في مكانٍ ما على حدود سويسرا، موجود أكبر معمل علمي ومصادم جسيمات ذرية في تاريخ البشر، وواحد من أكتر المؤسسات العلمية اللي عليها جدل كبير، ونظريات مؤامرة مخيفة وأغرب من الخيال حرفيًا، مُعَجِّل الجسيمات التصادمي الهائل، أو سيرن زي ما بيسموه!
المصادم دا حسب علماء الفيزياء والكونيات، وظيفته الأساسية إنه يعيد إنتاج التصادمات والتفاعلات الذرية، والظروف الشديدة والمذهلة اللي كانت موجودة في لحظة بداية الكون وبعد الانفجار الكبير مباشرة، من خلال عمل تصادمات ما بين الجسيمات الذرية بسرعات توازي سرعة الضوء تقريبًا، عشان ينتج منهم نوع جديد من الفيزياء لسه إحنا منعرفوش!
رغم إن المعجل التصادمي الهائل دا كان سبب في بعض من أضخم وأهم الكشوفات والفتوحات العلمية في التاريخ كله، ففي بعض النظريات الغريبة اللي ظهرت مؤخرًا، وبتقول إن المفاعل دا والعمليات الفيزيائية الشديدة وعالية الخطورة اللي بتدور جواه، أدى لعمل فجوة في الواقع اللي إحنا عايشين فيه نفسه، وإن دا حصل السنة اللي فاتت!
من وقتها، والعالم اللي إحنا عايشين فيه مش هو نفسه، وفيه حاجات كتير مختلفة، ولسة في حاجات كتير هتتغير تمامًا إلى الأبد!
طب هل ممكن الكلام دا يكون حقيقي فعلًا؟! وإزاي حاجة زي دي ممكن تحصل، ويتسبب فيها أكبر مختبر علمي على سطح الكوكب؟! ويا ترى إيه تأثير دا على العالم اللي إحنا عايشين فيه؟! هات بقى كوباية الشاي الحلوة والنعناع في إيدك، وكمل معايا الموضوع دا للآخر، وهحكيلك الموضوع كله بالتفصيل!
في البداية كدا، وعشان تبقى فاهم هو إيه معجل سيرن اللي بنتكلم عنه دا، فخليني أقولك إن سيرن دا عبارة عن منظمة كبرى للأبحاث الفيزيائية والذرية، موقعها على الحدود ما بين فرنسا وسويسرا، أُنشئت سنة 1952، وكان اسمها في الأول (القنصلية الأوروبية للأبحاث النووية)، وفي بداية تأسيسها كانت عبارة عن مشروع مشترك بين دول كتير بلغ عددهم 20 دولة، وأول مشاريع اشتغلوا عليها كانت مؤثرة بشكل كبير في مسار فيزياء الجسيمات.
المشاريع دي نتج عنها إنجازات كبيرة، منها مثلًا تحديد عدد عائلات النيوترينو الخفيفة سنة 1989، وكمان اكتشاف خرق في قواعد تناظر الشحنة السوية أو اللي بيسموه الـ(CPT)، ويمكن يكون أشهر إنجاز ليهم اكتشاف بوزون هيجز ورصده المسؤول عن تحديد كتلة الأجسام سنة 2012، واللي فتحت سيل من جوايز نوبل بعدها.
في إنجاز كمان مش كتير يعرفوه، رغم إنه غيّر من شكل العالم كله ونقله لمكان تاني حرفيًا، وهو ابتكار شبكة الإنترنت العالمية اللي تم جوة مختبرات سيرن في مشروع كانوا بيسموه “إنكواير” سنة 1990! واللي أصبحت فيما بعد نواة لكل حاجة بتشوفها أو بتعملها على الإنترنت دلوقتي!
طيب جميل أوي، بس إيه بقى اللي حصل في سيرن السنة اللي فاتت، وأدى إلى تغيير العالم وكل الكلام الغريب دا؟! خليني أحكيلك.
شوف يا صديقي، يوم 5 يوليو من السنة اللي فاتت، اللي هي 2022، بدأت الدورة التالتة لمعجل سيرن، واللي جت بعد توقف دام لفترة طويلة استمرت من سنة 2019 ولحد وقتها، عشان كان بيتعمل عليه إصلاحات وتطويرات عشان تقدر تحسن من أدائه وتزود قوته ومقدار الطاقة اللي بيقدر يستعملها في عمل التصادمات الجسيمية.
