شكل العالم في المستقبل .. الجزء الأول
عمرك فكرت شكل العالم ممكن يبقى عامل إزاي في المستقبل؟! مع كل التطور التكنولوجي اللي بنلاقي نفسنا واصلينله بمرور كل يوم، هل نقدر نتخيل أصلًا شكل المجتمع والعالم ممكن يبقى واصل لفين مثلًا سنة 2050؟!
الحقيقة إن فكرة تخيل المستقبل دي طول عمرها كانت حلم بيداعب خيال مؤلفين وكتاب سيناريو الخيال العلمي، منهم اللي تخيل إن المستقبل هيكون حاجة مظلمة وكابوسية زي هربرت جورج ويلز وجورج أورويل،
ومنهم أعمال تخيلت المستقبل بشكل جميل ومشرق زي مثلًا سلسلة Star Trek، بس الأكيد هو إن موضوع تخيل المستقبل هيبقى عامل إزاي ده بيفتح حدود وتصورات كتير لخيال مالهوش حدود.
تعالى النهارده أحكيلك على شكل المستقبل القريب هيكون عامل إزاي، بناءً على أسس التكنولوجيا والتغييرات الاجتماعية والتقنية اللي بدأنا نشوف بذورها في عصرنا الحالي.
كوباية شايك الحلوة والنعناع في إيدك، ويالا بينا..
أحوال العالم في عام 2050
لو تخيلنا مثلًا إننا دلوقتي عايشين في سنة 2050، فالمؤكد هو إن مفيش حاجة تقريبًا من شكل العالم اللي إحنا نعرفه دلوقتي هتكون موجودة أو طبيعية ساعتها، لدرجة إن شكل الحياة وقتها هيكون مختلف جذريًا عن دلوقتي.
عندك مثلًا حاجة بسيطة زي العربيات، وقتها معظم العربيات اللي هتكون موجودة في العالم هتكون شغالة بالكهرباء مش البنزين، وفكرة إنك تبقى سايق عربية بتشتغل بالبنزين دي هتبقى كإنك سايق عربية موديل سنة 1950 مثلًا دلوقتي،
وفكرة محطات البنزين دي هتكون خلاص انتهت، وهيكون كل واحد بيشحن عربيته بنفسه بشاحن موجود عنده في البيت أو في محطات شحن مصغرة في الشارع.
كمان معظم شركات العربيات هتكون خلاص وصلت لتكنولوجيا العربيات ذاتية القيادة زي اللي بتعمله شركة تسلا Tesla بتاعت إيلون ماسك دلوقتي، لدرجة إن فكرة إنك تسوق عربيتك بنفسك دي هتكون موضة قديمة!
العربيات ممكن تبقى وصلت لإنها تبقى مفيهاش دركسيون ولا كرسي سواق، كلها هتبقى ماشية بكمبيوتر بيشتغل بالذكاء الصناعي، أنت بس تديله أمر يوديك للمكان الفلاني، وهو يسوق العربية على الطرق ويعتمد على الخرايط الإلكترونية والـGPS عشان يوديك هناك بأمان.
النقل والمواصلات في عام 2050
ومش دي بس كل حاجة، ده مفهوم النقل والمواصلات نفسه هيكون تغير تمامًا، عندك مثلًا في تكنولوجيا بتشتغل عليها فعلًا شركة أوبر وAirbus حاليًا، هي عبارة عن تاكسيهات بتطير، مش بتمشي على طرق!
ودي ممكن تبقى الميكروباصات بتاعت سنة 2050، هتبقى بتطلب أوبر أو تاكسي، تلاقيه جايلك طاير في السما، وبعدين تركب وياخدك لحد المكان اللي أنت عايز تروحه بالجو، مش الأرض!
وعشان البنية التحتية للدول وقتها تستوعب حاجة زي دي، غالبًا قوانين المرور والطريقة اللي بتتبني بيها الطرق وقتها هتتغير وهتبقى طرق ثلاثية الأبعاد، مش مجرد طرق أسفلت مسطحة زي دلوقتي، عشان هيبقوا عاملين حسابهم إن في عربيات هتكون بتطير وقتها، وما بتلمسش الأرض خالص.
