب الشمالي بيبصله باستغراب، سأله نفس السؤال، أنت بصيت لابني باستغراب ليه؟ فكان جواب ملك الموت إنه بصله باستغراب لأنه شافه هنا في القطب الشمالي، لكن عنده معاه ميعاد الليلة في الغردقة مصر، على بعد آلاف الكيلومترات من هنا.
قدره اللي كان عايش في القطب الشمالي في آخر الكرة الأرضية، أنه يموت في مصر، تخيل لو من كام شهر بس كنت قلتله أنت هتموت في مصر كان هيصدق؟ لا هروب من القدر، مهما حاولت قدرك مقدر ومكتوب، “أَيْنَمَا تَكُونُوا يُدْرِككُّمُ الْمَوْتُ وَلَوْ كُنتُمْ فِي بُرُوجٍ مُّشَيَّدَةٍ”.
مقالات ذات صلة:
أسباب وأعراض وطرق علاج قلق الموت
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
