الإنسان بيشوف إيه بعد ما يموت؟ .. الجزء الأول
سؤال غريب وتقع إجابته في بوتقة الحاجات اللي عمرنا ما هنلاقي لها إجابة قطعية مثبتة.
الموت له مهابة، تكمن هيبته في أن مصارعيه لا صوت لهم، بل ينتهون معه، بس إحنا قدرنا نوصل لشوية حقائق علمية قربتنا من إجابة سؤال معقد زي ده، والموضوع على الرغم من سوداويته فهو مليان تفاصيل.
ركز معايا..
بعد غزوة “بدر” أمر النبي بدفن الموتى من “قريش” في “القليب”، وده زي بئر كده هناك، في أثناء دفنهم وقف ينادي المشركين دول بأسمائهم فيقول: “يا عتبة بن ربيعة، ويا شيبة بن ربيعة، وأمية بن خلف، ويا أبا جهل بن هشـام، هل وجدتهم ما وعد ربكم حقًا، فإني قد وجدت ما وعدني ربي حقـًا؟”.
فقال له عمر: أتنادي قومًا قد جيفوا يا رسول الله؟ فقال النبي: “والذي نفسي بيده ما أنتم بأسمع لي منهم، غير أنهم لا يجيبون!”.
أنا النهاردة جاي أحكي لك حاجة صعبة شوية، وهصطحبك في رحلة قد تكون قريبة أو بعيدة، ربي يطرح البركة في أعمار الجميع.
الميت يدرك ما حوله
كلامي معاك يا رفيق عن الحتمية المطلقة في الكون الفسيح.. المـوت، تفتكر الإنسان بيشوف إيه أول ما يموت؟ وهل بيقدر يسمع؟
خد نفس عميق..
سنة 2018 فجرت جامعـة “ستوني بروك” الأوساط العلمية ببحث شهير جدًا كان عنوانه (Humans Know When They’re Dead)، يعني البشر بيعرفوا أنهم موتى.
عن طريق التجارب العلمية قدر مجموعة من الباحثين تحت رعاية الجامعة في نيويورك يكتشفوا سر عظيم، إن مراكز السمع والإبـصار في المخ تحديدًا بتستمر في إعطاء إشارات لفترة طويلة بعد الوفاة تتجاوز الساعات، وهي هي نفس الإشارات اللي بيعطيها الشخص الحي.
على عكس مراكز رد الفعل والمراكز الرئيسية الحيوية في المخ والمسؤولة عن التنفس وباقي العمليات الحيوية اللي بتتعطل فورًا مع الوفاة، اكتشفوا إن مراكز السمع والإبصار بتفضل شغالة، الميت بيسمع وبيشوف بكل وضوح!
ده شيء مرعب يا رفيق أنا عارف..
اقرأ أيضاً: ماذا يحدث عند الموت
دراسة للحظات ما قبل الموت
لكنها حقيقة صادمة لما تعرفها، لأن على الرغم من إنه سامع وشايف كل حاجة فهو مش قادر يكون رد فعل، أو يرد حتى على اللي بيتكلم قدامه.
القلب بيقف وكل العضلات والخلايا بتموت بسرعة، كأنها كانت موقوتة لميعاد وفاة محدد من زمن، بس الإنسان بيسمع خبر وفاته وبيكون مدرك تمامًا إنه حاليًا “ميت” تمامًا.
طيب.. بيشوف إيه بالظبط؟
خليني هنا أمشي معاك واحدة واحدة، ومبدئيًـا قبل الموت بلحظات وتحديدًا 30 ثانية على الأقل.
بحسب دراسات قدمتها جامعة ميتشيجان، وفي ورقة علمية نشرتها عالمة الأعصاب بالجامعة دكتورة (Jimo Borjigin) قالت إن الإنسان ولمدة أكثر من 30 ثانية قبل الوفاة يرى أشياء مذهلة، لأن بمراقبة نشاط الدماغ لدى عدد من البشر لحظة الموت، لقوا نشاط غير عادي في المنطقة البصرية من المخ.
بعد شوية درسوا صور المسح بالرنين المغناطيسي، لقوا إن مراكز الإبصار في اللحظات دي تحديدًا بتكون أكثر نشاطًا عن أي مركز تاني، وأقوى بكتير جدًا من النشاط الطبيعي للشخص الحي، وإن الإشارات اللي بيستقبلوها من المخ في اللحظات دي بتشير إن الإنسان بيشوف وميض قوي جدًا.
تعرف على: أعراض وأسباب قلق الموت وطرق العلاج
ماذا يرى الإنسان قبل الموت؟
بيشوف أشياء عالية الإضاءة بشكل كبير جدًا، بيشوفها بوضوح تام، لأن الإشارات القوية اللي بيعطيها مركز الإبصـار في المخ، بتشير إنه شايف موجات ضوئية عالية القوة والوضوح.
