اكتشاف إن مركز الأرض توقف عن الحركة! .. كيف سيؤثر هذا على العالم؟!

من أسابيع قليلة، ظهر فريق من العلماء ونشروا ورقة بحثية بتقول حاجة مرعبة فعلًا، وممكن تخلي قلبك ينقبض لما تسمعها لأول مرة. الحاجة دي إن مركز الأرض توقف عن الدوران تمامًا، وهيبدأ يغيّر اتجاه دورانه بالكامل في خلال السنين اللي جاية!

الدراسة دي اتنشرت على دورية (Nature Geoscience)، وبتتراجع حاليًا من جانب الأقران، وعلماء العالم كله بيتكلموا عليها دلوقتي، عشان الحقائق العلمية المذهلة اللي بتعرضها ممكن يكون ليها أثر غير مسبوق على الحضارة البشرية. وده لإن الظاهرة الفريدة دي ممكن تكون أثرت في المناخ، والحياة على سطح الأرض، ولسه تأثيراتها هتظهر أكتر السنين الجاية!

هات بقى كوباية شايك الحلوة ونعناعك في إيدك، وتعالى معايا النهارده أحكيلك عن الموضوع الغريب ده، وإزاي ممكن آثاره تأثر على مستقبلنا بطريقة محدش كان يتوقعها أبدًا.

شوف يا صديقي، مبدئيًا كده، قبل ما أشرحلك إيه اللي الدراسة العلمية دي قالت إنه بيحصل للكوكب بالظبط دلوقتي، وإيه آثاره علينا، لازم الأول تفهم الأرض اللي إنت ماشي عليها دي عبارة عن إيه، وبتتكون من إيه، والحقيقة إن الموضوع بسيط وشرحه مش صعب خالص.

طبقات الأرض ومكوناتها الداخلية

الأرض يا سيدي بتتكون من طبقات، الطبقة الأولى اللي إنت بتمشي عليها دي، اسمها القشرة الأرضية (Earth’s Crust)، ودي المنطقة من الأرض اللي إحنا بنقدر نوصلها، سُمكها بيتراوح ما بين 8 كيلومتر لحد 40 كيلومتر في أماكن مختلفة من سطح الكوكب، والمنطقة دي أجهزة الإنسان قدرت تحفر فيها وتوصل لعمق كبير، بس دي أعمق حتة من الأرض بنقدر نوصلها عمليًا.

بعد كده بقى الموضوع بيبقى أغرب والوصول له صعب لدرجة الاستحالة، وده عشان الطبقة التانية اللي اسمها الـ( Mantle)، بتبقى موجودة تحت القشرة الخارجية. ودي كلها عبارة عن صخور سخنة جدًا، وسُمكها بيوصل لـ2900 كيلومتر تقريبًا، وطبعًا دي الإنسان لسه مقدرش يوصلها لحد النهارده، بسبب عمقها الكبير جدًا وصلابتها الشديدة اللي بتخلي الحفر فيها صعب جدًا وغير ممكن بالتكنولوجيا الحالية.

أما بقى الطبقة اللي بعدها، فدي اسمها طبقة اللب الخارجي أو الـ(Outer Core)، وهي في الحقيقة عبارة عن طبقة سُمكها 2250 كيلومتر تقريبًا من الحديد المنصهر، ودرجة حرارتها عالية جدًا لدرجة إن الظروف المناخية والحرارية في المنطقة دي من الأرض أقرب لحرارة وسخونة الشمس نفسها!

مش بس كده، ده لسه جوه الطبقة دي موجود المركز الداخلي بقى أو لب الأرض نفسه، اللي هو الـ(Inner Core)، وده عبارة عن كورة ضخمة سمكها 1300 كيلومتر تقريبًا، متكونة بالكامل من الحديد الصلب (Solid Iron)، حرارتها بتوصل لحرارة سطح الشمس نفسها، ويمكن أعلى كمان! وسبب إنها صلبة رغم السخونة الهايلة دي محدش يعرفه بدقة، بس في الغالب بسبب ظروف الضغط الرهيبة اللي في مركز الكوكب.

اقرأ عن: المادة المظلمة في أبحاث علم الكون

الأسرار المختبئة تحت الأرض

المشكلة بقى إن بسبب كون الطبقات دي بعيدة جدًا عننا وصعب الوصول ليها عمليًا، رغم كل التطور التكنولوجي للحضارة البشرية في العصر الحديث، وبسبب ده، لحد النهارده علماء الفيزياء والجيولوجيا مش عارفين بالظبط إيه اللي بيدور في مركز الأرض، ولا بيحصل إزاي، كل اللي عندنا كان مجرد نظريات وتكهنات، ولحد فترة قريبة كنا فاكرين إن مركز الأرض مجوف وفيه فراغ أصلًا!

