سجلات فوياجر الذهبية
تعالى معايا أحكيلك على حاجة هتسحل لك تفكير وتغيرلك مودك، شايف الصور اللي قدامك دي؟ دي عبارة عن كبسولة زمنية (Time Capsule)، فيها رسالة سلام ومحبة من البشرية لأي حضارة فضائية تلاقيها في يوم من الأيام، بعد مستقبل بعيد جدًا ممكن منكونش إحنا فيه موجودين خلاص.
طب دي إيه بالظبط؟!
كوباية شايك الحلوة في إيدك، وتعالى بقى أحكيلك، ومتنساش النعناع.
لوحة فوياجر الذهبية
بص يا سيدي، اللي قدامك في الصور ده حاجة اسمها “السجلات الذهبية لفوياجر” (Voyager Golden Records)، ودي عبارة عن لوحة معدنية مطلية بالدهب، منقوش عليها بيانات ومعلومات عن البشر، وعن موقعنا وموقع الكوكب بتاعنا وسط النجوم، وجواها أسطوانة فونوجرافية فيها حاجات تانية هتعرفها حالًا.
اللوحة دي اتصممت لأول مرة من فريق من أكبر علماء وكالة ناسا (NASA)، تحت تنفيذ وإشراف العالم الكبير كارل ساجان (Carl Sagan)، وده كان جزء من برنامج ومشروع فوياجر (Voyager) اللي أطلقته ناسا سنة 1977.
مشروع فوياجر ده كان عبارة عن مسبار أو (Probe) هيُطلق عشان يسافر عبر المجموعة الشمسية كلها ويجمع معلومات عنها، وبعدين يخرج من النظام الشمسي بتاعنا كله للفضاء العميق بين النجمي (Interstellar Space)، عشان يبدأ رحلة طويلة تقدر بملايين السنين لحد ما يوصل لأماكن بعيدة ومجهولة تمامًا في الكون.
مسبار فوياجر 1 ومسبار فوياجر 2
فعلًا اتعمل منها اتنين، واتحط واحدة على مسبار (Voyager 1) وواحدة تانية على مسبار (Voyager 2).
طب دول كان جواهم إيه بالظبط؟!
دول يا سيدي كانوا عبارة عن أسطوانات فونوجرافية (Phonograph Record)، زي أسطوانات المزيكا اللي بتشتغل على الجراموفون كده، محطوط معاها الكاشيت بتاعها، والإبرة اللي بنستعملها عشان نشغلها، منقوش عليهم من بره تفسير للوحة وكيفية فك الرموز بتاعتها وتشغيلها، ورموز تبين موقع إطلاقها من الفضاء، وكمان موقع الشمس بتاعتنا فين بالنسبة لـ14 نجم نابض أو (Pulsar) في الكون، ممكن أي حد يستعملهم عشان يحدد موقعنا.
اقرأ أيضاً: وكان إيه لازمته نطلع الفضاء؟!
ميراث برنامج فوياجر
مش بس كده، كل ده السطح وتعليمات الشغيل بس! المهم في الموضوع بقى اللي جوه الأسطوانة دي.
الأسطوانة متسجل عليها 115 صورة بطريقة تناظرية أو (Analoge)، عشان يوروا أي حد يلاقيهم بعد زمن بعيد شكل الحياة على كوكب الأرض عامل إزاي، وكمان شكلنا إحنا بشر، وشكل الحيوانات وشكل كوكبنا، الصور دي كان من ضمنها شكل وادي النيل وسيناء متصورين من القمر الصناعي، وأماكن تانية من الكوكب، وصور للكوكب نفسه من بره، ولباقي كواكب المجموعة الشمسية زي عطارد والمريخ والمشتري، وكمان شوية صور ليها أهمية علمية وفيها كميات وحسابات فيزيائية ورياضية، وصور تانية بتبين شكل المجموعة الشمسية، وصور لجسم الإنسان وأعضائه.
ده غير إن في صور لحيوانات وحشرات ونباتات ومناظر طبيعية بتبين طبيعة وتضاريس كوكب الأرض، وكمان شوية صور من الفن المعماري على الأرض، والأكل والغذاء اللي بيتغذى عليه الإنسان، غير الصور اللي بتبين الأعمال والوظائف والأشغال اليومية اللي بيمر بيها الناس.
كمان في صور فيها رموز عن الحجم والزمن والكتلة ومقادير فيزيائية كتير، وصور تانية توضح المركبات والروابط الكيميائية، وطبعًا كل المقاييس دي متفسرة ومتعرفة في الصور الأولى بطريقة يقدر يفهمها أي كائن ذكي حتى لو ميعرفش لغة الأرض، وده بالاعتماد على ثوابت فيزيائية تعتبر ثابتة في أي حتة في الكون ويقدر يفهمها أي كائن ذكي.
ده لينك يشرحلك بالتفصيل كل التعليمات والرموز اللي على الأسطوانة وغلافها من بره، من موقع وكالة ناسا الرسمي:
https://voyager.jpl.nasa.gov/golden،./golden-record-cover/
اقرأ أيضاً: الأوتار الفائقة ونظرية الكون الحلقي
سجلات فوياجر الذهبية
ده كده بالنسبة للجزء المرئي، إنما الجزء اللي بعده جزء صوتي، متسجل عليه التحية بأكتر من 55 لغة من لغات الأرض، بداية من اللغة الأكادية اللي كان بيتكلمها السومريين القدامى، اللي هي حضارة العراق الغابرة، مرورًا باللغات العربية والأوروبية، وانتهاءً بلغة الوو (Wu)، اللي هي لغة صينية حديثة.
