الرجل الذي نسيه الروس في الفضاء

النهارده تعالى أحكيلك حكاية ظريفة متتصدقش، ومن أغرب ما يكون، تخيل معايا إنك رائد فضاء، وإنك طلعت في مهمة روتينية لمحطة فضائية حوالين مدار كوكب الأرض، لحد هنا تمام مفيش مشاكل.

بس هتعمل إيه لو لقيت في يوم إن الدولة اللي طلعتك للفضاء دي، اتدمرت ومبقتش موجودة على الخريطة أصلًا، وإنك بقيت محبوس بره الكوكب كله عشان مبقاش في دولة أنت منتمي ليها، ومفيش حتى فلوس عشان ترجعلها؟!

طب مين ده وإزاي حصل معاه كده؟! إزاي شخص ممكن يفضل موجود في الفضاء لما يقرب من سنة كاملة بدون ما يعرف يرجع؟!

كوباية شايك الحلوة في إيدك، وجواها عود النعناع الجميل، وتعالى أحكيلك الحكاية من الأول.

المواطن الأخير

بص يا سيدي، الحكاية كلها بدأت يوم 18 مايو سنة 1991، لما مهندس الطيران السوفييتي أو الروسي حاليًا سيرجي كريكالوف “Sergei Krikalev”، طلع للفضاء من ميناء بايكونور الفضائي “Baikonur Cosmodrome”، اللي وقتها كان جزء من الاتحاد السوفييتي، بس هو موقعه حاليًا في دولة إحنا نعرفها باسم كازاخستان “Kazakhstan”.

الراجل ده كان طالع في مهمة المفروض إنها تستمر لمدة 5 شهور، عشان يعمل إصلاحات ومهمات روتينية، وياخد باله من إدارة محطة الفضاء السوفييتية اللي هي بيسموها مير “Mir”.

التدريب بتاعه اللي خده قبل ما يطلع للفضاء وقتها، كان بيأهله إنه يفضل قاعد هناك الـ5 شهور دول بس، مش أزيد من كده.

بس اللي حصله فوق بقى، هي قصة جديرة بفيلم وثائقي!

انهيار الاتحاد السوفيتي

عايزك تتخيل إن الراجل ده في وقت ما هو كان فوق بيتفرج على كوكب الأرض من على بعد 350 كيلومتر تقريبًا بره سطح الكوكب، حصل الانقلاب الشهير على الرئيس السوفييتي ميخائيل جورباتشوف “Mikhail Gorbachev” يوم 19 أغسطس سنة 1991.

نزل الشعب الروسي للشوارع في مظاهرات عارمة، خلت الدبابات بتاعت الجيش السوفييتي تتحرك بعدها في قلب الميدان الأحمر أو الـ”Red Square”، قلب الاتحاد السوفييتي المرعب.

وبعدها الموقف اتلم بس بعد ما كان الثمن عظيم، والثمن ده كان إعلان انهيار وتفكك الاتحاد السوفييتي لـ15 دولة، وإعلان الدول دي استقلالها التام عن السوفييت، وبداية انهيار الحزب الشيوعي اللي كان بيحكم روسيا من العشرينات!

دول زي كرواتيا وسلوفينيا أعلنوا استقلالهم من الاتحاد اليوغوسلافي، ودول زي أوكرانيا وكازاخستان ظهروا لأول مرة كدول مستقلة، وبدأوا ينفصلوا باقتصادهم عن روسيا الأم.

بسبب ده، الاقتصاد وقع تمامًا وحصل تضخم رهيب أدى لإن المرتبات اللي الناس كانت بتاخدها مبقتش تكفي تجيب وجبتين غدا.

عزيزي المواطن الأخير لا يمكن إعادتك للأرض

الدنيا باظت تمامًا، وسقوط الاتحاد السوفييتي العظيم كان حديث العالم في وقتها، خصوصًا في أمريكا اللي كان بقالها سنين طويلة بتخوض حرب باردة ضد السوفييت.

كانت بتتنافس معاها في مجالات عديدة، من بينها الحاجة اللي بنتكلم عنها هنا، اللي هي الفضاء وسباق الوصول للقمر.

وده بيرجعنا مرة تانية لسيرجي، الراجل في وسط ما هو على محطة الفضاء الروسية، وبيتفرج على الأرض من بره، دول كاملة وقعت ودول كاملة جت للوجود.