لكن دلوقتي، وبعد الدراسات الجيولوجية الحديثة لجوف الأرض، عرفنا أخيرًا إن التفاعلات والتحركات اللي بتحصل جوه المركز ده، ليها تأثيرات مباشرة على شكل الحياة على الأرض بالكامل، وخليني أحكيلك إزاي بالتفصيل.

أول حاجة وأبسط حاجة إن الاحتكاك ما بين طبقة الحديد المنصهر الخارجية، وطبقة الحديد الصلب الداخلية بتولد مجال كهرومغناطيسي شديد القوة، والمجال ده بيشكل درع خفي وشفاف حوالين الأرض وبيحميها من الإشعاعات الشمسية والكونية الضارة، وبيحافظ على المناخ بتاعنا، ومن غيره مش هيكون في حياة من الأساس!

ده غير إن حركة اللب الداخلي الحديدي ده، اللي بتنشأ أصلًا بسبب التأثيرات الكهرومغناطيسية وبسبب تباين واختلاف قوى الجاذبية المؤثرة على موقعه في جوف الأرض، بتأثر على طريقة حركة الأرض ودورانها، وعلى المناخ وطول اليوم نفسه!

طب إيه علاقة ده كله بينا؟!

اقرأ أيضاً: دمار كوكب الأرض

دراسة حديثة ترصد تباطؤ في دوران اللب الداخلي للأرض

علاقته بينا يا صديقي إن في علماء من الصين اسمهم يي يانج (Yi Yang) وجياودونج سونج (Xiaodong Song) لسه ناشرين ورقة بحثية مخيفة فعلًا، وقالبة الدنيا في العالم كله، بيقولوا فيها إن لُب الأرض الداخلي حركته مش ثابتة وبتتغير، وإنه بمعدل كل 70 سنة تقريبًا، اتجاه دورانه بيتحول لحتة تانية واتجاه تاني مختلف!

بناءً على الداتا اللي عندهم حاليًا، والمبنية على دراسات شديدة الدقة والتعقيد، عملوها على مدار سنين طويلة على طبقات الأرض الداخلية، واستعملوا فيها بيانات الموجات الزلزالية اللي عدت من جوه قشرة الأرض نفسها ولُبها، ما بين سنة 1964 لحد سنة 2021، فمركز الأرض سرعة حركته بتقل بقالها فترة طويلة من 2009، لدرجة إنه حاليًا وصل لمرحلة ممكن معاها اعتباره توقف تمامًا!

توقفه الشامل ده تمهيد لإنه يغير اتجاه دورانه اللي كان قبل كده متوجه من الشرق إلى الغرب عكس حركة الأرض، ويتحول لإنه يدور من ناحية الغرب إلى الشرق!

اللي إنت متعرفوش بقى، إن الموجات الزلزالية دي في الواقع بتبقى ظاهرة عالمية شاملة بتمتد جوه طبقات الأرض كلها، وأثناء سيرها وانتشارها جوه طبقات الأرض الداخلية، بتستغرق وقت معين لأن ليها سرعة معينة بتعتمد على قوتها وشدتها، وعلى عوامل جيولوجية تانية كتير.

فريق العلماء دول بقى من خلال دراسة سرعة الموجات دي والوقت اللي بتستغرقه في الانتشار من طرف الكوكب لطرفه الآخر، قدروا يحددوا إن سرعة الموجات الزلزالية دي بتقل جدًا بقالها فترة، على العكس من اللي كان بيحصل زمان! وده معناه إن حركة اللُب الداخلي نفسها بتتباطأ لحد ما هتتوقف تمامًا!

العلماء يكتشفون تغيرات دوران لب الأرض وتأثيرها على طول اليوم

المخيف في الموضوع بقى إن كلامهم ده بتؤيده مشاهدات علمية تانية بيسجلها علماء وخبراء جيولوجيين من أنحاء العالم كله، كلها بتأكد إن فعلًا مناخ الأرض والطقس والظواهر البيئية والسلوك الحيواني ونسب ارتفاع مياه البحار والمحيطات، وحتى طول اليوم نفسه بيتغير كل فترة مع تغير حركة لب الأرض ده! وخليني أقولك إزاي..

عندك على سبيل المثال لا الحصر، بناءً على دراسة وإحصائية شاملة اتعملت من قريب، فالعلماء سجلوا إن اليوم كان أقصر بمقدار 0.01 ميللي ثانية لما كان اللب الداخلي بيدور في اتجاه الغرب بالنسبة للقشرة الأرضية! وكان أطول بمقدار 0.12 ميللي ثانية لما كان بيدور في اتجاه الشرق!

