مثلث حلايب وشلاتين .. حدث هيغير تاريخ العالم لسنين في التاريخ
مثلث حلايب مكنش شوية صحرا وبدو عايشين فيها، لا دي كانت واحدة من أهم مواني مصر في تاريخها كله، ميناء عيذاب، تعرف ميناء عيذاب؟
ده يا صاحبي ميناء كان موجود على البحر الأحمر في شرق حلايب، على بعد ٢٥ كم تقريبًا من حلايب، لو بصيت على الخريطة هتلاقي المثلث ده هو الفاصل بين المنفذ البحري واليابسة، وداخل في تكوين مصر الجغرافي، والحتة دي بيسكنها لحد دلوقتي قبائل من العبابدة والبشارية، ودول بطون قبيلة البجا، اللي بادئة من القصير شمالًا، لحد حدود إريتريا جنوبًا مرورًا بشرق السودان، جميل؟ حلو..
تاريخيًا، الحتة دي تبع مصر من أيام المصريين القدماء، ونظرًا لأن المنطقة دي كانت مليانة مناجم دهب وزمرد، فكانت هدف لأعمال التنقيب من عهد الدولة القديمة، وقدر المصريين القدماء إنهم يعملوا معاهدات هدنة وعدم اعتداء، ونفس الموضوع عمله الروم بعد كده.
القبائل هناك دخلت الإسلام متأخر، عن طريق تزاوج قبائل “بني يونس من بني ربيعة” معاهم، واستخدامهم في حربهم مع بني بشر في القرن التاسع الميلادي، يعني بقوا عرب بالمصاهرة.
منطقة حلايب
الحتة دي جغرافيًا كانت ملتقى التجارة ما بين اليمن والهند، كانت مدينة مزدهرة وفيها مسجد وسوق كبير، منفذ بحري زي بورسعيد كده، منفذ مصر على البحر الأحمر بعيد عن الأراضي اللي كانت تحت إيد الصليبيين، عشان الحجاج المغاربة والأفارقة والمصريين ميعدوش من أراضي الشام المسيطر عليها الجيش الصليبي، كانوا بينزلوا تحت عند حلايب، ومن ميناء عيذاب يوصلوا جدة، ورحلة الحج دي موثقة في كتب المؤرخين كلهم.
أقدمهم هو كتاب “سفرنامة” لمؤلفه ناصر خسرو علوي سنة ١٠٨٨م، وفيها وصف عيذاب بأنها تابعة لسلطان مصر، وعشان طبيعة السكان القبلية المقفولة على نفسها، كانت إدارتها بتتقسم ما بين أربع أفراد، والي متعين من سلطان مصر، وناظر للجباية والمكوس، وقاضي من قوص ونواحيها، وأخيرًا سلطات البجا من أهل البجا ودوره تنظيم القوافل والرحلات البحرية وشكرًا.
الحتة دي تحديدًا حصل فيها حدث هيغير تاريخ العالم لسنين قدام، تسمع عن “رينالد من شاتيون”؟
رينالد من شاتيون أمير الكرك
دا كان حاكم الكرك الصليبي، وكان بيكره العرب كره العمى، وعشان تفهم القصة نمهد لها الأول.
سنة ١١٨٠م ملك مملكة بيت المقدس “بلدوين الرابع” عمل اتفاقية سلام مع صلاح الدين الأيوبي، فيها حرية تنقل وتجارة بين الفريقين، مدتها سنتين، حلو؟ لا مش حلو، لأن الاتفاقية دي معجبتش الأخ رينالد، وقالك المسلمين ميعدوش بسهولة كده، فسنة ١١٨١م فيه قافلة بتعدي من تيماء بين مكة ودمشق، بيسرقها ويأسر اللي فيها كلهم.
صلاح الدين بعت لبلدوين يقوله يعني ده ينفع؟ فبلدوين بعت لرينالد يقوله ادفع تعويض، قام رينالد رفض، وصل الرفض لصلاح الدين الأيوبي، فبيقرر إنه يأسر ٢٥٠٠ حاج جايين من أوروبا لبيت المقدس، وبيبعت لبلدوين إنه يعمل تبادل أسرى ويخلي رينالد يرجع اللي أخده، فرينالد رفض تاني، وبيقرر إنه يعمل أغبى حاجة ممكن تتعمل.. بيعلن إنه رايح ينبش قبر الرسول في المدينة!
اقرأ أيضاً: أغرب ما حدث في الحجاز
عندما أنقذ المصريون والمغاربة قبر رسول الله
في البداية رينالد قطع أشجار غابات الكرك ونخيل العريش كله وحمله على قلعة الكرك، وهناك استخدم الخشب ده في صنع خمس سفن ضخمة وشوية مراكب صغيرة بالتعاون مع صليبية عسقلان، وأخد المراكب وهيا مفككة نقلها على جمال لسواحل البحر الأحمر ناحية بحر القلزم، ودهنها قار أسود وركبها، وقرر يهاجم عيذاب.
هناك، دمر ١٦ سفينة في المينا ملك للمسلمين، وسرقوا سفينة من اللي بينقلوا الحجاج، ودمروا المؤن بتاعتهم، وسرقوا مركبين جايين من الهند واليمن ببضايعهم، وقرروا يتجهوا ناحية المدينة لنبش قبر الرسول.
