لغز رحلة أبوللو
النهاردة بقى معادنا على غير العادة مع قصة غريبة غير مفسرة لحد وقتنا هذا، وما زالت لحد اللحظة اللي إنت بتقرأ فيها السطور دي محتلة مكان الصدارة في أحد أشهر الألغاز العلمية في تاريخ استكشاف البشر للفضاء.
اللغز ده هو إن رواد الفضاء التابعين لمهمة أبوللو 10 اللي وصلت للقمر في أواخر الستينات، سمعوا أصوات مجهولة أثناء ما كان الاتصال بينهم وبين الكوكب منقطع،
والأصوات دي كانت غريبة لدرجة إنها رعبتهم وخلتهم يقرروا ميتكلموش عنها لحد وقتنا هذا، عشان محدش يقول عليهم مجانين!
طب إيه الموضوع ده بالضبط؟ وإيه الأصوات الغريبة دي؟ وهل هي فعلًا كانت محاولة من كائنات أخرى للتواصل مع الطاقم، ولا التفسير ممكن يكون حاجة تانية؟!
كوباية شايك الحلوة ونعناعك في إيدك، وتعالى أحكيلك..
طاقم أبوللو 10
بص يا سيدي.. مهمة أبوللو 10 دي بدأت يوم 18 مايو سنة 1969، وكانت تعتبر تاني رحلة فضائية من نوعها يتم إرسالها إلى القمر، والطاقم بتاعها ساعتها كان بيتكون من 3 رواد فضاء، قائدهم هو (توماس ستافورد)، ومعاه اتنين تانيين هما (جون يانج)، و(إيوجين سيرنان)،
الناس دول كانت مهمتهم هي واحدة من أهم وأعقد المهمات في تاريخ الملاحة الفضائية، وبسببها تم عمل محاكاة أو Simulation شبه كاملة لعملية الهبوط على القمر،
اللي تم استعمالها فيما بعد عشان تمهد الطريق للمهمة اللي بعدها، اللي هي أبوللو 11، اللي وضعت أول رجل في التاريخ على سطح القمر، اللي كان رائد الفضاء الأمريكي نيل أرمسترونج.
بس سيبنا من كل ده دلوقتي، وتعالى نتكلم في الحاجة الغريبة اللي حصلتلهم وهما هناك على بعد مئات الآلاف من الأرض..
انقطاع الاتصال عن رواد الفضاء
لما الرواد وصلوا للقمر، بدأوا في الدوران حواليه وهما بيقربوا نسبيًا من السطح لحد تقريبًا 15 كيلومتر، وبعدين فصلوا المركبة القمرية من جسم المركبة الرئيسية، وبدأوا في رحلة دامت تقريبًا 60 ساعة في المدار القمري،
وبينما كانوا في مدار القمر جوه المركبة القمرية بتاعت المهمة، ولما وصلوا عند الجانب المظلم من القمر، دخلوا في منطقة اتقطعت فيها الاتصالات بينهم وبين مركز التحكم بتاع ناسا اللي في هيوستن – تكساس هنا على الأرض،
وده عشان المنطقة اللي كانوا فيها دي جسم القمر فيها كان بيشكل حاجز بيعيق وصول الاتصالات الراديوية منهم لكوكب الأرض، وده سبب إن مكانش في أي نوع من أنواع التواصل بينهم وبين الأرض في الفترة دي خالص.
ركز عشان الكلام ده مهم جدًا، وهقولك ليه حالًا..
تسجيل غامض ل أبوللو 10 من القمر
لما دخلوا في المنطقة اللي اتقطعت فيها الاتصالات دي، وفضلوا فيها شوية، بدأوا يسمعوا صوت غريب، حاجة أشبه بما لو كانت صفارة، حد بيصفر بصوت فضائي عميق وغريب، عامل زي الهمهمة، كإن حد بيتكلم بصوت أشبه بالصفير!
الصوت ده كان مرعب لدرجة إنه هز الـ 3 رواد الخبراء دول، ورعبهم وخلى قلوبهم تنقبض، علمًا بأنهم خاضوا العديد من التدريبات المكثفة اللي هيأتهم لأي ظرف صعب ممكن يتحطوا فيه، بس محدش فيهم كان متوقع اللي حصل ده.
المركبة اللي هما كانوا فيها دي كان فيها جهاز تسجيل بيسجل المحادثات اللي دارت بينهم وقتها، والتسجيلات دي لما تم الكشف عنها بعد فترة طويلة فضلت فيها سرية للغاية جوة أرشيفات ناسا، كان باين فيها من كلامهم إنهم كانوا فاكرين إن الصفارة دي هي محاولة من كائنات غير بشرية وغير أرضية للتواصل معاهم بشكل أو بآخر،
وده عشان حسب كلام العالم (كيفين باينز Kevin Baines) اللي تكلم عن الواقعة دي بعدها، الأصوات دي كان مستحيل تكون جاية من الأرض أو من أجهزة الاتصالات الأرضية، لنفس السبب اللي قلناه فوق،
الأرض أصلًا كانت خارج مجال الرؤية والاتصال تمامًا لمدة تزيد عن الساعة تقريبًا، والصفارة الأشبه بالمزيكا الفضائية دي فضلت شغالة طول الفترة دي، وبيسمعها الرواد وهما مرعوبين، لحد ما سكتت فجأة زي ما ظهرت، واختفت بدون أدنى أثر!
