في وسط الحروب والصراعات اللي العالم كله عايش فيها دلوقتي، في كارثة مخيفة بتحصل ببطء في المحيط ومحدش واخد باله منها، الكارثة دي ممكن أثرها يكون مدمر ويهدد وجود الجنس البشري كله.
ودا عشان لسه من أيام فاتت، في دراسة علمية جديدة اتنشرت في دورية (Science Direct)، بتقول إن التيارات البحرية في المحيط الأطلنطي اللي بتنظم حرارة ومناخ الكوكب كله تقريبًا، حاليًا بتمر مرحلة انقلاب وانهيار غير مسبوقة، ودا بنسبة كبيرة ممكن يتسبب في كارثة بيئية ومناخية ضخمة في السنين اللي جاية، هتغير خريطة العالم كله وللأسف مش هنقدر نتعامل معاها بأي طريقة.
طب يا ترى إيه الكارثة دي؟ وإزاي ممكن تيارات المحيط دي تنهار؟ وإيه الأثر اللي ممكن يعود علينا كلنا بسببها؟
هو دا موضوعنا النهاردا، فحضر كوباية الشاي بالنعناع، وتعالى معايا في رحلة جديدة ومخيفة هتفتح عينك وتفكيرك على أشياء محدش بيتكلم فيها ولا يسمع عنها، رغم إنها ممكن تهدد وجودنا كلنا على سطح الكوكب.
يلا بينا!
تيارات المحيط الأطلسي
بص يا سيدي، زي ما انت عارف، الكوكب اللي إحنا عايشين عليه دا ضخم جدًا، ومعقد تعقيد يفوق أي وصف ممكن يخطر في بالك مهما كنت متصور.
وزيه زي أي نظام معقد، عنده مجموعة من العناصر اللي بتشتغل مع بعضها عشان تسهل العمليات اللي بتحصل على سطحه وتنظمها، ومن أهم العوامل اللي بتأثر في وجود الحياة على سطح الكوكب حرارة المحيط وتياراته.
طب إزاي؟ خليني أشرحلك.
خد عندك مثلًا، اللي بيحصل في شمال المحيط الأطلنطي، لما الصيف بييجي وحرارة المياه تزيد، فهي بتتبخر وتطلع في طبقات الجو العليا، بتسيب وراها مياه تانية أبرد شوية ومالحة أكتر حبتين، وغير دا كمان، لما الجليد البحري بيتشكل في شمال المحيط لما بييجي وقت الشتا، بتلاقي المياه اللي على السطح بتتجمد، وطبعًا عشان المياه دي المفروض إن فيها ملح، فالملح دا مش بيتجمد زي المياه، بل بيفضل موجود، وبناء عليه المياه الباقية بتبقى مالحة أكتر، يعني في الحالتين دول سواء لما البحر بيبرد ويتجمد أو لما بيسخن والمياه بتتبخر، الملوحة اللي في مياه المحيط بتزيد.
طب وبعدين؟
اقرأ أيضاً: السعة الحرارية للماء والانضباط الكوني العظيم
كيف تؤثر تيارات المحيط الأطلسي في المناخ؟
اللي بيحصل بعد كدا يا صديقي إن الملوحة اللي بتزيد في المياه دي بتخلي كثافتها تزيد، عشان طبعًا بمعادلة منطقية، المياه مبتبقاش صافية، لكن شايلة جواها تركيزات مرتفعة من الملح، وعشان كدا كتلتها وكثافتها بتزيد، وطبعًا لما الكثافة والكتلة بيزيدوا، اللي بيحصل بعدها إن وزن المياه دي بيزيد، وبتبدأ تغوص في أعماق المحيط لتحت.
طب ولما تغوص في أعماق المحيط، هل قوانين الفيزياء هتسمح بكدا يعني؟ وهل سطح البحر هينخفض؟ أكيد لأ طبعًا.
اللي بيحصل بعدها علطول إن المحيط عشان يعوض المياه اللي بتنزل في أعماقه دي، بيجيب تيارات قوية من مياه المحيط الدافية اللي جاية من تيارات الخليج عشان تحل محل المياه التقيلة اللي بتغوص للأعماق، وبناء عليه الحركة دي بتخلق تيار مستمر ودايرة بتساهم في تنظيم حركة البحر والملوحة دي.
الدورة دي بيسموها الدورة الحرارية الملحية، وهي بتساهم في توزيع المياه الدافية والحرارة على كوكب الأرض كله، مش شرط المنطقة اللي في شمال الأطلنطي فقط، كأنها حزام ناقل بيحول دورة الملح دي لحرارة بتلف على مناطق الأرض كلها وبتوزع عليها الحرارة عشان تنظم المناخ وتساهم في حفظ الحياة في أعماق المحيط.
