تخيل معايا إن في يوم في المستقبل، يظهر فجأة في السماء المشهد اللي قدامك ده، نور ساطع جاي من أعماق الفضاء، هينور الأفق كله لدرجة إنه هيبقى ساطع أكتر من ضي القمر الكامل، ونوره هيغطي على الشمس نفسها حتى في قلب النهار! وتخيل إن المنظر ده هيفضل مستمر لأسابيع، ويمكن شهور كاملة، عشان يكون أغرب حاجة ظهرت في سماء الكوكب في التاريخ كله تقريبًا!
لو أنت مش فاهم ومش مستوعب إيه اللي ممكن يسبب شيء عظيم ومرعب زي ده، فخليني أقولك إنه مش هيكون شيء اعتيادي، بل هيكون واحد من أعنف الأحداث اللي ممكن تحصل في الكون كله، اللي لو قدرت تشوفها بعينك بشكل حقيقي وواقعي وهي بتحصل في كل مكان من الفضاء في كل لحظة، كنت هتتجنن حرفيًا، الحدث ده هو انفجار نجم.
لكن مش أي نجم، ده واحد من أكبر النجوم المعروفة لينا، وأقربهم لكوكبنا على الإطلاق، وعشان كده الحدث اللي هيحصل في المستقبل ده، هيغير معاه حاجات كتير في حياتنا، وممكن يغير شكل المجتمع البشري نفسه إلى غير رجعة.
كوباية شايك الحلوة والنعناع في إيدك، وتعالى بقى معايا نتكلم عن الموضوع ده، ونفهم إيه اللي هيحصل بالظبط، وليه هيكون حدث مذهل ومختلف عن أي حاجة شافتها عينك قبل كده، وهيأثر في المجتمع بالشكل السافر ده.
منكب الجوزاء
شوف يا عم، مبدئيًا كده، فالنجم اللي إحنا هنتكلم عنه ده هو نجم مشهور جدًا في أوساط علم الفلك، وموجود وظاهر بشكل واضح في السما، اسمه بيتلجوس (Betelgeuse)، وهو في الواقع جزء من كوكبة الجبار (Constellation Orion)، اللي هي واحدة من أوضح التشكيلات النجمية اللي ظاهرة بوضوح في سماء الأرض، ومرئية بالعين المجردة من أماكن كتير على سطح الكوكب، وتعد من أشهر التشكيلات النجمية في السماء، اللي اتكلمت عنها الثقافات الإنسانية القديمة.
النجم ده بقى حجمه بالنسبة لحجم الشمس بتاعتنا ضخم جدًا لدرجة إنه مذهل، يكفي إني أقولك إنه بينتمي لتصنيف من النجوم بيسموه العمالقة الحُمر (Red Giants)، وقطره أكبر من قطر الشمس بتاعتنا بتقريبا 900 مرة، وحجمه أكبر منها بـ 700 مليون مرة!
عشان بس تتخيل الموضوع والحجم الرهيب ده في دماغك، فلو أنت جيت وحطيت النجم ده مكان الشمس بتاعتنا في مركز المجموعة الشمسية هنا عندنا، فهو هيكون كبير لدرجة إنه هيبلع عطارد والزهرة والأرض والمريخ وحزام الكويكبات، وسطحه هيوصل لحد المشترى نفسه، وممكن يبلعه هو كمان!
اقرأ أيضاً: يا سكان كوكب الأرض نهاية العالم على الأبواب!
ما هي ظاهرة سوبر نوفا
طب إيه بقى علاقة النجم ده بينا، وليه بنتكلم عنه دلوقتي؟!
السبب في ده يا صديقي هو إن النجم ده بقاله من سنة 2019، وكل مراقبين السماء والفضاء، وعلماء الفلك اللي بيشتغلوا على التليسكوبات الفضائية في كل حتة في العالم، شايفين السطوع بتاعه بيقل بشكل ملحوظ جدًا، لدرجة إنه نزل من كونه رقم 12 في قائمة أكثر الأجسام سطوعًا في السماء، للمركز الـ 20، ولسه مستمر في الهبوط.
لو أنت مش فاهم إيه معنى الخفوت اللي بيحصل للنجم ده، فخليني أقولك إن الخفوت ده في المعتاد بيحصل مباشرة قبل ما النجوم تبقى على وشك الانتهاء من الوقود الهيدروجيني بتاعها، وتنفجر في أعنف موجة انفجارية ممكن تحصل في الكون كله، اللي هي بيسموها السوبر نوفا (Supernova).
انفجار نجم كيبلر
الفكرة بقى هو إن في ناس كتير من المتخصصين في علوم الفلك والفضاء والفيزياء الكونية بيقولوا إن النجم ده على وشك الانفجار حاليًا، وإنه لما يحصل، فإحنا هنكون على موعد مع حدث كوني ضخم وعملاق متكررش قبل كده في التاريخ بالشكل ده تقريبًا، لإن آخر مرة حصل فيها انفجار نجم، وكان واضح لينا في السما، كان انفجار نجم كيبلر (Kepler’s Supernova) سنة 1604، وتم تسجيله وتوثيقه تاريخيًا من أكتر من حضارة، منهم الحضارات الأوروربية والصينية والعربية!