وعندك كمان طرق التنقل بين الدول والمدن هتكون تغيرت تمامًا، وده بالفعل بدأنا نشوف أشكال منه حاليًا مع قطر HyperLoop، اللي بيشتغل عليه إيلون ماسك دلوقتي، اللي هو عبارة عن قطر ممغنط سرعته أضعاف سرعة الصوت، بيقدر ينقلك من شرق أمريكا لغربها في أقل من نص ساعة!
وفوق كل ده، مع النجاحات اللي بتحققها شركة Space X لتكنولوجيا الفضاء في الفترة الحالية، وقتها هنكون بالفعل بدأنا نستعمل الصواريخ بتاعتهم المتطورة للتنقل ما بين الدول، بدلًا من الطيارات، يعني ممكن وقتها تكون عايز تروح من لندن لنيويورك، فتركب صاروخ Star Ship وتوصل في أقل من ربع ساعة، كإنك نازل رايح كارفور!
اقرأ أيضاً:
مستقبل الأرض بعد انتهاء الموارد الطبيعية
استخدام الطاقة النظيفة بحلول عام 2050
طبعًا هتسألني طب والطاقة؟ طرق توليد الطاقة بتاعتنا وقتها هتكون وصلت لفين عشان تقدر تستوعب كل ده؟! هقولك إن وقتها هنكون بنستهلك الطاقة بطريقة مختلفة جذريًا عن اللي بنعمله دلوقتي، هيبقى الاعتماد الأكبر على الطاقة النضيفة والمتجددة،
زي الطاقة الشمسية وطاقة الرياح، هتلاقي في المستقبل مساحات ضخمة جدًا من الصحاري الكبرى اللي في العالم متغطية بألواح طاقة شمسية متطورة بتقدر تولد طاقة تكفي دول كاملة، وبتتنقل الطاقة دي باستعمال كابلات متطورة بتجري تحت الأرض وتحت سطح البحر.
كمان هنكون وصلنا فعلًا بشكل نهائي لتشغيل أول مفاعل نووي اندماجي في التاريخ، وده بيبقى مفاعل نووي بيستعمل طريقة الاندماج النووي في توليد الطاقة، مش الناشطار النووي زي اللي عندنا دلوقتي،
والمفاعلات دي فكرة عملها هي نفسها طريقة عمل النجوم نفسها! وهيكون الناتج منها طاقة نضيفة وضخمة جدًا أكتر بكتير من المفاعلات الانشطارية، وكمان مش بتلوث البيئة زي الانشطارية، عشان هي مالهاش مخلفات نووية!
المفاعلات النووية الاندماجية
وده اللي بالفعل قطعت فيه الصين شوط كبير، لدرجة إنهم بالفعل وصلوا لتشغيل أول مفاعل نووي اندماجي مصغر عندهم ووصلوا بالمركز بتاعه لدرجة حرارة أعلى من حرارة سطح الشمس لمدة دقيقة كاملة!!
وكمان في مشروع ITER العالمي اللي بتشارك فيه أكتر من 35 دولة، اللي بيهدف لتصنيع أول مفاعل نووي اندماجي ضخم في التاريخ، لتوليد طاقة النجوم اللا نهائية نفسها، بس هنا على الأرض!
فكرة إنك وقتها تكون لسه بتعتمد على البترول والنفط زي دلوقتي هتكون حاجة مضحكة بالنسبة للاحتمالات اللا نهائية اللي هتفتحها قدامنا تكنولوجيا المفاعلات الاندماجية،
وهتلاقي وقتها الدول اللي بتعتمد على مخزون البترول والنفط بتاعها في الاقتصاد زي مثلًا دول الخليج العربي، بتغير استراتيجياتها تمامًا وبتستثمر أكتر في تصنيع المفاعلات الاندماجية، لحد ما هييجي اليوم ومش هيكون في منطقة في العالم كله مفيهاش طاقة وكهرباء جاية بوسايل نضيفة وآمنة!