إخفاء رواد الفضاء الأصوات عن الجميع
حسب كلام باينز، فالأصوات دي كانت أشبه بما لو كانت همهمات كائنات فضائية غير أرضية، وكان من الطبيعي جدًا مع غرابتها دي إن الرواد يعتبروها بالفعل كده، ويقرروا بعدها إنهم مش هيقولوا ولا كلمة عن اللي حصل ده لأي شخص مهما كان،
لا زمايلهم ولا القادة بتوعهم في مركز التحكم في المهمة في هيوستن، ولا حتى بينهم وبين نفسهم، وده عشان كانوا خايفين الناس متصدقهمش، أو يعتبروهم مجانين أو عندهم مشكلة نفسية وعقلية، ويمنعوهم من أي رحلات فضائية مستقبلية.
طبعًا أنت ممكن تفتكر إن اللي هما سمعوه ممكن يكون بسبب تداخل أو تشويش حصل بسبب أي نوع من الأشعة الكونية على أجهزة الاتصالات بتاعتهم أو ما شابه، وده فعلًا اللي بعض علماء الفيزياء الكونية اقترحوه كإجابة على اللغز المحير ده.
اقرأ أيضاً:
المصعد الفضائي ومستقبل السفر للفضاء
ملفات ناسا الغامضة
بس لو كان الموضوع فعلًا بالبساطة دي، كان إيه السبب اللي يخلي ناسا تمسح أي معلومات خاصة بالواقعة دي من سجلات الرحلة لما الرواد رجعوا مرة تانية للأرض؟!
إيه السبب اللي يخلي إدارة المهمة تحط ختم (سري للغاية) على كل الأوراق والتسجيلات الخاصة بالرحلة دي، وتفضل مستخبية وراء الستار لسنين طويلة بعدها، لحد ما تم الكشف عن التفريغ الصوتي بتاع المحادثات اللي دارت بين الرواد، سنة 2008؟ برغم إن الوثائق دي نفسها كان مكتوب عليها إن المفروض إعلانها للعامة كان يتم سنة 1982!
إيه اللي يخليهم يستنوا الفترة دي كلها، لحد ما يقرروا يعلنوا عنها من قريب كده، مع بداية تغير سياسة الحكومة الأمريكية المتعلقة بالظواهر الفضائية الغامضة، من المنع والردع والتجاهل، للاهتمام والكلام عنها بوضوح سافر؟
وفوق كل ده، ناسا نشرت الملفات الصوتية نفسها بتاعت الرحلة سنة 2012، وممكن تسمعها بنفسك من سجلاتهم اللي على موقعهم الرسمي لو عايز تحط نفسك في الجو وتعيش اللي عاشه الرواد دول من سنين طويلة في قلب الفضاء: https://archive.org/details/Apollo10
تفسيرات متعددة للأصوات الغامضة
لما تسمع الكلام بتاع الرواد وقتها، هيبقى ظاهر فيه جدًا قد إيه دي حاجة هما عمرهم ما سمعوها قبل كده، ومكانش عندهم أي فكرة عن مصدرها، وبرغم إنهم قرروا ميقولوش لحد زي ما قلنا، لكن الكلام بتاعهم اتسجل برغم كل شيء، ومفيش حاجة استخبت، فإيه اللي يخلي ناسا تخبي المعلومات دي الفترة الطويلة دي كلها؟
تفسيرات الأصوات الغريبة دي كتيرة، في بعض الخبراء قالوا إنها مجرد تداخلات في الإشارات بتاعت المجالات اللا سلكية ما بين المركبة القمرية والمركبة الرئيسية،
وفي علماء تانيين قالوا إنها أصوات ناتجة عن تصادم جسيمات مشحونة Charged Particles، عشان نفس الصوت ده سجله بعدها مسبار كاسيني الفضائي Cassini Space Probe سنة 2002 لما كان بيمر جوار كوكب زحل، وخبراء علم الفلك فسروها وقتها بإنها ناتجة من إن في بعض “الجسيمات المشحونة اللي بتتحرك خلال المجالات المغناطيسية لزحل”.
بس حسب كلام رائد فضاء تاني اسمه (آل واردين Al Wardin)، كان هو الطيار بتاع رحلة أبوللو 15 اللي خرجت بعدها سنة 1971، فهو مش مصدق أي واحد من التفسيرات دي خالص، بل على العكس تمامًا،
شايف إن الطاقم بتاع أبوللو 10 كانوا خبراء ومتمرسين وعارفين كويس أوي الأصوات اللي متوقع يسمعوها، ومتدربين عليها بكثافة، فبالتالي المنطق بيقول إن اللي هما سمعوه ده كان عبارة عن شيء تاني، شيء إحنا لسه مش جاهزين إننا نفهمه دلوقتي، حسب كلامه.
ما التفسير الحقيقي للأصوات؟
المثير للاهتمام هو إن الرواد بتوع أبوللو 10 بسبب إنهم متكلموش عن الواقعة، فضلوا يطلعوا في رحلات تانية للفضاء في السنين اللي تلت رجوعهم من رحلتهم سنة 1969، فتفتكر ممكن يكونوا شافوا إيه بعدها ورفضوا يتكلموا عنه بردو خوفًا من منعهم من الطيران؟
والأهم، شايف إن الأصوات اللي سمعوها دي فعلًا مجرد تداخل ما بين أجهزة استقبال راديوية، ولا التفسير الحقيقي ممكن يكون أغرب من كده، وأكثر إرعابًا بما لا يقاس؟!
الحقيقة إن الإجابة على الموضوع ده مش عندي ولا عند حد من الخبراء بشكل قاطع لحد دلوقتي للأسف، كل التفسيرات مبنية على تكهنات أو افتراضات، ومفيش شيء مؤكد، وعشان كده هسيب الإجابة لخيالك أنت.
مصادر:
https://www.bbc.com/news/av/science-environment-35645028
https://www.theverge.com/…/apollo-10-astronauts-nasa
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