كمان في تسجيلات من الأصوات الموجودة على الأرض، زي أصوات الأطفال والحيوانات والرعد والبرق وتغريد العصافير وصوت المية والقبلات وصوت القلب البشري وغيرهم كتير، ده غير تسجيل مدته ساعة كاملة للموجات الدماغية (Brain Waves) لواحدة من الفريق اللي كان شغال عليها، وزوجة كارل ساجان فيما بعد، اللي هي آن درويان (Ann Druyan)، والتسجيل ده اتاخد ليها وهي بتفكر في موضوعات مختلفة، منها تاريخ الأرض والحضارات البشرية، ومنها المشاكل اللي بتواجهنا على الأرض، وكمان إحساسها وهي أول مرة تقع في الحب، عشان هي وقتها كانت بتحب كارل ساجان!
بعد كده أكتر من 90 دقيقة من المزيكا الكلاسيكية، منها المزيكا الشرقية، ومنها الغربية، وتسجيلات نادرة لناس زي بيتهوفن وباخ وغيرهم من الموسيقيين العالميين.
كمان في تحية صوتية من كيرت والدهايم (Kurt Waldheim) سكرتير عام الأمم المتحدة وقتها، وكلمة صغيرة من الرئيس الأمريكي جيمي كارتر، كانت بتقول:
“هذه هدية من عالم صغير، تعطي شيئًا من أصواتنا ومن معلوماتنا، صور وموسيقى من فكرنا وأحاسيسنا، نحن نحاول البقاء وعليه فربما نعيش لبعض الوقت من الزمان ونعاصركم”.
هتلاقي تفصيل لكل الموجود جوه السجلات الذهبية في اللينك الرسمي هنا من موقع وكالة ناسا:
https://voyager.jpl.nasa.gov/golden،./whats-on-the-record/
اقرأ أيضاً: وكالة ناسا تعين علماء دين!
أطول مهمة لناسا
تخيل أنت، تخيل كل ده موجود على قطعة التكنولوجيا الصغيرة دي، اللي أطلقناها للفضاء سنة 1977، ونجحت بالفعل إنها تخرج من المجموعة الشمسية سنة 2012، وحاليًا هي مسافرة في الفضاء بين النجمي بسرعة أكتر من 17 كيلومتر في الثانية! أكبر سرعة لمركبة فضاء في التاريخ لحد دلوقتي.
وبعد 40 ألف سنة جايين، الكبسولة الزمنية الصغيرة دي هتعدي قريب من النجم جليزا أو اللي بيسموه (Gliesa 445)، وبعدها هتكمل رحلتها في الفضاء إلى ما لا نهاية، وهتفضل موجودة ومحفوظة لما يقارب المليار سنة!
حتى بعد ما البشر ينتهوا تمامًا، هيفضل السجل الذهبي الصغير ده أشبه بسفينة نوح فضائية صغيرة، شايلة بصمتنا جواها، وبتقول للكون إننا يومًا ما كنا هنا، كنا موجودين وعايشين.
يومًا ما كنا هنا، بنفكر وبنحب وبنتصارع، وبنرفع عيوننا على السماء ونبص على النجوم ونحلم بالمستقبل المجهول.
حاجة لو فكرت فيها، لازم ولا بد توريك قد إيه البشر لما بيكونوا في أحسن حالاتهم، ممكن يحققوا المستحيل، ويوصلوا لحاجات عمرنا ما كنا نتخيل إننا نوصلها.
أسئلة وخيالات مثيرة
يا ترى لو في يومٍ ما بعد ملايين السنين، قدرت حضارة متطورة غيرنا في الكون، تلاقي السجلات الذهبية دي، وتشوف لأول مرة أثرنا وبصمتنا على الكون فيها، هيحسوا بإيه؟!
هل هيندهشوا وينبهروا، ولا هيخافوا ويترعبوا مننا؟! هل هيفهمونا أصلًا، وهيفهموا اللي إحنا حاطينه ده، ولا بالنسبة لهم هنبقى مجرد لغز صغير جه واختفى في لمح البصر، في مدة لا تقدر بلحظات من عمر الكون الهائل؟!
هل لو عكسنا التفكير، ممكن نقول إن في يوم من الأيام ممكن إحنا نفسنا نلاقي أثر وسجلات من حضارة قديمة، بعتوا بصمتهم لما بين النجوم، عشان يورونا شكلهم وحياتهم، ويقولولنا إحنا كنا هنا؟!
كلها أسئلة وخيالات مثيرة، وتخليك تحلم، ولازم هترسم البسمة على وشك، وأنت بتفكر في الاحتمالات اللا نهائية!
لو عايز تشوف وتسمع بنفسك كل الأصوات والصور اللي ممكن تشوفها الحضارة الفضائية البعيدة دي في المستقبل، تقدر تشوفها كاملة من هنا:
مصادر:
https://www.newyorker.com/،./voyager-golden-record-40th،.
https://www.sciencefocus.com/،./nasas-interstellar،./
https://www.planetary.org/space-images/the-golden-record
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
