المخ البشري يعمل في 11 بعدًا

من فترة قريبة، في فريق من العلماء والباحثين قدروا يوصلوا لاكتشاف مذهل حرفيًا، وممكن يغير من فهمنا لطريقة عمل الدماغ تمامًا، الكشف ده إن المخ البشري بيشتغل وبيعالج البيانات الحسية من 11 بُعد، مش مجرد 3 أبعاد عاديين زي اللي إحنا عايشين فيهم وبنستوعبهم!

مش بس كده، ده المخ البشري الموجود جوه الجمجمة بتاعتك دي، بيتكون جواه في أثناء عملية التفكير ومعالجة البيانات نوع غريب من الأشكال الهندسية الغامضة المعقدة، ويمكن أكثر تعقيدًا من الكون الحقيقي اللي إحنا عايشين فيه بما لا يقاس!

طب إيه الموضوع ده بالضبط؟!

كوباية شايك الحلوة والنعناع، وركز بقى معايا عشان الموضوع الجاي ده هيبهرك فعلًا.

مشروع الدماغ الأزرق

بص يا عم، الموضوع كله بدأ مع فريق سويسري بيشتغلوا بقالهم سنين على مشروع طموح اسمه مشروع المخ الأزرق (The Blue Brain Project)، دول يا سيدي بيحاولوا يبنوا محاكاة كاملة افتراضية لشكل المخ البشري وطريقة عمله ومعالجته للبيانات نفسها! واللي بيخليني أقولك إن المشروع ده طموح إن المخ البشري –لو أنت متعرفش– فيه أكتر من 86 مليار خلية عصبية أو (Neurons) زي ما بيسموها! والخلايا دي بتتواصل مع بعضها بشبكة كهربية معقدة مستحيل التنبؤ بطريقة عملها، لإنها أعقد من أي شيء حد فينا تعامل معاه قبل كده.

اقرأ أيضاً: الأبعاد المنطقية للذكاء الاصطناعي

محاكاة الدماغ

الفريق ده في البداية وصل لعمل محاكاة افتراضية باستعمال أجهزة الكمبيوتر الخارقة (Super Computers) لمنطقة من المخ اسمها “القشرة المخية الحديثة” (Neocortex)، ونشروا المحاكاة دي بالفعل في سنة 2015، ومن ساعتها وهما بيعملوا أبحاثهم عليها عشان يكتشفوا طريقة عمل المخ نفسه وإزاي بيقدر يوصل للإدارك ويستوعب البيانات الحسية.

بس المفاجأة بقى إنهم لما بدأوا يعملوا أبحاثهم على الخلايا المخية اللي جوه المحاكاة، ويحفزوها باستعمال محفزات صناعية أو زي ما بيسموها (Stimuli) معينة بيتم حقنها في الخلايا دي، أو باستعمال الصدمات الكهربية أو غيرها من وسايل التحفيز، اكتشفوا حاجة مذهلة غيرت طريقة تفكيرنا في طريقة عمل المخ البشري إلى الأبد!

الحاجة دي إن خلايا المخ أو الـ(Neurons) لما بيتم تحفيزها وبتبدأ تشتغل عشان تقدر تستوعب معلومة، فاللي بيحصل إن الخلايا دي بتتجمع مع بعضها في تجمعات صغيرة جدًا اسمها عصبة (Clique)، والخلايا دي بتبقى متصلة مع بعضها بطريقة شديدة التعقيد، وممتدة في كل الاتجاهات، بشكل يخليها تعمل أشكال هندسية حقيقية ومذهلة جوه المخ!

اقرأ أيضاً: ماذا يحدث عند الموت

شرح آلية عمل المخ بميكانيزم هندسية

يعني إيه الكلام ده؟!

يعني أنت لما بتفكر، فالخلايا العصبية اللي جوه مخك بتتجمع مع بعضها و”بتخلق” أشكال هندسية معقدة من الهوا حرفيًا! وكل ما بتفكر أكتر، كل ما عدد الخلايا اللي بيتجمع مع بعضه في العصبة أو الـ(Clique) دي بيزيد، ومعاه بتزيد الأبعاد الرياضية اللي بيتكون منها الشكل الهندسي ده، وبتتعقد أكتر!

لما بتتجمع شوية خلايا بسيطة في الأول، بيبقى شكلها عامل زي النقطة، يعني بعد صفري (Zero Dimensional)، وبعدين بتكبر شوية وتبقى طويلة زي العصاية، يعني دخلت في البعد الأول 1D، وبعدين تبقى عريضة ومبططة زي الورقة، يعني بقت ثنائية الأبعاد 2D، بعدين تكبر وتتخن يبقى ليها سُمّك زي المكعبات، يعني بتدخل في البعد التالت 3D ويبقى ليها طول وعرض وارتفاع، وبعدين أشكالها بتتغير وتدخل في بعد رابع 4D وخامس 5D، فما فوق، لحد ما بتوصل لأبعاد أكبر من اللي إحنا نقدر نحس بيها أو نشوفها، لدرجة إن بناءًا على الأبحاث اللي عملوها، والمشاهدة المباشرة اللي شافوها في برنامج المحاكاة بتاع المخ، الأشكال دي بتوصل في بعض العمليات تقريبًا 11 بعد علوي غير معروف!

