نفس الكلام حصل مع حضارات تانية
تخيل لو قلت لك إن الكون ده كله ممكن يبقى مليان حضارات ذكية ومتطورة، بس كلهم خايفين وقافلين على نفسهم ومش بيعرّفوا حد بوجودهم، عشان كلهم خايفين من خطر كوني معين ممكن لو عرف موقعهم يقضي على حضارتهم ويمسحهم من سجلات الكون تمامًا!
الخطر الكوني ده ممكن يكون بالفعل عرف موقعنا فين من زمان، وممكن يكون حاليًا في طريقه لينا هنا على كوكب الأرض، ويكون بكره مستنينا كارثة حضارية وكونية تقضي على تاريخنا كله، وتخلينا كأننا مكناش موجودين أبدًا!
سنة 2008، المؤلف الصيني “لو سيشين” نشر رواية كسرت الدنيا، وباعت ملايين النسخ حول العالم كله، اسمها الغابة المظلمة (The Dark Forest). الرواية دي كانت بتتكلم ضمن أحداثها عن نظرية غريبة شوية، ومرعبة لأي حد بيفكر وبيحلم إننا يوم من الأيام نتواصل مع حضارة فضائية.
النظرية اللي تكلم عنها سيشين في الرواية، بعيدًا عن أحداثها نفسها، كانت بتتخيل إن الكون ده عبارة عن غابة واسعة ومظلمة، ومليانة صيادين كتير. كل صياد من دول عبارة عن حضارة ذكية موجودة في مكان من الفضاء، بس الحضارة دي قافلة على نفسها تمامًا، ومش بتطلع أي إشارات أو تحاول تتواصل مع أي حضارة تانية غيرها بأي شكل. وده عشان هما خايفين إن لو في يوم من الأيام شافتهم حضارة تانية متطورة أكتر منهم، فهي هتقضي عليهم وتدمرهم تمامًا!
طيب نظرية الغابة المظلمة بتقول إيه؟!
الفرضية يا سيدي بتتقسم لـ3 نقاط رئيسية كلهم مبنيين على بعض، أول نقطة هنتخيل إن الكائنات الحية الذكية جميعًا بتدفعها فطرتها الطبيعية لأنها تحافظ على حياتها وتفضل عايشة، دي المفروض طبيعة في أي كائن حي، إنه عايز ينجو ويفضل عايش، أصل أكيد مفيش كائن ذكي وعاقل هيبقى عايز يموت. دي الحاجة الوحيدة اللي ممكن تبقى مشتركة ما بين كل الكائنات الحية اللي ممكن تكون موجودة في الكون.
النقطة التانية بقى بتقولك إن الحضارة الذكية اللي هتوصل في يوم من الأيام لتكنولوجيا متقدمة تأهلها للسفر عبر الفضاء واكتشاف حضارات تانية ذكية زيها، مش هيكون عندهم أدنى فكرة هل الحضارات التانية دي صديقة ولا عدوة، وهل لو قابلوهم في يوم من الأيام، هيحاولوا يقضوا عليهم ولا لأ، مفيش أي ضمان من أي نوع يخليهم يبقوا متأكدين هل همَّه في أمان ولا في خطر قدام الحضارات التانية.
نتيجة ده، بتكون النقطة التالتة: الخيار الآمن الوحيد إنهم يخلصوا على أي حضارة ذكية هتقابلهم الأول، قبل ما الحضارة التانية دي تكتشفهم وتلحق تدمرهم!
أهو من هنا بقى، جه التشبيه بالغابة المظلمة!
تخيل إن الحضارات الذكية اللي في الكون كله، هما عبارة عن صيادين جوه غابة، والغابة دي فيها حيوان مفترس أو صياد متوحش أقوى منهم كلهم، والصياد ده لو شم ريحتهم أو عرف بوجودهم، هيجري ناحيتهم ويهاجمهم ويفترسهم، ويقضي عليهم. تفتكر أنت لو مكان أي واحد من الصيادين دول، هتبقى عايز الوحش المفترس ده يعرف موقعك فين؟!