لما بدأت الدورة التالتة، احتلت اهتمام العالم كله، لأسباب كتير مهمة، منها مثلًا إن التطوير اللي حصل على المعجل قبلها، كان كافٍ إنه يخليه يوصل لمرحلة من القوة هتقدر تكشف عن وجود جسيمات فيزيائية جديدة لسه غير مكتشفة لينا، ومنها بردو إن العلماء كلهم كانوا منتظرين منه تأكيدات ومشاهدات حقيقية لجسيمات مرشحة لإنها تبقى المكون الأساسي للمادة المظلمة الغامضة اللي بقالهم سنين مش عارفين يوصلوا لها.
بس اللي محدش كان متوقعه تمامًا، إن الدنيا كلها تتقلب، والمعجل يكسر كل الأرقام القياسية، في اليوم التاني بعد إعادة تشغيل المختبر!
اقرأ أيضاً: رجل في مواجهة الآلة
في يوم 6 يوليو، وبعد ما المفاعل بدأ عمله بيوم واحد بس، الفريق العلمي اللي شغال على تجارب الدورة التالتة أعلنوا في مؤتمر صحفي ضخم نقلته عدسات الإعلام العالمي كله إنهم نجحوا في اكتشاف 3 جسيمات ذرية جديدة تمامًا، ولم تُرصد قبل كدا في تاريخ فيزياء الجسيمات!
الـ3 جسيمات دول كانوا أنواع مختلفة ومتباينة من الكواركات، اللي هي عبارة عن واحدة من الجسيمات الأولية والأساسية اللي بيتكون منها المادة نفسها، واللي لحد الوقت دا محدش كان متخيل إن الأنواع دي منها موجودة.
لو هتسألني ليه؟ هقولك باختصار إن واحدة من خصائص الكواركات دي إنها بتتكون من حاجة اسمها الـ(Flavours) أو النكهات، والنكهات دي في الطبيعي المفروض في أي كوارك يكون عددها اتنين أو تلاتة بالكتير، لكن المختلف بقى المرة دي إن الجسيمات الجديدة اللي اكتشفوها دي كانت بتتكون من مجموعات من 4 و5 كواركات كاملين! ودي كانت حاجة جديدة تمامًا على علم فيزياء الجسيمات ومحدش شافها قبل كدا!
بس مش كل دي بقى المشكلة..
المشكلة إن ناس كتير ساعتها طلعوا وقالوا إن اللي حصل في سيرن دا كان بداية نهاية العالم كله، وإن كشف الجسيمات التلاتة دي ما هو إلا البداية، وبناء على كلامهم، فالسبب المباشر لدا كان القوة الضخمة غير المحدودة اللي أُنتِجت من طاقة تصادم الجسيمات الذرية جوة أنفاق المختبر، اللي بتمتد في شكل دايرة ضخمة تحت الأرض بيوصل قطرها لـ27 كيلومتر كاملين، واللي بتقدر فعليًا تعيد إنتاج الظروف الكونية اللي كانت موجودة في لحظة خلق الكون في الانفجار الكبير.
الإشاعات والكلام الكتير اللي انتشر قبل إعادة تشغيل المختبر كان بيقول إن الطاقة دي قادرة على إنها تتسبب في خلق ثقب أسود هيبتلع عالمنا كله بداخله، أو على أقل تقدير هتؤدي لتداخل ما بين العوالم المتوازية، وكسر في ستار الواقع نفسه! وإن دا هيكون البداية لسلسلة من التغييرات اللي هتحصل في التاريخ والواقع اللي إحنا عايشينه، وإن ذكريات الناس نفسها هتُستبدَل بذكريات ووقائع وأحداث تانية من كون تاني موازٍ منعرفش عنه أي حاجة!
اقرأ أيضاً: مشروع ستار شوت
يا ريت الموضوع توقف عند كدا بس، بل شطح أكتر لما ناس كتير ومنهم مشاهير في مجال الميديا طلعوا وقالوا إن الثقب الأسود المذكور دا غالبًا هيكون ميكروسكوبي وحجمه هيبقى صغير جدًا على إنه يتشاف مباشرة، لكن أثره على العالم هيبقى أغرب وأعنف من اللي أي حد ممكن يتخيله!
اللي هيحصل في البداية إن كل الناس البعاد عن موقع المختبر مش هيشوفوا أي حاجة من اللي بيحصل هناك، وهيبان ليهم كل شيء طبيعي في محيط الثقب الأسود أو اللي بيسموه أفق الحدث اللي هيكون محاوط المنطقة اللي فيها سيرن، إنما اللي موجودين جوة المنطقة نفسها هيبان ليهم كل شيء كإنه متوقف تمامًا، ودا لإنه كل شيء بداخل قطر المنطقة دي أو قطر أفق الحدث هيكون دخل بالفعل منطقة اللا عودة، وانفصل تمامًا عن الواقع الخاص بينا ودخل في واقع مختلف تمامًا!