هنا لما تقرأ الأبحاث دي تحضرك آية من القرآن اللي قدامنا من 1400 سنة وأكتر، وما زلنا بنكتشف مدى العظمة اللي فيه كل يوم، بسم الله الرحمن الرحيم: “لَّقَدْ كُنتَ فِي غَفْلَةٍ مِّنْ هَٰذَا فَكَشَفْنَا عَنكَ غِطَاءَكَ فَبَصَرُكَ الْيَوْمَ حَدِيدٌ (22)”، سورة ق.
يعني الإنسان بيشوف الناس حواليه لأن عيونه بتكون شايفة كويس جدًا، وسامع كويس جدًا، إضافةً لأنه شايف وميض قوي جدًا، محدش شايفه غيره.
بسم الله الرحمن الرحيم: “فَلَوْلَا إِذَا بَلَغَتِ الْحُلْقُومَ (83) وَأَنْتُمْ حِينَئِذٍ تَنْظُرُونَ (84) وَنَحْنُ أَقْرَبُ إِلَيْهِ مِنْكُمْ وَلَٰكِنْ لَا تُبْصِرُونَ (85)” الواقعة.
طيب..
في القرآن الكريم هنشوف بقى الوميض العالي ده اللي بيشوفه الموتى قبل 30 ثانية من الموت بيكون عبارة عن إيه؟
هل يرى المحتضر الملائكة؟
أولًا فيه إثبات إن فيه ملائكة بتحضر الميت لحظة وفاته زي ما أنتَ عارف، وهم ملائكة الموت، بس خليني أفكرك، بسم الله الرحمن الرحيم: “وَهُوَ الْقَاهِرُ فَوْقَ عِبَادِهِ ۖ وَيُرْسِلُ عَلَيْكُمْ حَفَظَةً حَتَّىٰ إِذَا جَاءَ أَحَدَكُمُ الْمَوْتُ تَوَفَّتْهُ رُسُلُنَا وَهُمْ لَا يُفَرِّطُونَ (61)” الأنعام.
يعني الإنسان لحظة الموت بيجيله حفظة، ودي ملائكة بيعرضوا عليه أعماله بسرعة شديدة، ثم قال ابن عباس وغير واحد: “لملك الموت أعوان من الملائكة، يخرجون الروح من الجسد، فيقبضها ملك الموت”.
كمان لاحظ الباحثين في التقارير العلمية الخاصة بتسجيل إشارات المخ لحظة الوفاة تقريبًا، نشاط زائد في حالات الغالبية العظمى مختص بالمنطقة الخاصة بالذاكرة، نشاط يفوق الطبيعي عشرات المرات وللحظات ثمَ تنطفئ فجأة.
ده اللي قيل عنه في الأثر، إن الإنسان بيشوف عمله كله في الدنيا وبيقع كأنه بيشوف شريط حياته بسرعة بيمر قدامه.
اقرأ أيضاً: رحلة الحياة ونهاية الطريق
حضور الموت وعلاماته
طيب.. الناس نوعين، الصالحين ودول ينطبق عليهم قول الله سبحانه وتعالى: “الَّذِينَ تَتَوَفَّاهُمُ الْمَلَائِكَةُ طَيِّبِينَ ۙ يَقُولُونَ سَلَامٌ عَلَيْكُمُ ادْخُلُوا الْجَنَّةَ بِمَا كُنتُمْ تَعْمَلُونَ (32)” النحل.
يعني بعد الملائكة ما بتتوفى الإنسان الطيب، تقوله “سلام عليكم ادخل الجنة بعملك”، وخد بالك من نقطة “بعملك” دي، لأن العمل اللي عمله في الدنيا هيكون أساس دخوله الجنة، والفكرة في العمل لأن بعد كده فيه ناس هتدخل الجنة برحمة ربك.
الظالمين بقى ودول نزل فيهم آيات كتير: “الَّذِينَ تَتَوَفَّاهُمُ الْمَلَائِكَةُ ظَالِمِي أَنفُسِهِمْ ۖ فَأَلْقَوُا السَّلَمَ مَا كُنَّا نَعْمَلُ مِن سُوءٍ ۚ بَلَىٰ إِنَّ اللَّهَ عَلِيمٌ بِمَا كُنتُمْ تَعْمَلُونَ (28)” النحل.
على نفس المنوال هتلاقي آيات تانية بتتكلم عن اللي بتتوفاهم الملائكة ظالمي أنفسهم دول وبتوصف مدى البؤس اللي هيشوفوه.
هذا لا يمنع إنهم هيشوفوا برضه ملائكة، ومخهم اللي هيفضل شغال ده على مراكز السمع والإبصار هيبعت لنا إشارات بأنه شايف وميض قوي جدًا قبل الوفاة بثواني.
طيب أنا عرفت بيشوف إيه قبيل الوفاة بثواني؟ بيحس بإيه؟
يتبع…
اقرأ أيضاً: فلسفة الموت
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