فجأة، ميزانية وكالة الفضاء السوفييتية اللي طلعته للفضاء مبقتش تكفي أي حاجة، عشان سياسة روسيا وقتها كانت توفير الفلوس بأي ثمن عشان يقدروا يصمدوا قدام التضخم اللي كان ممكن يسبب انهيار كامل للدولة الروسية وقتها، فبسبب ده، كل حاجة ليها علاقة بالفضاء تحولت فجأة لمجرد رفاهية ومالهاش أي لازمة.

” -طب وأنا يا عم الحج؟! مش هتنزلوني ولا أيه؟!

-لا يا صاحبي، خليك قاعد فوق بقى لحد ما نقولك!

ضحية الفضاء

بدأت روسيا في الوقت ده تبيع رحلات للدول اللي كانت عايزة تطلع الفضاء على صاروخ سويوز Soyuz الروسي الشهير، كوسيلة لعمل فلوس، وفعلًا باعوا رحلة للنمسا بـ 7 مليون دولار، وبعدها رحلة لأول صحفي ياباني يتم إرساله للتصوير في الفضاء، بـ 12 مليون دولار، وغيرهم بعدها كتير.

مش بس كده، ده كان في كلام كمان إنهم عايزين يبيعوا محطة الفضاء الروسية كلها باللي فيها، عشان تجيب فلوس!

أنت متخيل؟! يبيعوا محطة الفضاء بالراجل اللي عليها، اللي هو محطة فضاء استعمال طبيب، وعليها مهندس طيران هدية، السعر إنبوكس!

طبعًا الموضوع تحول إلى مهزلة، وسيرجي مبقاش عارف يعمل إيه، خصوصًا إن كان في رواد فضاء تانيين كتير بييجوا يقعدوا معاه شهر ولا اتنين وينزلوا، وهو الوحيد اللي بيفضل قاعد فوق زي الكلب.

خصوصًا كمان إن تخصصه مخليه هو الوحيد اللي يعرف يدير محطة الفضاء دي، مفيش أي حد من اللي جم كان مهندس طيران، أو مؤهل لإدارة المحطة، فبالتالي كل حاجة كانت على كتفه هو.

اقرأ أيضاً ما هي الإشارات الغريبة الآتية من مركز المجرة؟

اقرأ أيضاً لغز رحلة أبوللو

تعرف على قصة مستكشف رأس الرجاء الصالح

ألمانيا تستبدل سيرجي كريكالوف برائد ألماني

وكان في خطة إنهم يطلعوا رائد فضاء جديد عشان ياخد مكانه ويدير المحطة، بس للأسف وقفت عشان مكانش في فلوس بردو.

المشكلة كمان في إيه؟! إن كان عنده كبسولة سويوز Soyuz Capsule اللي يقدر يستعملها للخروج من محطة الفضاء والدخول للأرض مرة تانية، ودي بتبقى متصممة للأمان، عشان لو حصل أي مشكلة في المحطة، الرواد اللي عليها يقدروا يهربوا.

بس لو كان عمل كده، كان معناه إن المحطة هتبقى فاضية تمامًا مفيش حد بيديرها، وهتتدمر تمامًا ويضيع معاها شغل سنين وميزانية ملايين ويمكن مليارات الدولارات اتصرفت على تصميمها وإطلاقها، فعشان كده قرر إنه يقعد ويستنى.

برغم إن قعاده كان ممكن يسببله مشاكل صحية عديدة، زي خطر الإصابة بالكانسر، وخطر تدمير عضلاته وعظام جسده، وحتى حاسة البصر كمان، بسبب الإشعاعات الضارة اللي بيتعرضلها بشكل مستمر وهو بره الغلاف الجوي للأرض، بس هو مفكرش في نفسه، كل اللي كان بيفكر فيه بلده وواجبه ومسؤوليته تجاهها.

وعشان كده فضل مستني كتير جدًا، قعد أكتر من 10 شهور في الفضاء مستني، لحد ما الفرج جه في صورة ألمانيا اللي دفعت 24 مليون دولار عشان تشتري مكان لرائد فضاء ألماني يطلع مكانه، ويدير هو المحطة بداله، الرائد ده كان الألماني كلاوس ديتريش فلاد “Klaus-Dietrich Flade”.

عاد من الفضاء ووجد أن الدولة التي أرسلته قد اختفت من الوجود

وفعلًا يوم 24 مارس من سنة 1992، رجع سيرجي أخيرًا إلى الكوكب مرة تانية، عشان يلاقي نفسه نازل في دولة غير الدولة اللي طلع منها، المدينة اللي نزل فيها اللي هي أركالياك “Arkalykh”، مبقتش سوفييتية ولا روسية حتى، بل تحولت إلى مدينة في دولة كازاخستان المستقلة!