كل الناس اللي هيكونوا واقعين بداخل محيط أفق الحدث وقطره دا، واقعهم هيتغير تمامًا، وهيشوفوا العالم بنظرة مختلفة، وحتى طريقة مرور الوقت نفسه عليهم، وطريقة حركتهم عبر الزمان والمكان هتتغير وهتنعكس حرفيًا، يعني الزمن هيستبدل المكان، والمكان هياخد مكان الزمن والعكس، وفوق كل دا، ففجأة الجاذبية العملاقة اللا نهائية الناتجة عن الثقب الأسود الصغير دا، هتتسبب في مط أجسامهم كلهم وجذبهم بقوة هائلة إلى المركز، والمط اللي هيحصل لأجسامهم دا ظاهرة حقيقية بتحصل للأجسام اللي بتبتلعها الثقوب السوداء اللي حجمها صغير، وبيسميها علماء الفيزياء الفلكية باسم “تأثير المكرونة السباجيتي” أو الـ(spaghettification)!
كل دا طبعًا هيكون البداية، قبل ما المحيط دا يبدأ في التوسع، ويمتد تأثيره لكل مكان موجود على سطح الكوكب حرفيًا، ومحدش بقى يعرف إيه اللي ممكن يحصل لما ندخل جوة محيط ثقب أسود، هل هننتهي تمامًا ونتدمر ونتحول إلى غبار كوني محفوظ في سجلات الكون وفي أعماق التفرد الموجودة في مركز الـ(Blackhole)؟ ولا هنترمي كلنا بكامل حياتنا وواقعنا وذكرياتنا في قلب واقع مختلف أو عالم موازي، موجود فيه أحداث ووقائع تانية مختلفة تمامًا؟!
اقرأ أيضاً: الدورة الثالثة لمعجل سيرن واكتشاف 3 جسيمات ذرية جديدة
لأ والأغرب كمان من دا، إن في فيديو ظهر بعدها وانتشر بشكل واسع جدًا على السوشيال ميديا، وظهر فيه مجموعة من الأشخاص لابسين أزياء سودا وملثمين ومغطيين رؤوسهم زي السحرة، بيمشوا في قلب الساحة اللي قدام المبنى الرئيسي في سيرن، وقدام تمثال الإله شيفا المميز الموجود قدام المبنى، واللي أهدته الحكومة الهندية لسيرن احتفالًا بتعاونهم مع بعض من سنين طويلة، وبعدين بيظهر في الفيديو مشهد مخيف باين فيه إن مجموعة الأشخاص دول بيقتلوا واحدة على سبيل كونها تضحية بشرية قدام التمثال!
الفيديو دا وقت ما ظهر، في لحظات أصبح تريند وناس كتير تداولته في كل مكان سواء في السوشيال ميديا أو الإعلام، وجزء منهم بيقولوا إن علماء سيرن عندهم في الواقع أجندة خفية؛ إنهم بيهدفوا لفتح بوابة للجحيم وإن حتى الشعار المميز للمؤسسة كلها عبارة عن رقم 666، اللي هو رقم الشيطان، وكلام كتير من دا!
طبعًا زي ما إنت شايف حاليًا، مفيش أي حاجة من دي حصلت لحد دلوقتي، وكل الادعاءات الغريبة اللي ظهرت دي نفوها كلها وأثبتوا إنها مش حقيقية، لكن رغم دا، لسه في ناس لحد النهاردا شايفين ومقتنعين اقتناع تام إن في شيء تغير في عالمنا وواقعنا وقت بداية التشغيل التالت للمختبر، وإن عالمنا وواقعنا تصادم مع واقع تاني موازٍ لينا، وإن دا سبب كثرة الحوادث الغريبة والأزمات والكوارث العالمية الكتير اللي بتحصل مؤخرًا!
فـإنت بقى شايف إيه؟!
هل ممكن كلام الناس دول يكون فيه أي قدر من الصحة، ويكون في حدث كارثي ضخم أكبر من حدود العقل والاستيعاب بدأ من جوة أروقة معجل سيرن، وغيّر عالمنا وواقعنا كله معاه؟!
ولّا كل الكلام دا مش أكتر من مجرد خيال علمي شاطح حبتين، من ناس عايشين في نظرية مؤامرة وبيخافوا ويتطيروا من كل العلوم اللي فوق استيعابهم؟!
السؤال مطروح، وإجابته هسيبها لخيالك.
مصادر:
https://www.youtube.com/watch?v=w-hVQhCgYtw
https://home.cern/news/news/physics/lhc-run-3-physics-record-energy-starts-tomorrow
https://home.cern/news/news/physics/lhcb-discovers-three-new-exotic-particles
https://phys.org/news/2022-07-cern-touts-discovery-exotic-particles.html
* تنويه: الأفكار المذكورة في المقال لا تعبر بالضرورة عن رأي الموقع.
*********
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