يعني لما اللب كان بيدور في اتجاه معاكس للقشرة الأرضية، كان اليوم بيبقى أطول. ولما كان بيدور مع اتجاهها، كان اليوم بيبقى أقصر! صحيح إن الفرق أجزاء صغيرة جدًا من الثانية، لكن متنساش إن الفروقات دي بالنسبة للتكنولوجيا الحديثة والبنية التحتية الخاصة بتكنولوجيا الاتصالات والـ(GPS) فروقات ضخمة جدًا.

مثلًا الأقمار الصناعية دلوقتي مبتقدرش تعتمد على الساعات الأرضية التقليدية بسبب إن كل شوية طول اليوم يتغير، وبقوا بيعتمدوا على طرق تانية في حساب الوقت، عشان تفضل بياناتهم دقيقة!

اقرأ أيضاً: هل الأرض كروية أم مسطحة

كشف سبب دوران الحيوانات بشكل دائري

حسب كلامهم بناءً على بيانات الأبحاث اللي وصلوا لها، في آخر انقلاب في حركة الدوران دي حصل في بدايات السبعينات من القرن اللي فات، واللي بيحصل دلوقتي هو تمهيد لتغير جديد في اتجاه الحركة، وعشان كده إحنا بنشوف ظواهر بيئية غريبة بقالنا فترة، ومش عارفين نفسرها ولا فاهمين بتحصل ليه!

مثلًا في خلال الأسابيع والشهور اللي فاتت، في ظاهرة غريبة انتشرت ما بين بعض قطعان الحيوانات في العالم بتخليهم يلفوا حوالين بعض في شكل دائري، والظاهرة دي ليها تفسيرات علمية وطبية كتير، منها مثلًا إن في مرض معين اللي دفعهم للسلوك الغريب ده، بس التفسيرات دي لحد دلوقتي مش متفق عليها ومش مؤكدة.

واحد من ضمن التفسيرات دي إن التغيرات المستمرة في حركة واتجاه دوران المركز الحديدي الصلب للأرض، ومعاه التغيرات اللي بتحصل في المجال المغناطيسي، بيأثر عليهم وعلى بوصلتهم الحيوية، وبيتسبب في الظاهرة النادرة دي!

دلوقتي العلماء دول بيحاولوا يبنوا على المعلومات اللي عندهم ويتوسعوا في دراسة البيانات الزلزالية الناتجة عن الهزات الأرضية أو الانفجارات البركانية أو حتى التجارب النووية، عشان يقدروا يوسعوا الفترة الزمنية اللي بيبصوا عليها، ويأكدوا صحة البحث بتاعهم!

ماذا يحدث إذا توقف لب الأرض عن الدوران

لو سألتني عن معنى المعلومات دي إيه، وإيه مدى تأثيرها علينا وعلى شكل حياتنا، فخليني أقولك إن طبعًا الكلام ده مش معناه إن الحياة على كوكب الأرض هتنتهي أو حتى هتتأثر تأثر كبير، لأن من الواضح إن الظاهرة دي بتتكرر باستمرار وحصلت قبل كده كتير بمعدل مرة كل 70 سنة، بس الفكرة بقى إنها هتدينا لأول مرة في التاريخ نظرة حقيقية على طريقة عمل كوكبنا، وسبب حدوث التغيرات المناخية والبيئية عليه، ومدى تأثيرها على وجودنا عليه في المستقبل.

يعني مثلًا، ممكن من خلال دراستنا أكتر للظاهرة دي مع التكنولوجيا الحديثة اللي بنبتكرها كل يوم في مجال مراقبة موجات الزلازل ورصد حركتها وانتشارها، نقدر نفهم أكتر سبب التغيرات المناخية العنيفة اللي بتحصل على الكوكب حاليًا، وبتخلي أماكن معينة من العالم عمرها ما كانت بتمر بظروف بيئية قاسية وشديدة، تمر بكوارث مناخية وبيئية غير مفهومة أو مفسرة!

وصولنا لمعلومات زي دي هيكون شيء لا يقدر بثمن فعلًا، وهنقدر من خلاله نتحكم في مصيرنا وطريقة حياتنا نفسها على سطح الكوكب!

يا ترى بقى تفتكر إنت شكل المناخ والبيئة بتاعتنا في المستقبل هيبقى عامل إزاي؟ وإيه مدى تأثير الانقلاب الجديد اللي جاي ده علينا؟!

الإجابة متروكة لخيالك إنت.

المصادر:

https://www.nature.com/articles/s41561-022-01112-z

https://www.vice.com/،./earths-core-has-stopped-and-may،.

https://www.inverse.com/،./earths-inner-core-stopped،.

https://www.popularmechanics.com/،./earths-inner-core،./

https://phys.org/news/2023-01-earth-core.html

* تنويه: الأفكار المذكورة في المقال لا تعبر بالضرورة عن رأي الموقع.

_________________________________

لمتابعة قناة اليوتيوب لأكاديمية بالعقل نبدأ، اضغط هنا

لقراءة المزيد من المقالات، اضغط هنا