دوران انقلاب خط الزوال الأطلسي
واحد من التيارات اللي بيقيسها العلماء حوالين العالم دايمًا، عشان يفهموا ويتابعوا دورة الحرارة في المحيطات شمالًا وجنوبًا، هي التيارات اللي بتحصل في قلب المحيط الأطلسي دي، اللي بيسموها “دوران انقلاب خط الزوال الأطلنطي” (Atlantic meridional overturning circulation)، أو اختصارًا بيسميها العلماء باسم “أموك” (AMOC)، تمام لحد كدا؟
تمام، التيارات دي بقى يا صديقي آلية عملها باختصار بتتلخص في إنها بتساهم في تدفق المياه الدافية والمالحة الموجودة في الطبقات العليا من المحيط الأطلنطي في اتجاه الشمال الأوروبي، وبتخلي المياه الأبرد الموجودة في الأعماق تتدفق ناحية الجنوب.
وزي ما شرحنا، فهي بتبقى شايلة جواها حرارة وأملاح وبتوصلهم لمعظم مناطق الكوكب الشمالية والجنوبية تقريبًا، وبكدا بتحافظ على مناخ الأرض معتدل نسبيًا.
وهتلاقي في تحت مصدر هيشرحلك بتفصيل أكبر وظيفتها إيه بالظبط عشان تبقى فاهم التيارات دي مهمة ليه: ????
طيب، إيه بقى المهم في القصة دي كلها؟ وليه المقدمة الطويلة دي كلها؟ إيه علاقة التيارات دي بموضوعنا والدراسة اللي بنتكلم فيها بالظبط؟
تعرف على: سبب ارتفاع درجة الحرارة
انهيار أهم تيارات المحيط الأطلسي
العلاقة يا صديقي بدأت لما العلماء اللي عملوا الدراسة دي استعملوا كمبيوتر خارق أو (Super Computer) عشان يصمموا محاكاة مناخية معقدة لتأثيرات التغير المناخي الشديد اللي الكوكب كله بيمر بيه حاليًا، وفي المحاكاة دي، زودوا شوية تركيز المياه العذبة الموجودة في المحيط.
طبعًا هتسألني إيه علاقة تركيز المياه العذبة اللي في المحيط بالتغيرات المناخية، وهقولك إن المياه العذبة دي أصلًا بتنتج من ذوبان الأنهار الجليدية اللي في جرينلاند والصفائح الجليدية الموجودة في القطب الشمالي، اللي هو بيحصل في الأساس بسبب زيادة الحرارة المصاحبة للتغير المناخي، والمشكلة إن ذوبانها وزيادة تركيزها في المحيط بيقلل ملوحته وبيخلي تياراته مع الوقت تبقى أضعف بدرجة ملحوظ، فـبيفقد قدرته على تنظيم حرارة الكوكب زي ما بيحصل في الدورة المحيطية اللي شرحناها من شوية دي.
طب إيه اللي حصل في المحاكاة بالظبط؟ وليه النتايج كانت صادمة ومخيفة بالنسبة لهم؟
اللي حصل يا صديقي إنهم لما زودوا من تركيز المياه العذبة في المحيط ببطء، لقوا إن التيار الأطلنطي أموك (AMOC) اللي قلتلك عليه دا، بدأ يضعف تدريجيًا لحد ما فجأة انهار تمامًا وأصبح غير موجود تقريبًا!
ودي كارثة مستحيل تقدر تدرك أبعادها الحقيقية إلا لما تفهم تأثيراتها هتكون إيه على العالم وعلى حياة الناس.
تأثير انهيار تيارات المحيط الأطلسي على حياتنا
الانهيار المفاجئ دا يا صديقي معناه إن القارة الأوروبية كلها تقريبًا هتقل حرارتها سريعًا، لدرجة إن المدن الأوروبية بعضها ممكن يوصل متوسط انخفاض الحرارة فيها لما بين 5 لـ15 درجة مئوية كاملين، في العقدين اللي جايين.
طبعًا العكس صحيح في حالة الجزء الجنوبي من الكوكب، بما فيهم إفريقيا وأمريكا الجنوبية وهكذا، اللي جوهم هيبقى دافي وحار أكتر، وممكن يزيد الجفاف فيه أكتر مما هو جاف.
