قنال سويس

قنال سويس

*************

من بين

شعاع الذكريات

وملامح

الماضي البعيد

طيف الملاحم شدني

حسيت

بدقة لذتي بتزيد

تغريد

مشاهد عزتي وفخاري

نقشت مداري

دندنات أناشيد

داخل وريد المجد

ضي بلادي

مالي البوادي

والصدى تغريد

البر شادي

والربوع بتنادي

لهفة فؤادي

في الخيال عناقيد

وبريد خيالي

تابلوهات بتلالي

زاد اشتعالي

والوضوح بيبوح

لوح الزمان

شاهد عيان مش ناسي

وأساسي راسي

والمدى مفتوح

روح انتمائي

فتحت أوراقي

وسواقي نبضي

في السنين بتدور

وفي كل دور

خيط التفاني يكر

المد فاض

والجزر مش هيضر

البحر حُــر

والفلك مهما تكون حديد

الموج عنيد

ومابين

عبيد السخرة والحدوتة

توته …..

هتفضل سيرة للأجيال

الصورة

في قماش الوطن

فتلة حرير

الصورة

في كتاب الزمن

عنوان كبير

الصورة

نور

وطيور

وخير

وسلام

لو سطر قام

من وسط أحلام

إللي كانوا بيحلموا

باللقمة حاف

واللحمة جعضيض

والسريس دندي وخشاف

فرّع يادوب

لتبك من جواه قلوب

بتدوب في سر الأرض

والإخلاص دليل

ويسيل شقاهم

سلسبيل يروي الغيطان

ياما الزمان

قابل سنابل

شاربة من كاس المحن

ياما الزمان

قابل قنابل

ميتة في حضن الشهيد

عناقيد فدا

ملضومة في عقود الكفاح

مليون صباح الخير

على الطير الجسور

نور الوطن

منصورعلى الليل العتيق

يا ضي وراني الطريق

بحرين عينيكي مفتحين

راسمين فنار

وإنت إللى بتضوي

يامقصرة

كل السكك ع الملاحين

والاسم في الصفارة بيدوي

قنال سويس

وهاويس ومينا

وكام مدينة وصيادين

وإنت على جبين الوطن

همسة وزغروتة

من سن خمسة

ولـْحَد دلوقتي

دوقتي عيوني كتير

وساعاتي عصاقير

فوق ملامحك زقزقت

سامر حنين

واصل  مابين

النني والموج البتول

النول بيغزل لك

تقومي تلبسيني

عودك يساعني

وقلبك المليان دفا

يبني لي من دق الوفا غيه

ويوماتي

بتصبح عليا الذكريات

جدي إللي كان

الصبر رسماله

والفقر متعود عليه

طاوعت إيديه المعجزات

م الأهرامات

ولحد لمَّا القهر

عز الضهر فرفر

ضفر جدايل عزة الأوطان

جدي إللى كان

الصعب بيهابه

والمستحيل يخشاه

وحياته معجم جد وبساله

باعت رسالة

الحرف منها كتاب

والكلمة تفتح

ألف باب للحق

لو يوم خازوق اندق

هنشق القبور

لو سرب بوم

حاول يحوم ويحط

هيلاقى فوق الشط جنية

لسه العرق

بيسمى ع المية

جدي إللى كان

الضحيهة في دنشواي

هوَّ إللي سوىَّ الشاي

على طقش الزلط

وربط حزام المقطوعية

وقال ياليل

مواويل سنين فاتت

صداها في الودان

ألحان عزيمة

لا همها برد الشتا

ولا قرصة القيالة

من لبة السقالة لمدق الشقا

العمر علم

ع المقاطف والفيسان

لسه الزمان ع الضفتين

متحني بالدم إللي سال

مازال تاريخ الملحمة

بمبوطى والمكسب حلال

خط القنال

موال قديم

موال جديد

موال

على ناي الولاد السمر

غنى لبورسعيد

طلق البطولة

فجر الهم

إللي مرشوق في الضلوع

ياما انطفى نور الشموع

والعزم قاده

وانشق ضي الفجر

في إسماعيلية

يا سمسمية دندني

على خطوة الصامدين

الفرح

في عيون الأماني بكر

الصبر قال للنصر

نادي ع الغريب

شدت ولاد الأرض

أوتار الغناوي

والغاوي نقط

وانشرح قلب السويس

قنال سويس ….

سويس قنال …..

بالعربى وبكل اللغات

إنت إللي جاي

وإنت إللي فات

وإنت في حبات القلوب

هتعيشي مصرية

* تنويه: الأفكار المذكورة في المقال لا تعبر بالضرورة عن رأي الموقع.

اقرأ أيضا:

حلواني

خـَد الصباح

بورسعيد