وقتها كان اللي بيشوفوا الانفجار ده في السما هما ناس عايشين في قلب عصور النهضة والقرون الوسطى، أيام ما كانوا لسه ميعرفوش أي حاجة عن الكون وحجمه، وكانوا بيتطيروا من الأحداث اللي زي دي وبيخافوا منها، وبيعتبروها نذير شؤم، فتخيل كمية الأساطير والنبوءات والحكايات الخوارقية اللي اتنسجت عن الموضوع ده وقتها.
الأدهى إن ساعتها كمان مكانش فيه كاميرات ولا تليسكوبات، فبالتالي مش كل الناس خدوا بالهم منه، خصوصًا إن نجم كيبلر ده كان على بعد أكتر من 20 ألف سنة ضوئية عننا، وكان شكله صغير كإنه نجمة جديدة صغيرة ظهرت في سماء الليل، ومش باينة بالنهار أصلًا، ومكانش بالقوة اللي تخليه ظاهر للعين المجردة المتفحصة، يعني محدش عرف بالموضوع ده وقتها إلا الناس اللي كانوا أصلًا مهتمين بدراسة السما والنجوم.
اقرأ أيضاً: الانفجار العظيم هل من الممكن أن يكون سبب؟ أم أنها كانت صدفة؟
تأثير انفجار نجم منكب الجوزاء على كوكب الأرض
إنما بيتلجوس موقعه هو على بعد 650 سنة ضوئية مننا فقط! وده هيكون معناه إن الانفجار ده مش بس هيكون ظاهر للعين المجردة، لأ ده هيبقى أوضح من أي حاجة تانية في السما، وهيبقى شكله أشبه بشمس تانية طلعت في وضح النهار.
عايزك بس تتخيل إن الانفجار ده لما يحصل ويظهر في السما، فهو هيخليك تقدر تمشي بالليل تحت نوره كإنه كشاف منور الشارع، وهيخلي جسمك يسيب ضل على الأرض! ونوره هيكون ساطع أكتر من القمر المكتمل!
حد هيسألني طب هو إحنا إيه اللي هيحصل فينا بسبب الانفجار ده؟ وهل هيأثر على كوكبنا ولا لأ؟ والحقيقة إن الانفجار ده لو كان قريب مننا حبتين، فهو كان هيبقى تأثيره مدمر علينا، وممكن يتسبب في نهاية المجموعة الشمسية كلها، واحتراق كواكبها بالكامل، مش بس الأرض.
ده عشان الإشعاع وموجات جاما عالية الطاقة اللي هتبقى جاية منه هتبقى أعنف من أي شيء ممكن تتخيله في حياتك، كإنه بالضبط انفجار نووي، بس على مستوى كوني ضخم جدًا، في مقدوره إنه يبخر نظام شمسي كامل في أقل من ثوان بالمعنى الحرفي للكلمة!
كم يبعد نجم منكب الجوزاء؟
بس إحنا في الواقع بعيدين أوي عن إننا يقع علينا أي ضرر من الانفجار، وفي نفس الوقت قريبين منه لدرجة إننا هنقدر نشوفه وهو بيحصل بكامل عظمته وهيبته، بعيوننا المجردة ومن غير أي تليسكوبات أو مناظير! وهيفضل نوره مستمر ومنور السما كلها بالنهار وبالليل لشهور طويلة!
المبهر أكتر بقى واللي يخليك تفكر، هو إن بسبب بعد النجم ده عننا، وكون الضوء اللي بيخرج منه بيقطع مسافة 650 سنة عشان يوصلنا هنا على الأرض، فهو ممكن يكون انفجر بالفعل في أي وقت منذ القرن الـ 14 ولحد النهاردة، بس لسه النور بتاع انفجاره ده موصلناش وبالتالي إحنا منعرفش لسه إنه انفجر!
ماذا لو انفجر النجم منكب الجوزاء؟
طب سؤال بقى، لو النجم انفجر بالفعل، يا ترى إيه اللي هيحصل في العالم لما نبدأ نرصد الآثار الناتجة عن انفجاره؟! هقولك..
بص يا سيدي، لما ضوء انفجار النجم ده يوصلنا أخيرًا هنا على الأرض، هيكون أول حاجة هتحصل وهنلاحظها منه، قبل حتى ما يسطع فجأة في السما، هي إن المستشعرات اللي موجودة في المختبرات الفلكية والفيزيائية في كل حتة في العالم، اللي بتدور على جسيمات النيوترينو عالية الطاقة عشان تدرسها، هتبدأ فجأة تزمر وتدي إنذارات في كل مكان على سطح الكوكب تقريبًا.
