غزونا المشبوه
داخل مداري
شعاري
رافض التزييف
وبأداري حيرتي وخوفي
وأعدل المجاديف
تيار نزيف المحن
مرسوم ومتدبر
الهم كبر علينا
والقلق ع الكيف
كيف الحياة تستقيم
والنار بترعانا
والنبض فينا سقيم
والوهم مرعانا
إللي معانا
قليل البخت والحيلة
واللي علينا
مراده تغرق الأحوال
بين الخيال والحقيقة
ديقة ومدقات
بين الآهات والمهازل
تاهت الأوقات
وانهار ثبات العقول
رمحت خيول العيب
والفكر وسط اللهيب
تراكيب بتفسدنا
البؤس نخور جسدنا
ويأسنا طرزان
والفارس إللي ساندنا
زود الأحزان
لما ميزان السلام
اختل حوالينا
حلينا كل العقد
بالظلم والإجرام
بين النظام المثالي
والتبالي خيوط
نجدل شروط التعالي
حبل للمربوط
ونشوط عادتنا الجميلة
ونهدم الأخلاق
وقيامنا بعد الفراق
حواليها كام مخطوط
كل اللي قادوا الحروب
واتسلوا بجراحنا
عايزين تغور الشعوب
ويحلوا مطرحنا
عايزين صباحنا
إللي شالنا
م الوسع والضيق
ينسى الطريق
والضلام من تاني يدبحنا
عودي يا روحنا
وبيدي غزونا المشبوه
النصر لو لمنا
عمر الدليل ما يتوه
أكتوبر اللي سقانا
الشهد ورقانا
عايش معانا
وبيسمي على الدقات
يا دوامات التجني
قصري في الدور
سيبي زهور التمني
تجبر المكسور
الزور نهايته المزابل
والغرور منبوذ
هيفوز أكيد التاني
والهدوء واللين
يا مشعللين الحروب
وملبشين الكون
ومفخخين الدروب
بالملعنة والدون
سيبو عيون الصفا
تتملا معانينا
ياخد إيدينا الوفا
بعد الجفا الملعون
يا دون فارقنا
زهقنا ونفسنا نرتاح
نلقى البراح حسنا
والانشراح مداح
يبقى جناح الثقافة
ريشة مش مغشوش
وعادتنا تبقى العشوش
ونبوش في مبادئنا
وتبل ريقنا الصراحة
والسماح يرتاح
يطلع صباح الأماني
بالأمان مفروش
اقرأ أيضاً:
وسنبقى بالمقاومة والصبر ننشُد ألحان النصر
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