هنا صلاح الدين بيقرر إنه ينتقم، فبيبعت لمصر والإسكندرية لصنع سفن بسرعة، وبيخلي “حسام الدين لؤلؤ” مسؤول عن القصة دي كلها، وبسرعة بيصنعوا السفن، وبيبعت يجيب بحارة من المغرب، وراح على عيذاب وجزيرة أيلة، وبيلحق أسطول رينالد قبل ما يوصل جدة، وبتدور واحدة من أكبر المعارك البحرية، بينتصر فيها حسام الدين لؤلؤ ويأسر البحارة الصليبيين، ويجيبهم من عيذاب لقوص للقاهرة ويطوف بيهم في الشوارع ويعلن انتصار صلاح الدين الأول على الصليبيين.
معركة حطين
اللي بيحصل بعد كده إن بلدوين الرابع بيموت، وبيخلفه بلدوين الخامس، عيل صغير بيقرر رينالد إنه يتخلص منه، ويعين مكانه أخت بلدوين الرابع وجوزها كي دي لوزنيان، وسنة ١١٨٦م بيقرر رينالد إنه يهاجم قافلة حج للمرة التانية من نفس المكان، بس المرادي أخت صلاح الدين كانت فيها، فبيبعت صلاح الدين سفراء للوساطة بيرفض رينالد يقابلهم، وبيرفض نصيحة الملك كي دي لوزنيان، وده اللي خلى صلاح الدين يخطط لموقعة حطين الشهيرة.
بينتصر في حطين، وبيأسر رينالد والملك كي جي لوزنيان، وبعد ما حطين خلصت، بينصب صلاح الدين خيمة كبيرة، على يمينه كي جي لوزنيان وعلى شماله رينالد، بيطلب صلاح الدين مشروب متلج ياخد منه بقين ويديه للوزنيان، فبيشرب هو كمان ويدي لرينالد، فهنا صلاح الدين بيتعصب ويقوله: “أنا قلتلك إديله؟”.
بيدخل خيمة جانبية وينده على رينالد، بييجي رينالد فصلاح الدين يدعوه للإسلام، رينالد بيرفض، فصلاح الدين بيقوله: “أنا أنوب عن الرسول في الانتصار لأمته”، وبيطلع سيفه ويجيب دماغه، ويخرج بيها يديها للأمراء، وتنتهي قصة رينالد للأبد، يعني ببساطة موقعة حطين سببها ميناء عيذاب، مثلث حلايب.
تعرف على: النظام الاجتماعي لمكة قبل الإسلام
اكتشاف ميناء عيذاب
فضل ميناء عيذاب يشتغل تحت إمرة المصريين سنين طويلة، يتعرض للهجمات ويتصد، يعمر ويخرب، لحد ما في عهد الأشرف برسباي سلطان المماليك بيتمرد عليه البجا، فبيبعت حملة عسكرية تخرب الميناء خالص، وتنتهي سيرة الميناء ده من التاريخ وتختفي معالمه.
لحد ما سنة ١٨٩٦م بيوصل مصر أثري اسمه “ثيودور بنت” وبيبدأ ينقب عن الآثار في المنطقة هناك، عشان يكتشف آثار المسجد الشهير اللي كان فيها، وعملات ذهبية من عهد الظاهر بيبرس، وبيحدد إن الموقع ده هو ميناء عيذاب التاريخي، التابع لمصر.
بعد ٣ سنين بالظبط من اكتشاف ميناء عيذاب سنة ١٨٩٩م، مصر بتوقع على اتفاقية الحكم الثنائي بينها وبين بريطانيا، وفيه بتقرر بريطانيا إن مثلث حلايب داخل حدود مصر، خط عرض ٢٢ درجة، وبعدين بعد ٣ سنين كمان، حصل تعديل إداري بسيط على الاتفاقية دي.
هل حلايب وشلاتين سودانية أم مصرية؟
التعديل ده كان على إيد ناظر الداخلية المصري وقتها، اللي أمر بتشكيل لجنة فنية برئاسة مدير أسوان المصري، و٣ مفتشين واحد مصري وواحد سوداني وواحد من خفر السواحل المصرية، لدراسة سكان المنطقة دي، وخلص التقرير إن سكان حلايب رعويين كثيري التنقل بين مصر والسودان، وتسهيلًا لمرورهم ولأن السودان كانت تحت الحكم المصري الإنجليزي المشترك وقتها، قرر يعدل الحدود الإدارية ويخلي إدارة حلايب في إيد حكومة الخرطوم، منها فيها يعني.
على نفس المنوال كمان سمح إن أراضي وادي حلفا تروح لإدارة السودان، كون إن خط العرض ٢٢ جايب حلفا من النص، ومخلي الظهير الزراعي ومحصول النخيل كله تحت إدارة مصر، وشاف إن ده ظلم للسودانيين، فعدل بردو الحدود الإدارية وخلى إدارة وادي حلفا في إيد الخرطوم هو كمان، لحد سنة ١٩٥٦ لما السودان نال استقلاله، وبدأت القصة دي كلها في الظهور.
تقدر دلوقتي تحكم بنفسك، هل أرض حلايب وشلاتين وأبو رماد أرض مصرية تاريخيًا وجغرافيًا، ولا أراضي سودانية؟ متسمحش لأهل الفتنة إنهم يقنعوك بالعكس أو يوقعوا بينك وبين أخوك، وارجع لكتب التاريخ وهيا تحكيلك.
مقالات ذات صلة:
الحشاشين .. من هم؟ ولماذا حاولوا اغتيال صلاح الدين الأيوبي؟
الجندي المغربي في أشعار الحرب الأهلية الإسبانية
* تنويه: الأفكار المذكورة في المقال لا تعبر بالضرورة عن رأي الموقع.
*************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