تخيل أنت إنه في الوقت اللي قضاه على المحطة في الفضاء، المدينة اللي كان عايش فيها هو ومراته وابنه مبقتش اسمها ليننجراد Leningrad، بقى اسمها سانت بيترسبرج “St. Petersburg”.

تخيل إنه على محطة الفضاء دي، لف حوالين الأرض أكتر من 5000 مرة، وفي الفترة دي، مساحة دولته قلت بقدر يزيد عن 5 مليون كيلومتر مربع!

تخيل إن حتى الفلوس اللي كان بياخدها، أو المرتب بتاعه، اللي هو كان 600 روبل، واللي قبل تفكك الاتحاد كان يعتبر راتب عالٍ جدًا، مبقاش ليه أي لازمة بعد ما رجع الأرض، بسبب التضخم الاقتصادي “Inflation”، لدرجة إن سواق الأوتوبيس بتاع النقل العام بقى بيقبض أكتر من ضعفين المرتب بتاعه!

أول رائد فضاء روسي يسافر للفضاء

عايزك بس تتخيل شكله وهو خارج من كبسولة السويوز بعد ما رجع للأرض أخيرًا، والكاميرات بتصوره وهو بيخرج من الكبسولة، عرقان وشاحب ووشه الدم هربان منه، لابس بدلة فضاء عليها علم الاتحاد السوفييتي، اللي هو اتحل واتفكك خلاص بقاله سنة! آخر مواطن لدولة مبقتش موجودة على الخريطة أساسًا!

قصته وقتها كانت قالبة الدنيا، وده عشان كان بطل حقيقي، هتسألني ليه، هقولك بسبب عزيمته وإصراره ده، محطة الفضاء الروسية مير Mir فضلت عايشة، وتطورت فيما بعد عشان تصبح النواة الأولى لأعظم حاجة حصلت في تاريخ التعاون الدولي لغزو الفضاء، الحاجة دي كانت محطة الفضاء الدولية “International Space Station” أو الـ”ISS”.

والأدهى من كل ده إنه كان متواضع جدًا، وبيصر إنه معملش حاجة وإن ده كان واجبه مش أكتر، وبسبب ده، تم اعتباره بطل روسي حقيقي.

بعدها رجع للفضاء تاني في مهمة تاريخية، كأول رائد فضاء روسي يسافر للفضاء على متن مكوك من تصميم وكالة ناسا “NASA” الأمريكية، بعد انتهاء الحرب الباردة أخيرًا، وكمان بعدها طلع لمحطة الفضاء الدولية أو الـISS، كأول رائد فضاء روسي عليها، هو والأمريكي روبرت كابانا “Robert Cabana”!

سيرجي كريكالوف يسجل رقم قياسي في محطة الفضاء

وفي خلال حياته بعدها، سيرجي كريكالوف سجل رقم قياسي للوقت اللي قضاه في محطة الفضاء، يقدر بنحو 803 يوم، و9 ساعات، و39 دقيقة! منهم 41 ساعة و8 دقايق قضاهم بره المحطة، سابح في وسط الفراغ اللا نهائي، وهو بيصلح حاجات أو بيعمل مهمات سير في الفضاء “Space Walks” روتينية!

تخيل أنت الراجل ده حس بإيه، وهو بيتفرج على الكوكب بتاعنا من بره، تخيل إيه اللي كان في دماغه، وهو شايف المشهد المسالم الجميل ده، من الفراغ المظلم،

غير مهتم بكل الحروب والصراعات والثورات والانقلابات اللي كانت بتحصل على السطح، عشان حسب كلامه من الارتفاع ده كل حاجة مهما كانت كبيرة ومخيفة، كانت بتبان تافهة ومالهاش لازمة!

في الآخر، بعد كل ده، وبعد ما الراجل قضى أكتر من سنتين ونص من عمره في الفضاء وبيتفرج على الكوكب من بره، لسه في ناس بتقولك الأرض مسطحة ومفيش فضاء يا كافر يا ملحد يا عدو الله!

مصادر

https://www.sun-sentinel.com/،./fl-xpm-1992-03-26

https://www.discovermagazine.com/،./the-last-soviet-citizen

https://www.rbth.com/،./330415-last-soviet-citizen

* تنويه: الأفكار المذكورة في المقال لا تعبر بالضرورة عن رأي الموقع.

*************

لمتابعة قناة اليوتيوب لأكاديمية بالعقل نبدأ، اضغط هنا

لقراءة المزيد من المقالات، اضغط هنا