ده هيكون بسبب إن النجم قبل ما ينفجر بثواني، هينبعث منه عشرات الملايين، ويمكن المليارات من الجسيمات دي، اللي هتكون طاقتها أعلى من أي حاجة ممكن تتخيلها، وهتوصلنا كلها هنا في وقت واحد، وهتخيلنا نعرف إن الانفجار ده هيحصل، وهيظهر في السما، من قبل ما يحصل بدقائق، وربما ساعات.
بعدها علطول، هتبدأ الألعاب النارية، والعالم كله هيقف عشان يتفرج على المشهد اللي هيظهر في السما، وهيحتل مساحات الأخبار وشاشات الإعلام في كل حتة على الكوكب، لإنه هيكون أكتر حدث كوني تم مشاهدته في تاريخ البشر تقريبًا، وأوضحهم وأكبرهم على الإطلاق.
وده عشان الانفجار ده هيغير شكل السما الأرضية نفسها، وكوكبة الجبار اللي بينتمي ليها النجم، واللي هي عبارة عن واحدة من أهم المجموعات النجمية أو الـ(Star Clusters) اللي بيعتمد عليها ناس كتير في الملاحة والسفر، شكلها هيتغير تمامًا بعدها.
اقرأ أيضاً: اكتشاف أجزاء من كوكب آخر مدفونة بباطن الأرض!
تفسيرات متعددة
ده غير إنه العالم كله هيقدر يشوف الانفجار بيحصل قدامهم في السماء، وهيبقى شكله كإنه شمس تانية هتظهر فجأة وهتفضل مستمرة ومنورة ليل ونهار، فبالتالي فكرة الناس البسطاء عن النجوم وإنها مش أكتر من أشياء ثابتة في السما مبتتغيرش ولا بتروح ولا بتيجي، هتتغير تمامًا، وكل كائن حي عايش على الكوكب وقتها هيشوف بعينه إن الكون أوسع بكتير من كل اللي كان يتخيله.
عارف أنت بقى إيه أكتر حاجة مثيرة للخيال في الموضوع؟! النظريات اللي هتطلع وقتها عن سبب حدوث الانفجار ده، وسبب سطوع النجم المفاجئ في السما.
الناس اللي هتقولك غزو فضائي، والناس اللي هتعتبر إن ده يوم القيامة أو واحدة من علامات الساعة، أو اللي هيعتبروه نذير شؤم ونبوءة دينية قديمة، كتير أوي نظريات هتطلع وقتها، وكلها هتبقى غريبة ومثيرة وهتخلي عقلك يسافر وقلبك ينقبض، بس الأكيد هو إن مفيش حاجة فيها هتقدر توصل لوصف عظمة وبهاء الحدث ده لما يحصل في المستقبل القريب أو البعيد.
متى ينفجر منكب الجوزاء؟
في النهاية، مفيش حاجة تقدر تأكد لنا الانفجار ده هيحصل إمتى، بس هو هيحصل أكيد، وساعتها شكل السما هيبقى بالضبط زي ما هو ظاهر قدامك كده، وهيستمر على كده ليل ونهار لشهور طويلة.
برغم إننا بُعاد جدًا عن الانفجار، وتأثيراته الضارة مش هتوصلنا هنا خالص، وكل اللي هيوصلنا هو ضوء انفجاره بس، لكن لو كنا أقرب نسبيًا للحدث ده، فكان ممكن تبقى دي نهاية المجموعة الشمسية بالكامل دون أدنى مبالغة! كإنك جبت أستيكة ومسحتها كلها من أولها لآخرها!
شوف بقى رحمة ربنا إنه خلق الفضاء واسع للدرجة دي، عشان انفجارات النجوم ولحظات ميلادها وموتها دي متأثرش علينا ولا تحدد حياتنا أو تهددها بالدمار بدون إنذار، عايزك بس تحاول تستوعب رحمة الإله العظيم اللي باعد المسافات اللي ما بيننا وما بين الأحداث الكونية الأسطورية دي، عشان يحفظ حياتنا كلها من الزوال في أقل من لحظة!
تخيل إن الأحداث الكونية العظيمة دي بتحصل في كل ثانية وكل لحظة حرفيًا من عمر الكون، وفي كل حتة وكل ركن فيه، وإحنا مش مدركين ولا مستوعبين ده في خضم حياتنا ومشاغلنا اليومية اللي إحنا فاكرينها كبيرة، وهي في الواقع أصغر من ذرة رمل وسط صحراء واسعة مالهاش نهاية!
مصادر:
https://www.discovermagazine.com/the-sciences/what-will-a-betelgeuse-supernova-look-like-from-earth
https://news.fnal.gov/2020/10/if-betelgeuse-goes-boom-how-dune-would-respond-to-a-nearby-supernova/
https://slate.com/technology/2020/02/betelgeuse-orion-supernova-night-sky-changing.html
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
