هي ليه الكحة طولت معايا!
كتير من الناس بيشتكي إن جاله دور برد بدأ معاه بعطس ورشح وأحيانًا سخونة، وبعد فترة كل الأعراض بتخف، لكن بيبدأ معاه دور كحة بيطول ومش عايز يمشي.
طيب إيه السبب في ده؟ وليه ناس كتير بيتكرر معاها نفس الموضوع؟
أسباب الكحة المستمرة
معظم الفيروسات التنفسية، ومن ضمنها الفيروس المخلوي التنفسي، بيسبب في البداية التهاب في الجهاز التنفسي العلوي، فتبدأ تظهر على المريض أعراض تشبه دور البرد، يعني رشح وعطس وانسداد في الأنف وأحيانًا سخونة.
لكن في بعض الأشخاص ممكن العدوى تمتد وتوصل للجهاز التنفسي السفلي، فتسبب التهاب في الشعب الهوائية، وتعمل تلف في خلايا الأغشية المخاطية المبطنة للجهاز التنفسي.
التلف ده بياخد وقت علشان الجسم يبدأ يصلحه ويقدر يرجع الخلايا والأغشية المخاطية لوضعها الطبيعي، الوقت ده ممكن يطول شوية وبياخد في بعض الأحيان فترة تتراوح من ٣ إلى ٨ أسابيع.
خلال الفترة دي تصاب الشعب الهوائية بحالة بنسميها “تهيج الشعب الهوائية”، بتزيد فيها حساسية المستقبلات المسؤولة عن الكحة لأي مثيرات، زي الدخان والأتربة والعطور والروايح النفاذة، وأحيانًا كمان الهوا البارد والمجهود، فيبتدي المريض يكح كحة متواصلة في شكل نوبات، وغالبًا ما بتكون كحة جافة بدون بلغم، وممكن تزيد بالليل ويصاحبها شعور بأكلان في منطقة الزور والقصبة الهوائية.
علاج الكحة المستمرة
طيب هل الموضوع ده فيه خطورة؟
مافهوش أي خطورة، غالبًا الكحة بتخف بشكل تلقائي بمجرد شرب سوايل دافية وتجنب التعرض للمثيرات المختلفة.
في حال إن الكحة طولت بنحتاج ساعتها ناخد علاج، وممكن في بعض الأحيان ناخد نوع من البخاخات اللي بتهدي تهيج الشعب الهوائية.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