تكنولوجيا الأطراف الصناعية المتطورة والشرائح الإلكترونية
والتغيير ده مش بس هيكون في وسايل النقل أو توليد الطاقة، لا ده هيوصل للناس نفسهم وأجسامهم البشرية اللي حتى شكلها وقدراتها وقتها هتتغير، من خلال تكنولوجيا الأطراف الصناعية المتطورة والشرائح الإلكترونية اللي هنكون وصلنا لإننا بنركبها في أجسامنا نفسها، عشان تغير الطريقة اللي بنتعامل بيها مع العالم.
مستقبل زراعة الشرائح الإلكترونية
ممكن على سبيل المثال وقتها نكون ساعتها وصلنا لإننا نتحكم في كل الأجهزة الإلكترونية بتاعتنا بمجرد التفكير، من خلال شريحة إلكترونية مزروعة جوة دماغنا، ممكن حتى نكون وصلنا لإننا بنتواصل مع بعض بالتفكير، من غير كلام،
وده مش مجرد خيال، لأ ده واقع فعلًا وبيشتغل عليه فعلًا شركة (نيورالينك Neuralink) بتاعت رجل الأعمال إيلون ماسك بردو، من خلال شريحة اسمها BMI أعلنوا عنها من فترة، وقلبت العالم كله.
الشرايح الإلكترونية دي مش بس هتغير طريقة تعاملنا مع العالم، وتلغي حاجتنا لاستعمال حاجات زي الموبايلات وأجهزة الكمبيوتر والتابلت من خلال إنها توفرلنا شبكة إنترنت كاملة جوة دماغنا،
لأ دي كمان هتساعد في القضاء على أمراض وحالات طبية مستعصية على الطب البشري منذ بداية التاريخ، زي الشلل والعمى والألزهايمر وكل الأمراض والحالات الطبية اللي بتكون ناتجة من مشاكل في المخ، كل ده هنقدر نصلحه بسهولة من خلال برمجة الشريحة دي!
إمكانيات تكنولوجيا الأطراف الصناعية في عام 2050
وقتها، هيكون الناس اللي ناقصين أطراف أو عندهم أعضاء في جسمهم بايظة أو مقطوعة، بيقدروا يركبوا أطراف صناعية متطورة بتشتغل أحسن من الطبيعية، وكمان بتديهم قدرات جديدة مكانتش موجودة عندهم، زي القوة أو السرعة،
ممكن تلاقي عداء في الأولومبياد مركب رجول صناعية وبيسبق أي عداء محترف طبيعي، ممكن تلاقي مصارع بدراعات فولاذية بتديله قوة فوق بشرية، ممكن تلاقي جنود خارقين متطورين في الجيوش العظمى، بيقدروا يعملوا حاجات ميقدرش عليها الجنود العاديين اللي في الجيوش بتاعتنا دلوقتي!
تخيلات ماذا سيحدث في المستقبل؟
تخيل أنت كل اللي بحكيلك عنه ده، وحاول تستوعب إني بقولك إنه هيحصل في المستقبل القريب، بالكتير أوي سنة 2050 مثلًا، هل تفتكر حاجة مذهلة زي دي، ممكن عقل طبيعي يستوعبها ويألفها، لما يتعامل معاها ويشوفها رأي العين؟!
الله أعلم، بس المؤكد هو إن شكل العالم كله على وشك إنه يتغير تمامًا، لدرجة إنك لو ركبت آلة زمن دلوقتي وقررت تزور المستقبل اللي جاي قريب ده، فأنت في الغالب مش هتعرفه ولا هتقدر تميز شكله!
ولو كنت فاكر إن دي كل حاجة، خليني أصدمك وأقولك لأ، عشان لسه في حاجات تانية أكثر إبهارًا من كل اللي تكلمنا عنه ده بما لا يقاس، لكن هكلمك عنها بإذن الله في الجزء الثاني من المقال ده قريبًا.
وفي النهاية، يمكن مفيش ختام للجزء ده أنسب وأفضل من المقولة الشهيرة للأديب الكبير أمين معلوف، لما قال: “إن قناعتي العميقة هي أن المستقبل غير مدوّن في أي مكان”.
وأن المستقبل سيكون ما نصنعه نحن منه.
* تنويه: الأفكار المذكورة في المقال لا تعبر بالضرورة عن رأي الموقع.
*****************
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