أكيد لأ طبعًا، أنت هتبقى واخد حذرك جدًا، ودايمًا بتتسحب عبر الغابة (اللي هي هنا في الحالة دي كناية عن الكون)، ومش عايز أي حد يشوفك أو يحس بيك أو يسمعك، ولما تيجي تولع نار مثلًا عشان تدفي نفسك أو تشوي الأكل بتاعك، مش هتولع نار عالية، بل هتحاول تخلي النار دي محدودة جدًا عشان محدش يشوفها غيرك، وعشان متلفتش نظر الوحش المفترس، فييجي وياكلك!
أهو النار بقى في المثال ده إسقاط على البصمة التكنولوجية للحضارات الذكية التانية الموجودة في الكون!
الحضارات دي أهلها مش بيبعتوا أي إشارات للفضاء، ولا بيبينوا إنهم موجودين بأي شكل، وقافلين على نفسهم الباب في منطقتهم المحدودة من الفضاء اللي حواليهم، وكافيين خيرهم شرهم وعايزين يعيشوا حياتهم في سلام!
ولو أنت فاكر إن الموضوع ده كله كلام روايات خيالية، فخليني أقولك إن المؤلف الصيني لو سيشين ده مش أول واحد تكلم عن فرضية الغابة المظلمة دي، هو بس أول واحد سماها كده، لكن الفرضية دي في الأساس موجودة من زمان، تحديدًا من سنة 1983، لما العالم الفلكي ديفيد برين (David Brin) عرضها إنها جزء من الإجابات بتاعته اللي كان بيحاول بيها يحل معضلة فيرمي، ويجاوب على سؤال ليه الحضارات الفضائية مش بتتواصل معانا.
الحقيقة إن في علماء كتير كبار وليهم اسمهم المؤثر في تاريخ العلم، زي ستيفن هوكينج مثلًا، شايفين إن فكرة إننا نحاول نتواصل مع حضارات فضائية تانية غريبة عننا، هي فكرة غبية جدًا وممكن تؤدي لنهاية الجنس البشري كله في يوم من الأيام!
أصلك لو حاولت حتى تطبق ده على التاريخ بتاعنا اللي موجود في الكتب ومتسجل ومتأرخ في ملايين المصادر والمراجع، هتلاقي إن دايمًا لما كانت بتبقى في حضارة قوية بتقابل حضارة تانية أضعف منها، كانت العواقب بتكون كارثية على الحضارة الأضعف.
شوف مثلًا الأوروبيين عملوا إيه في الهنود الحمر لما اكتشفوا قارة أمريكا! أبادوهم ودمروهم تمامًا، ودمروا كل حاجة كانوا يملكوها، وفي الآخر استولوا على أرضهم ومواردهم، لحد ما كونوا دولة أمريكا بتاعت دلوقتي!
نفس الكلام حصل مع حضارات تانية كتير لا تعد ولا تحصى، في خلال التاريخ كله! حضارة المايا، وحضارة الهند، واللي حصل في شعوب إفريقيا لما استعبدوهم واستعمروا القارة الإفريقية كلها عشان الإنسان الأبيض اللي كان شايف نفسه متميز، ياخد ثرواتهم ومواردهم ويشغلهم في أرضهم بالسخرة عشان يخدموه!
أهو ده بالظبط اللي ممكن يحصل فينا إحنا، لو في يوم من الأيام تواصلنا مع حضارة متطورة زي دي، بس الفرق إن الحضارة الفضائية الغريبة دي، ممكن متكونش رحيمة بينا وتسيب شوية مننا موجودين وتستعبدنا زي ما البشر كانوا بيعملوا في بعض زمان، لأ دول ممكن يقضوا على خطرنا تمامًا، ويمسحونا من المعادلة كلها، من خلال إنهم يدمرونا إحنا وكوكبنا بالكامل!
مقالات ذات صلة:
هل تم اكتشاف آثار حياة في كواكب المجموعة الشمسية؟
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