مش بس كده، الأشكال الهندسية دي بيبقى جواها وحواليها فراغات ذات أبعاد علوية (Higher Dimensional Spaces) بتتخلق بردو من الهوا، بيسموها التجويفات (Cavities)، وبتفضل الأشكال والتجويفات دي موجودة وبتتعقد وتكبر أكتر طول ما المخ بيفكر، بعد كده أول ما بيعالج الداتا أو البيانات اللي بيتم تغذيته بيها، وبيفهمها، بنلاقي الأشكال دي انهارت تمامًا واختفت هي والتجويفات اللي في وسطها!

معجزة الدماغ البشري

يعني لو هنوضحها بتشبيه بسيط يسهل فهمها، هقولك إن الموضوع أشبه بما لو كان المخ عبارة عن شاطئ ضخم، والخلايا اللي جواه هي الرملة الموجودة على الشاطيء، كل ما بتيجي تفكر، بتلاقي الرمل ده تكونت فيه فجأة أشكال هندسية غريبة بتبدأ بسيطة وبعدين تكبر لحد ما تبقى شديدة التعقيد، كأنها قلعة ضخمة من الرمال، وبعدين أول ما عملية المعالجة والتفكير تنتهي بالاستيعاب، قلعة الرمل دي بتنهار تاني وتختفي وترجع رمل زي ما كانت!

الموضوع أكبر وأعقد من إني أقدر أشرحه لك ببساطة في شوية سطور، بس اللي بقوله ببساطة إن مخك بيعالج المعلومات في أكتر من 11 بعد، مش 3 أبعاد بس زي ما كنا فاكرين! وده معناه إن المخ البشري ده جواه كون كامل من أبعاد مختلفة أكبر من اللي إحنا متعودين عليها وبنشوفها في العالم الحقيقي بتاعنا!

مخك كون كامل، أكبر وأعقد من الكون الحقيقي اللي أنت بتشوفه حواليك وبتستوعبه بعيونك!

الموضوع ده مش مجرد كلام، ده تم اثباته فعلًا بالتجربة لما عملوا نفس الخطوات دي على أمخاخ حقيقية للفئران، ولقوا نفس الأشكال الهندسية الغريبة اللي بتتكون وتفضل أبعادها تزيد، ويتكون وسطها تجويفات علوية الأبعاد، وبعدين تختفي تمامًا كأنها تبخرت! والفريق السويسري ده نشر البحث بالفعل في واحدة من أكبر المواقع العلمية المتخصصة في علم المخ والأعصاب أو الـ(Neuroscience) في العالم، هي مجلة (Frontiers in Computational Neuroscience)، وهتلاقي لينك للبحث هنا:

https://www.frontiersin.org/،./10،./fncom.2017.00048/full

فتخيل كده أنت ده معناه إيه!

اقرأ أيضاً: هل تعلم أن لرئتك وظائف أخرى غير عملية التنفس؟

الدماغ الأزرق مشروع لفك اللغز الكبير

تخيل شكل الكون الحقيقي الصغير جدًا اللي موجود جوه دماغك، وكمية الأبعاد الرياضية اللي مبنقدرش نحس بيها، اللي موجودة جوانا وأقرب لينا من حبل الوريد!

تخيل الكون الواسع العملاق اللي إحنا عايشين فيه ده، وشكله الحقيقي اللي إحنا مبنقدرش نشوفه ممكن يبقى معقد إزاي! والأدهى كمان إن العلماء عشان يقدروا يوصلوا للاكتشاف ده، في علم الرياضيات الرقمية التقليدية (Mathematics) بتاعنا مكانش قادر على معالجة الأشكال الهندسية الغريبة اللي شافوها بتتكون جوه المحاكاة دي، واضطروا يستعملوا نوع متطور من الرياضيات اسمه الطبولوجيا الجبرية (Algebraic Topology).

المفاجأة إن ده نفس نوع الرياضيات اللي بيستعمله العلماء في تفسير افتراضات نظرية الأوتار الفائقة (Super String Theory) في الفيزياء النظرية، اللي بردو بتقول إن الكون بيتكون من 11 بعد!

الاكتشاف ده عايز أقولك إنه قالب الدنيا في مجال علوم المخ، وبيوعد بإنه مستقبلًا من خلال دراسة متعمقة له، هنقدر نوصل لكيفية تطور الذكاء البشري، وكمان هنعرف الذكريات بتاعتنا بتتخزن إزاي جوه المخ، وممكن من خلال ده نقدر نوصل لفهم حقيقي لمفهوم الوعي نفسه، ومدى ارتباطه الفيزيائي بالكون الواسع وأبعاده الحقيقية الخفية!

العلم في كل يوم بيوصل لمراحل مبهرة فعلًا، ومين عارف المستقبل مخبي لينا إيه!

المصادر:

https://przekroj.pl/،./the-human-brain-builds-structures،.

https://www.sciencealert.com/science-discovers-human،.

https://nypost.com/،./the-human-brain-sees-the-world-as،./

* تنويه: الأفكار المذكورة في المقال لا تعبر بالضرورة عن رأي الموقع.

_________________________________

لمتابعة قناة اليوتيوب لأكاديمية بالعقل نبدأ، اضغط هنا

لقراءة المزيد من المقالات، اضغط هنا