دا غير كمان إن المواسم الرطبة والجافة في غابات الأمازون اللي هي رئة الكوكب كله حرفيًا هتتبدل، يعني هيبقى الموسم المطير مكان الموسم الجاف، وهكذا، ودا طبعًا هيؤدي لاختلال كبير جدًا في التوازن البيئي، وممكن سلالات الحيوانات بعضها متعرفش تتكيف مع التغييرات المفاجئة دي وتموت، وتتسبب في خلل في السلسلة الغذائية ممكن يتطور ويؤدي إلى مشكلة كبيرة جدًا.
المرعب أكتر من دا كله، إن مستوى سطح البحر نفسه هيعلى بنسبة ممكن توصل إلى متر كامل في بعض المناطق، ودا طبعًا هيؤدي إلى غرق المدن الساحلية كلها اللي مستوى ارتفاعها أقل من المتر، اللي فيهم مدن عربية منها الإسكندرية على سبيل المثال!
التغييرات دي يا صديقي وفق الدراسة هتحصل بمعدل أسرع عشر مرات من اللي إحنا شايفينه حوالينا حاليًا، ودا هيؤدي لإن مناخ الكوكب كله يتغير تمامًا على مدار عقد أو عقدين بالكتير، وهيفضل مستمر في التغير لمدة القرن اللي جاي بالكامل، ودا طبعًا هيخلي التكيف على التغيرات دي شبه مستحيل، وهيغير خريطة الكوكب كلها!
اقرأ أيضاً: اكتشاف آثار حياة عضوية معقدة على أحد أقمار زحل!
مخاطر واحتمالية انهيار المحيط الأطلسي
تخيل انت إن فجأة، أوروبا كلها خلال كام سنة يبقى جوها برد جدًا لدرجة إنها متبقاش صالحة للحياة، وتبقى الظروف البيئية فيها شبه القطب الشمالي أو الجنوبي كدا، أو على أقل تقدير تبقى قريبة من مناخ ولاية ألاسكا في أمريكا أو سيبيريا الروسية!
تخيل مدى حجم موجات النزوح الجماعي اللي هتحصل مع الوقت، وعدد الناس اللي مش هيقدروا يتكيفوا على الظروف الصعبة دي، وهتلاقي الصورة بدأت ترسم في دماغك منظر مخيف لخريطة الكوكب وهي بتتجمد ببطء في الشمال الأوروبي، وبتتحول لجو حار وجاف أكتر ناحية الجنوب في اتجاه خط الاستواء!
ورغم دا كله، مفيش حاجة توصفلك وتوضحلك مدى خطورة الموضوع، أكتر من الكلمة اللي كتبها مؤلفين الدراسة، لما قالوا: “لا توجد تدابير واقعية يمكنها التعامل مع هذا التغير السريع في درجات الحرارة”، كلمة مقتضبة وعلمية هدفها مش التخويف، لكنها رغم كل شيء، مخيفة عشان بتوضحلك مدى ضعف الجنس البشري كله، بعلومه وتقدمه التقني كله اللي وصلنا له على مدار آخر كام سنة، قصاد التغيرات البيئية العظيمة اللي فوق مستوى الاستيعاب والتصور دي.
طبعًا مش علماء البيئة والمناخ كلهم متفقين مع نتايج الدراسة دي، بعضهم بيقول إن الانقلاب المحيطي اللي بتتكلم عنه الدراسة مستحيل يحصل كدا في المدة القصيرة دي، وإنه لسه قدامه قرن على أقل تقدير، عشان يوصل لمرحلة نبدأ نحس بتأثيراته علينا، وطبعًا دا لو محصلش تغيير في السياسات العالمية للدول، وقدرنا نقلل أو نوقف الانبعاثات الحرارية اللي بتُطلق في الجو كل سنة، اللي بتخلي المشكلة أسوأ وصعب السيطرة عليها.
فيا ترى إيه اللي مخبيه لنا المستقبل؟ وهل الجنس البشري هيقدر يتكيف على اللي بيحصل دا، أو يصلحه قبل الفأس ما تقع في الرأس؟ ولا الأوان فات بالفعل والحروب والصراعات اللي العالم كله بيمر بيها حاليًا هتصرف نظرنا عن أشياء ممكن تتسبب في سقوط حضارتنا كلها؟!
هو دا السؤال، وإجابته كالعادة هسيبها لخيالك وللزمن.
مصادر:
https://www.science.org/doi/10.1126/sciadv.adk1189
https://climate.nasa.gov/explore/ask-nasa-climate/3266/slowdown-of-the-motion-of-the-ocean/
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
